ରାଜ୍ୟରେ ଥିବା ବିଭିନ୍ନ ମଠ ମନ୍ଦିରର ଉନ୍ନତିକରଣ କରିବା ପାଇଁ ପୂର୍ବ ସରକାର ଘୋଷଣା କରିବା ସହ କାର୍ଯ୍ୟ ଆରମ୍ଭ କରିଥିଲେ । ଏହି କ୍ରମରେ ୨୦୨୨ରେ ଓଡ଼ିଶାର ପ୍ରସିଦ୍ଧ ଶକ୍ତିପୀଠ ମା କଟକ ଚଣ୍ଡୀଙ୍କ ମନ୍ଦିରର ସମ୍ପ୍ରସାରଣ କାର୍ଯ୍ୟ ପାଇଁ ୭୦ କୋଟି ଟଙ୍କା ବ୍ୟୟ ବରାଦ କରି କାର୍ଯ୍ୟ ଆରମ୍ଭ କରିଥିଲେ । ନିର୍ମାଣ ଦାୟିତ୍ଵ ଓବିସିସିକୁ ଦିଆଯାଇଥିଲା । ଏମିତିକି ୨୦୨୩ ଅକ୍ଟୋବର ସୁଦ୍ଧା ସମ୍ପୂର୍ଣ୍ଣ କାମ ସାରିବା ପାଇଁ ଦିନ ଧାର୍ଯ୍ୟ ହୋଇଥିଲା ।

ହେଲେ ଏବେ ସୁଦ୍ଧା ସାରିପାରିଲା ନାହିଁ କାମ । ୫୦ ପ୍ରତିଶତ କାର୍ଯ୍ୟ ବାକି ରହିଥିବା ବେଳେ କାର୍ଯ୍ୟରେ କୌଣସି ଅଗ୍ରଗତି ଦେଖାଯାଉନାହିଁ । ବର୍ଷା ହେଲେ ମନ୍ଦିରରେ ପାଣି ପଶୁଛି । ଡ୍ରେନେଜ ବ୍ୟବସ୍ଥା କି ଗାଡି ପାର୍କିଂ ବ୍ୟବସ୍ଥା ନାହିଁ । ଉନ୍ନତିକରଣ କାର୍ଯ୍ୟରେ ବିଳମ୍ବକୁ ନେଇ ଅସନ୍ତୋଷ ପ୍ରକାଶ କରିବା ସହ ଆଗମୀ ଦିନରେ ଏନେଇ ଚଣ୍ଡୀ ମନ୍ଦିର ସୁରକ୍ଷା କମିଟି କୋର୍ଟଙ୍କ ଦ୍ୱାରସ୍ତ ହେବେ ବୋଲି ଚେତାବନୀ ଦେଇଛି ।

ସମ୍ବଲପୁରର ସମଲେଶ୍ୱରୀ ମନ୍ଦିର, ଗଞ୍ଜାମର ତାରାତାରିଣୀ ପୀଠ, ବ୍ରହ୍ମପୁରର ବୁଢ଼ୀ ଠାକୁରାଣୀଙ୍କ ପୀଠର ଉନ୍ନତିମୂଳକ ପ୍ରକଳ୍ପ କାର୍ଯ୍ୟ ବର୍ଷେ ଦେଢ଼ ବର୍ଷ ଭିତରେ ଶେଷ ହୋଇଥିବା ବେଳେ ମା କଟକ ଚଣ୍ଡୀ ମନ୍ଦିରର କାର୍ଯ୍ୟ ୩ ବର୍ଷ ହେବ କାହିଁକି ଶେଷ ହୋଇ ପାରୁନାହିଁ ବୋଲି ପ୍ରଶ୍ନ ଉଠୁଛି ।

ସେପଟେ ଜିଲ୍ଲାପାଳ କହିଛନ୍ତି, ମନ୍ଦିର କାର୍ଯ୍ୟର ସମୀକ୍ଷା କରାଯାଇ ତ୍ୱରିତ ବେଗରେ କାର୍ଯ୍ୟ କରାଯାଉଛି । ପଥର ନଆସି ପରିବାରୁ କିଛି ଦିନ କାମ ବିଳମ୍ବ ହୋଇଛି । ଚଳିତ ବର୍ଷ ଡିସେମ୍ବର ଶେଷ ସୁଦ୍ଧା ସମ୍ପୂର୍ଣ୍ଣ କାର୍ଯ୍ୟ ଶେଷ କରାଯିବା ପାଇଁ ଲକ୍ଷ୍ୟ ରଖାଯାଇଛି।

ପୂର୍ବ ସରକାର ସମୟରେ ମନ୍ଦିର କାମରେ ବିଳମ୍ବ ହୋଇଛି । ଏବେ ନୂଆ ସରକାର ଆସିବା ପରେ ମନ୍ଦିର କାମ ତ୍ୱରିତ ବେଗରେ କରିବା ପାଇଁ ସରକାରଙ୍କୁ ନିବେଦନ କରିଛନ୍ତି କଟକ ବସିନ୍ଦା ।

Argus News | argus news | -Argusnews Home: Odisha Latest News, Breaking News, Trending News, Live TV and more