ଅନ୍ଧ ଶିକ୍ଷକ ଭାସ୍କର ସାର । ବୟସ ପାଖାପାଖି ୭୦ ହେବାକୁ ବସିଲାଣି । ଦେହ ହାତ ଝାଉଁଳି ଗଲାଣି । ହେଲେ ଘର ଆଗରେ ରାତି ପାହିଲେ ଛାତ୍ରଛାତ୍ରୀଙ୍କ ଭିଡ଼ । ଗଣିତ ହେଉ ବା ଇଂରାଜି କିମ୍ବା ସାହିତ୍ୟ ହେଉ ଅବା ଚିତ୍ରାଙ୍କନ । ସବୁକୁ ସହଜ ଓ ସରଳ ଭାବରେ ପିଲାଙ୍କୁ ବୁଝାଇଥାନ୍ତି। ଭଦ୍ରକ ବାସୁଦେବପୁର ବ୍ଲକର ଲୁଙ୍ଗା ପଞ୍ଚାୟତର ନୂଆସାହି ଗାଁର ଭାସ୍କର ସାର । ଭାସ୍କର ସାର ଜିଲ୍ଲାର ଜଣେ ଆଦର୍ଶ ଶିକ୍ଷକ ଭାବେ ପରିଚିତ । ଦୃଷ୍ଟିହୀନ ହେଲେ ବି ତାଙ୍କ ଠାରୁ ଛାତ୍ରଛାତ୍ରୀ ମାନେ ପାଠ ପଢି ବହୁ ଉଚ୍ଚ ପଦ ପଦବୀରେ ଅବସ୍ଥାପିତ ହେଇଛନ୍ତି ।

ଆଖିରେ କଳା ଚଷମା, ଆଉ ହାତରେ ଆଶାବାଡି । ସାଧାରଣ ଲୋକଟିଏ ଦେଖିଲେ ଆଶ୍ଚର୍ଯ୍ୟ ହେବ ନିଶ୍ଚିତ । ଏତେ ଗୁଡିଏ ପିଲାଙ୍କୁ ସେ କିପରି ପାଠ ପଢ଼ାଉଛନ୍ତି । ଯୁକ୍ତ ୨ପଢୁଥିବା ସମୟରେ ଆଖିରେ ପ୍ରଭାବ ପଡିବା ପରେ କଲେଜର ଅଧ୍ୟାପକ ବିଜ୍ଞାନ ପଢିବାକୁ ମନା କରିଦେଲେ । ପରେ ବିଜେପି କଲେଜରେ ବିକମ୍ ପଢ଼ୁଥିବା ସମୟରେ ଦୁଇ ଆଖିକୁ ଭଲ ଭାବରେ ଦେଖାଗଲା ନାହିଁ । ଫଳରେ ଅର୍ଥ ଅଭାବରୁ ଚିକିତ୍ସା କରି ନପାରି ପାଠ ପଢା ବନ୍ଦ କରି ଘରେ ରହିଲେ ।

ଆଉ ସେତେବେଳେ ବୁଢା ବାପା ମା ଓ ନିଜେ ଚଳିବା ପାଇଁ ଏକମାତ୍ର ଭରଷା ପାଲଟିଲା ଘରୋଇ ଟିଉସନ । ନିଜର ପଢ଼ାଇବା ଶୈଳୀ ଓ ପିଲା ମାନଙ୍କୁ ସ୍ନେହ ଆଦରରେ ସରଳ କରି ଏପରି ପାଠ ପଢ଼ାଇଲେ ଯେ ସରକାରୀ ବିଦ୍ୟାଳୟର ତାଲିମ ପ୍ରାପ୍ତ ଶିକ୍ଷକଙ୍କ ଠାରୁ ପିଲାମାନେ ଭାସ୍କର ସାରଙ୍କ ନିକଟକୁ ଆସିଲେ। ଜୀବନର ଏକମାତ୍ର ଲକ୍ଷ ମେଧାବୀ ଛାତ୍ର ତିଆରି କରିବା । ତେବେ ଗୁରୁଦିବସ ଭଳି ଦିନରେ ସେଭଳି ଶିକ୍ଷକଙ୍କୁ ଶତ ଶତ ପ୍ରଣାମ ।