ଜାଡ଼ ମାଡ଼ରେ ଥରୁଛି ସାରା ଓଡ଼ିଶା। ଆଉ ଏଇ ଶୀତ କମିବାର ନାଁ ଧରୁନି । ଆଗାମୀ ଦିନରେ ବି ଏହି ଶୀତ କମିବ ବୋଲି ଆଶା ଦିଶୁନି । ଏବେ ଏମିତି କିଛି ଚିନ୍ତାରେ ପଡ଼ିଛନ୍ତି ସାଧାରଣ ଜନତା । ସକାଳୁ ଏତେ ଶୀତ ଯେ, ଘରୁ ବାହାରି ହେଉନି । ସକାଳ ୯ ଟା ଯାଏଁ କୁହୁଡ଼ି ଯାଉନି । ସୂର୍ଯ୍ୟ ବି ଦିଶୁ ନାହାନ୍ତି । ଦିନ ସାରା ଖାଲି କୋହଲା ପବନ ମାଡ଼ ହେଉଛି । ଦେହ ମୁଣ୍ଡ କାଲୁଆ ହୋଇଯାଉଛି ।

ପାଣିପାଗ ବିଭାଗର କହିବାନୁଯାୟୀ, ଆଗାମୀ ଦୁଇ ଦିନ ଯାଏଁ ଏଇ ଶୀତ ଲାଗି ରହିବ । ଏମିତିକି ନୂଆ ବର୍ଷ ଯାଏଁ ମଧ୍ୟ ଏଭଳି ହାଡ଼ଭଙ୍ଗା ଶୀତ ଜାରି ରହିବ । ଏବେ ଓଡ଼ିଶାର ୧୦ରୁ ଅଧିକ ସହରରେ ତାପମାତ୍ର ୧୦ ଡିଗ୍ରୀରୁ କମ୍‌ ରହିଛି । ନୂଆ ବର୍ଷ ପରେ ତାପମାତ୍ରା ସାମାନ୍ୟ ବୃଦ୍ଧି ପାଇବ । ଅର୍ଥାତ୍ ଅତି ବେଶି ହେଲେ ୧୧ ରୁ ୧୨ ଡିଗ୍ରୀ ରହିବ ରାତି ତାପମାତ୍ରା । ତା'ପରେ ଧିରେ ଧିରେ ତାପମାତ୍ର ବୃଦ୍ଧି ପାଇବ ବୋଲି ଆଶା କରାଯାଉଛି ।

ଆଗାମୀ ୨୪ ଘଣ୍ଟା ପାଇଁ ସୁନ୍ଦରଗଡ଼, କଳାହାଣ୍ଡି, କନ୍ଧମାଳ, କେନ୍ଦ୍ରାପଡ଼ା, ଜଗତସିଂହପୁର, ଭଦ୍ରକ ଓ ବାଲେଶ୍ବର ଜିଲ୍ଲାରେ ସକାଳ ସମୟରେ ଗୋଟିଏରୁ ଦୁଇଟି ସ୍ଥାନରେ ଘନ କୁହୁଡ଼ି ହେବାର ସମ୍ଭାବନା ରହିଥିବାରୁ ପାଣିପାଗ ବିଭାଗ ପକ୍ଷରୁ ୟେଲୋ ଓ୍ୱାର୍ଣ୍ଣିଂ ଜାରି କରାଯାଇଛି । ଏଥିସହ ଅନୁଗୁଳ ଏବଂ ଝାରସୁଗୁଡ଼ା ଜିଲ୍ଲାର ଗୋଟିଏରୁ ଦୁଇଟି ସ୍ଥାନରେ ଶୀତ ଲହରୀ ଜାରି ରହିବାର ସମ୍ଭାବନା ଅଧିକ ରହିଥିବାରୁ ସର୍ତକ ସୂଚନା ଜାରି କରାଯାଇଛି ।

ସକାଳେ କୁହୁଡ଼ି କିମ୍ବା ହାଲୁକା କୁହୁଡ଼ି ଏବଂ ପରେ ମୁଖ୍ୟତଃ ମେଘମୁକ୍ତ ଆକାଶ ରହିବାର ସମ୍ଭାବନା ରହିଛି । ସର୍ବାଧିକ ତାପମାତ୍ରା ୨୭ ଡିଗ୍ରୀ ଏବଂ ସର୍ବନିମ୍ନ ତାପମାତ୍ରା ୧୪° ପାଖାପାଖ ହେବାର ସମ୍ଭାବନା ରହିଛି।

ଏବେ କନ୍ଧମାଳ ଜିଲ୍ଲାରେ ଜାଡ଼ ଭାଙ୍ଗୁଛି ହାଡ଼ । ଜି. ଉଦୟଗିରି ରାଜ୍ୟର ସବୁଠାରୁ ଥଣ୍ଡା ସ୍ଥାନ ପାଲଟିଛି। ଗତକାଲି ସର୍ବନିମ୍ନ ତାପମାତ୍ରା ୩.୫ ଡିଗ୍ରୀ ସେଲସିୟସ୍ ରେକର୍ଡ କରାଯାଇଥିଲା। ସେହିପରି ଦାରିଙ୍ଗବାଡ଼ି ଓ ଫୁଲବାଣୀରେ ମଧ୍ୟ ପ୍ରବଳ ଥଣ୍ଡା ଅନୁଭୂତ ହେଉଛି। ଏହି ଦୁଇଟି ଜାଗାରେ ସର୍ବନିମ୍ନ ତାପମାତ୍ରା ୬ ଡିଗ୍ରୀ ସେଲସିୟସ୍ ଯାଏଁ ଖସିଛି । ସାରା ରାଜ୍ୟକୁ ଶୀତ ଲହରି ଅସ୍ତବ୍ୟସ୍ତ କରୁଥିବା ବେଳେ ଦକ୍ଷିଣ ଓ ପଶ୍ଚିମରେ ଅନୁଭୂତ ହେଉଛି ଅସହ୍ୟ ଜାଡ଼।

ସେହିପରି ଆଗାମୀ ୫ ଦିନ ପର୍ଯ୍ୟନ୍ତ ବିଭିନ୍ନ ସ୍ଥାନରେ କୁହୁଡ଼ି ଲାଗିରହିବ ବୋଲି ଆକଳନ କରିଛି ପାଣିପାଗ କେନ୍ଦ୍ର। ଆଜି ସୁନ୍ଦରଗଡ଼, ସମ୍ବଲପୁର, ଅନୁଗୁଳ, ଢେଙ୍କାନାଳ, କଳାହାଣ୍ଡି, କନ୍ଧମାଳ ଏବଂ ନୟାଗଡ଼ ଜିଲ୍ଲାରେ ସକାଳ ସମୟରେ ଘନ କୁହୁଡ଼ି ହେବାର ସମ୍ଭାବନା ରହିଛି।