ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ଭଦ୍ରକ ଆଖୁଆପଦା ଆନିକଟଠାରେ ଫୁଲୁଛି ବୈତରଣୀ । ଚଳିତ ବର୍ଷ ତୃତୀୟ ଥର ଆସିଛି ବନ୍ୟା । ଭଣ୍ଡାରିପୋଖୀରରେ ଅନେକ ଗାଁ ଓ ଚାଷ ଜମିରେ ବନ୍ୟା ଜଳ ପଶିଥିବାବେଳେ ରାସ୍ତା ଧୋଇ ଯାଇଛି । ଆନନ୍ଦପୁର ଭାୟା ଦାଣ୍ଡକୂଳ ହୋଇ ଯାଜପୁର ଜିଲ୍ଲାକୁ ସଂଯୋଗ କରୁଥିବା ମୁଖ୍ୟ ରାସ୍ତାର ମହାଦେବ ମନ୍ଦିର ନିକଟରେ ଥିବା କଲଭର୍ଟ ପୋଲ ଭୁଶୁଡ଼ି ପଡିଛି । ଫଳରେ ଭଣ୍ଡାରିପୋଖରୀ ଆନନ୍ଦପୁରରୁ, ଦାଣ୍ଡକୁଳ ବଲ୍ଲଭୀଘାଟକୁ ଯୋଗାଯୋଗ ସମ୍ପୂର୍ଣ୍ଣ ବିଚ୍ଛିନ୍ନ ହୋଇଛି । ସେହିପରି ଧାମନଗର ବ୍ଲକ ଖଡ଼ିପଦା ଓ ପଧାନୀ ପଞ୍ଚାୟତର ଶହ ଶହ ଲୋକ ଜଳବନ୍ଦୀ ଅବସ୍ଥାରେ । ସଇଲଠାରେ କୋଚିଳା ନଦୀର ଡାହାଣ ପାଖ ବନ୍ଧ ଧସିଛି । ସ୍କୁଲ ଘର, ବାତ୍ୟା ଆଶ୍ରୟସ୍ଥଳ ଓ ସରକାରୀ କୋଠାରେ ଅସ୍ଥାୟୀ ଭାବେ ଆଶ୍ରୟ ନେଇଛନ୍ତି ବନ୍ୟା ବିପନ୍ନ ।

ପ୍ରବଳ ବର୍ଷା ଯୋଗୁଁ ରାଜଘାଟ ଠାରେ ସୁବର୍ଣ୍ଣରେଖା ନଦୀରେ ବିପଦ ସଙ୍କେତ ଉପରେ ଜଳ ପ୍ରବାହିତ ହେଉଛି । ବାଲିଆପାଳ, ଜଳେଶ୍ବର ଏବଂ ଭୋଗରାଇ ବ୍ଲକର ଶତାଧିକ ଗାଁ ଜଳମଗ୍ନ ହୋଇଛି । ବାଲିଆପାଳର ୪ଟି ପଞ୍ଚାଯତ ବାହ୍ୟ ଜଗତରୁ ସମ୍ପୂର୍ଣ୍ଣ ବିଚ୍ଛିନ୍ନ । ହେକ୍ଟର ହେକ୍ଟର ଚାଷ ଜମି ଜଳ ଘେରରେ । ସେପଟେ କାଂଶବାଂଶ ନଦୀରେ ଖଇରା ଅଞ୍ଚଳର ଜଣେ ବୃଦ୍ଧା ଭାସି ଯାଇ ନିଖୋଜ ଥିବାବେଳେ ଅଗ୍ନିଶମ ବାହିନୀ ଦ୍ୱାରା ସନ୍ଧାନ ଜାରି ରହିଛି । ଗଙ୍ଗାହାର ଓ ପ୍ରଶନ୍ନ ନଦୀରେ ଜଳସ୍ତର ବୃଦ୍ଧି ପାଇ ରେମୁଣା ବଡପାଳ ପଞ୍ଚାୟତର ଝାମ୍ପୁରା ଗାଁରେ ପାଣି ପଶିଛି । ଚାଷ ଜମିରେ ୪ ଫୁଟ ଉଚ୍ଚର ପାଣି ଲହଡି ମାରୁଛି । ତିନୋଟି