ଭୁବନେଶ୍ୱର:  ରାଜ୍ୟରେ ଡହ ଡହ ଖରା ସହ କଲବଲ୍ କରୁଛି ତାତି। ଗତ ୩ରୁ ୪ ଦିନ ତାତି ସାମାନ୍ୟ କମ୍ ଥିବାବେଳେ ସୋମବାର ଠାରୁ ପୁଣି ତାତି ବଢିଛି । ୧୩ ଓ ୧୪ ତାରିଖ ଦୁଇ ଦିନ ହିଟୱେଭ୍ ଜାରି କରିଛି ପାଣିପାଗ ବିଭାଗ । ପଶ୍ଚିମ ଓଡ଼ିଶା, ଆଭ୍ୟନ୍ତରୀଣ ଓଡ଼ିଶାରେ ଅସ୍ତବ୍ୟସ୍ତ କରିବ ତାତି । ୬ଟି ଜିଲ୍ଲା ସମ୍ବଲପୁର, କଳାହାଣ୍ଡି ,ଝାରସୁଗୁଡା, ବଲାଙ୍ଗୀର, ବୌଦ୍ଧ ଓ ସୋନପୁରକୁ ସତର୍କ ସୂଚନା ସହ ୟେଲୋ ୱାର୍ଣ୍ଣିଂ ଜାରି ହୋଇଛି ।

ଏହି ଜିଲ୍ଲା ମାନଙ୍କରେ ତାପମାତ୍ରା ୪୦ ଡିଗ୍ରୀ ଅତିକ୍ରମ କରିପାରେ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର । ୫ ଦିନ ଭିତରେ ୩ରୁ ୪ ଡିଗ୍ରୀ ତାପମାତ୍ରା ବୃଦ୍ଧି ପାଇବ । ଖରାର ପ୍ରକୋପ ଅଧିକ ରହିବା ସମ୍ଭାବନା ଥିବାରୁ ବାହାରକୁ ଗଲେ ସାଙ୍ଗରେ ପାଣି ବୋତଲ ନେବା ସହ ପଗଡି ଭିଡିବା, ଛତା ଧରି ଯିବା ଓ ସୂତା କପଡା ପରିଧାନ ସହ ଖରାରୁ ବର୍ତ୍ତିବା ପାଇଁ ଆବଶ୍ୟକ ସତର୍କତା ଅବଲମ୍ବନ ପାଇଁ ପରାମର୍ଶ ଦେଇଛି ପାଣିପାଗ ବିଭାଗ । ରାଜ୍ୟରେ ଏବେଠାରୁ ଏତେ ମାତ୍ରାରେ ତାତି ଅନୁଭୂତ ହେଲାଣି ଯେ, ଦିନ ୮ଟାରୁ ଆଉ ବାହାରକୁ ଯିବାକୁ ମନବଳାଉନାହାନ୍ତି ଲୋକେ। ସତର୍କ ରୁହନ୍ତୁ, ଯଦି ସେମିତି କିଛି କାମ ନାହିଁ, ତେବେ ବାହାରକୁ କମ୍‌ ଯାଆନ୍ତୁ।