ପ୍ରବଳ ବର୍ଷାରେ ଉବୁଟୁବୁ ମାଲକାନଗିରି । ବାୟାପଡା ଘାଟିରେ ପାହାଡ ଧସିଥିବା ବେଳେ କୋରୁକୋଣ୍ଡା ନାକାମାମୁଡ଼ି ପଞ୍ଚାୟତର ୧୮ରୁ ଅଧିକ ଗାଁ ପାଣି ଘେରରେ । କନ୍ୟାଶ୍ରମ ପୋଲ ବୁଡ଼ି ପଡିଆ ଓ କାଲିମେଳା ମଧ୍ୟରେ ଯୋଗାଯୋଗ ବିଚ୍ଛିନ୍ନ ହୋଇଛି । ପୋଲ ଉପରେ ୨ ଫୁଟ ଉଚ୍ଚର ବନ୍ୟାପାଣି ପ୍ରବାହିତ ହେଉଛି ।

ବୌଦ୍ଧ ଜିଲ୍ଲା କଣ୍ଟାମାଳରେ ଗତକାଲିଠୁ ଲଘୁଚାପ ଜନିତ ବର୍ଷା ଲାଗି ରହିଛି । ଫଳରେ ବିଭିନ୍ନ ରାସ୍ତା ଉପରେ ପାଣି ଚାଲୁଛି I ଟୁନି ମୁଣ୍ଡା ମେହେରୁନି ବ୍ରିଜରେ ୩ ଫୁଟ ପାଣି ପ୍ରଭାବିତ ହୋଇଛି । ୨ଟି ପଞ୍ଚୟତ ଦପଳା ଓ ଲମ୍ବେସ୍ୱରୀରୁ ପଲସାଗୋରା ଯାତାୟାତ ଠପ୍ ହୋଇଯାଇଛି I

ସେହିପରି ସୁବର୍ଣ୍ଣପୁର ଜିଲ୍ଲା ବିନିକା ଶିଶୁମନ୍ଦିର -ନୁଆଁପାଲି ରାସ୍ତାରେ ଉପୁଡିଲା ୪ଟି ବିଦ୍ୟୁତ ଖୁଣ୍ଟ l ଫଳରେ ନୁଆଁପାଲି, ଜବଦା, ଦାନୀପାଲି, ସହୁଳପୁର ସହ ବିନିକା ସହରର ଅନେକାଂଶରେ ବିଦ୍ୟୁତ ସରବରାହ ବନ୍ଦ ରହିଛି l 

ମୟୂରଭଞ୍ଜରେ ତୁହାକୁ ତୁହା ବର୍ଷା ଲାଗି ରହିଥିବାବେଳେ ଆଜି ପାଇଁ ସମସ୍ତ ସ୍କୁଲ ବନ୍ଦ ରହିଥିଲା । ପ୍ରଶାସନ ପକ୍ଷରୁ କଣ୍ଟ୍ରୋଲ ରୁମ୍ ଖୋଲାଯିବା ସହ ବାତ୍ୟା ଆଶ୍ରୟସ୍ଥଳୀ ଖୋଲାଯାଇଛି । ସହାୟତା ପାଇଁ ଅଗ୍ନିଶମ ଓ ଓଡ୍ରାଫ ଟିମ୍ ପ୍ରସ୍ତୁତ ଥିବା କହିଛନ୍ତି ଅତିରିକ୍ତ ଜିଲାପାଳ ନେତ୍ରାନନ୍ଦ ମଲ୍ଲିକ ।

ରାଜ୍ୟରେ ଆସନ୍ତା ୨୯ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ନେଇ ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଅବପାତରେ ପରିଣତ ହୋଇଛି ଲଘୁଚାପ । ପ୍ରଭାବରେ ଆସନ୍ତା ୨୪ ଘଣ୍ଟାରେ ବିଜୁଳି ଘଡ଼ଘଡ଼ି ବର୍ଷା ପାଇଁ କେନ୍ଦୁଝର, ମୟୁରଭଞ୍ଜ ଜିଲ୍ଲାକୁ ରେଡ ଆଲର୍ଟ ଜାରି ହୋଇଛି। ଏଥିସହ ସୁନ୍ଦରଗଡ଼, ଝାରସୁଗୁଡା, ସମ୍ବଲପୁର, ଦେଓଗଡ଼, ଅନୁଗୁଳ, ଢେଙ୍କାନାଳ, ଯାଜପୁର, କେନ୍ଦ୍ରାପଡ଼ା, ବାଲେଶ୍ଵର, ଭଦ୍ରକକୁ ଅରେଞ୍ଜ ୱାର୍ଣ୍ଣିଂ ଜାରି ହୋଇଛି । ବାକି ୧୮ ଜିଲ୍ଲାକୁ ୟେଲୋ ୱାର୍ଣ୍ଣିଂ । ୫ ଦିନ ଯାଏ ମତ୍ସ୍ୟଜୀବୀଙ୍କୁ ସମୁଦ୍ର ମନା । ସେପଟେ ବର୍ଷା ଯୋଗୁଁ ତଳିଆ ଅଞ୍ଚଳରେ ଅଧିକ ପାଣି ଜମିବା ନେଇ ସତର୍କ କରାଇଛି ଜଳସମ୍ପଦ ବିଭାଗ ।

ହୀରାକୁଦ ଜଳଭଣ୍ଡାର ୨୦ଟି ଗେଟ୍ ଦେଇ ବନ୍ୟାଜଳ ନିଷ୍କାସନ ହେଉଛି । ଜଳଭଣ୍ଡାରର ଜଳସ୍ତର କ୍ଷମତା ୬୩୦ ଥିବାବେଳେ ବର୍ତ୍ତମାନ ଜଳସ୍ତର ୬୦୯.୩୯ ଫୁଟ୍ ରହିଛି । ଆଗକୁ ସ୍ଥିତି ଦେଖି ଆହୁରି ଗେଟ୍ ଖୋଲାଯାଇପାରେ ।