ଘର ସମ୍ପୂର୍ଣ୍ଣ ପାଣି ଘେରରେ ଥିବାବେଳେ ପ୍ରଶାସନ ପକ୍ଷରୁ ୧୨ ଜଣଙ୍କୁ ଉଦ୍ଧାର କରାଯାଇଛି । ଅନ୍ୟପଟେ ଶିମିଳିପାଳ ଉପର ମୁଣ୍ଡରେ ଲଗାଣ ବର୍ଷା ଯୋଗୁଁ କପ୍ତିପଦା ବ୍ଲକ ଅଧୀନରେ ଥିବା କାଳ ଡ୍ୟାମରେ ଜଳସ୍ତର ବୃଦ୍ଧି ପାଇବାରେ ଲାଗିଥିବାରୁ ଡ୍ୟାମ କର୍ତ୍ତୃପକ୍ଷ ଗୋଟିଏ ଗେଟ ଖୋଲିଛନ୍ତି । ସ୍ଥିତି ଦେଖି ଅନ୍ୟ ଆଗକୁ ଗେଟ୍ ।

ପ୍ରବଳ ବର୍ଷାରେ ବେହାଲ୍ କେନ୍ଦୁଝର ଜିଲ୍ଲା । କାଞ୍ଜିପାଣି ଘାଟି ଓ ଜୁଡିଆ ଘାଟିରେ ଖସିଲା ଅତଡ଼ା ।୪୯ ନଂ ଏନଏଚ୍ ଜୁଡ଼ିଆ ଘାଟି ରାସ୍ତା ଉପରେ ପଥର ଖସି ଯାତାୟାତ ବାଧାପ୍ରାପ୍ତ । ସେହିପରି କାଞ୍ଜିପାଣି ଘାଟିରେ ମଧ୍ୟ ଉପରୁ ପଥର ଓ ମାଟି ଖସି ଗୋଟିଏ ପଟ ରାସ୍ତା ଅବରୋଧ ହୋଇଛି । ଲଗାଣ ବର୍ଷା ଦ୍ୱାରା କେନ୍ଦୁଝରଗଡ଼ ପୌରପାଳିକାର ସ୍ପଞ୍ଜ କଲୋନୀ, ଗ୍ରାମଶ୍ରୀ କଲୋନୀ ଆଦିରେ ପାଣି ଜମି ରହିଛି ।ରାଜ୍ୟରେ ଆସନ୍ତା ୨୯ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ସମ୍ଭାବନା । ଆଗାମୀ ୨୪ ଘଣ୍ଟା ପାଇଁ ୨୦ ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି । ଆସନ୍ତାକାଲି ପ୍ରବଳରୁ ଅତି ପ୍ରବଳ ବର୍ଷା ପାଇଁ କେନ୍ଦ୍ରାପଡ଼ା, ଜଗତସିଂହପୁରକୁ ଅରେଞ୍ଜ ଓ ବାକି ସବୁ ଜିଲ୍ଲାକୁ ୟେଲୋ ଆଲର୍ଟ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଆଗକୁ ଆସୁଛି ଆଉ ଏକ ଲଘୁଚାପ । ଜଳସଂପଦ ସର୍ବୋଚ୍ଚ ଯନ୍ତ୍ରୀ କହିଲେ- ସୁବର୍ଣ୍ଣରେଖା ଓ ବୈତରଣୀ ନଦୀରେ ବନ୍ୟା ଆସିଛି । ରାଜ୍ୟର ଅନ୍ୟ କୌଣସି ନଦୀରେ ବନ୍ୟା ସ୍ଥିତି ନାହିଁ । ବର୍ତ୍ତମାନ ହୀରାକୁଦର ୧୨ଟି ଗେଟ୍ ଦେଇ ଜଳ ନିଷ୍କାସନ ହେଉଛି ।