କୋରାପୁଟ: ଶୀତୁଆ ସକାଳରେ କୁହୁଡିର ପତଳା ଚାଦର । ସବୁଆଡେ କେବଳ ନୀଳ ଆକାଶ । ଆଉ ଏହାରି ମଧ୍ୟରେ ଆଖି ଜୁଆଡେ ବୁଲେଇଲେ ଦେଖିବାକୁ ମିଳୁଛି ସବୁଜିମାରେ ଭରା ପାହାଡ । ଆଉ ସବୁଜିମାର ଏହି ପାହାଡ ମଝିରେ ଅଳସୀ ଫୁଲର ଅପୂର୍ବ ସମ୍ଭାର । ବର୍ଷା ଛାଡିବା ପରେ କୋରାପୁଟକୁ ହୋଇଛି ଶୀତର ଆଗମନ । ଶୀତର ଆଗମନରେ କୋରାପୁଟର ପ୍ରାକୃତିକ ସୌନ୍ଦର୍ଯ୍ୟ ହୋଇଛି ଆକର୍ଷଣୀୟ ଓ ଆନମନା ।

ଯାହାକି କୋରାପୁଟର ପ୍ରାକୃତିକ ସୌନ୍ଦର୍ଯ୍ୟକୁ କରୁଛି ଅଧିକ ମନଲୋଭା । ଅଳସୀ ଫୁଲରେ ସୂର୍ଯ୍ୟଙ୍କ ପହିଲି କିରଣ ପୁରା ପରିବେଶକୁ ମତୁଆଲା କରୁଛି । ଲାଗୁଛି ସତେ ଯେମିତି ଏକର ଏକର ଏହି ଅଳସୀ ଫୁଲ ରୁପରେ ପ୍ରକୃତି ରାଣୀ ସୁନାର ଓଢଣୀ ମେଲି ବସିଛି । ଆଉ ପବନର ଟିକିଏ ସ୍ପର୍ଶ ଏହି ଫୁଲର ମହକକୁ ଚାରି ଆଡି ମହକିତ କରୁଛି । ପ୍ରକୃତିର ଏହି ଅପୂର୍ବ ସୌନ୍ଦର୍ଯ୍ୟ ପ୍ରେମିକ ପ୍ରେମିକାଙ୍କୁ ରୋମାଞ୍ଚିତ କରୁଛି । ଆଉ ପର୍ଯ୍ୟଟକଙ୍କୁ ବିଭୋର ବି କରୁଛି । ବର୍ଷା ଛାଡି ଶୀତ ଆସିବା ପରେ ଏହା ହେଉଛି କୋରାପୁଟର ପ୍ରାକୃତିକ ସୌନ୍ଦର୍ଯ୍ୟର ଦୃଶ୍ୟ । ଆଉ ଅଳସୀ ଫୁଲର ସୌନ୍ଦର୍ଯ୍ୟରେ ବିଭୋର ହେବା ପାଇଁ ଏବେ ଜିଲ୍ଲାରେ ଧୀରେ ଧୀରେ ଲାଗିଛି ପର୍ଯ୍ୟଟକଙ୍କ ଭିଡ । କିଏ ଅଳସୀ ଫୁଲର ଖେତରେ ସେଲ୍ପି ନେଇ ସ୍ମୃତି ସାଇତି ରଖୁଛି ତ ଆଉ କିଏ ଏହାର ମହକକୁ ଉପଭୋଗ କରୁଛି ।

ସେପଟେ ଶୀତ ଦିନ ରେ ନିଜକୁ ସତେଜ ରଖିବା ପାଇଁ ପ୍ରାତଃ ଭ୍ରମଣ ସାଙ୍ଗକୁ ବ୍ୟାୟାମଶାଳାରେ ବି ଭିଡ ଜମୁଛି । ସେପଟେ ଶ୍ରମିକ ଓ ମଜୁରିଆମାନେ ନିଜ କର୍ମ ପାଇଁ ଭୋରରୁ ସକାଳୁ ବାହାରି ପଡନ୍ତି । ଶୀତ ଦିନେ କୁହୁଡି ସାଙ୍ଗକୁ ଅଳସୀ ଫୁଲର ମହକ ପୁରା ପରିବେଶକୁ ଆନମନା କରିଥାଏ । ଆଉ ଏହି ପ୍ରାକୃତିକ ସୌନ୍ଦର୍ଯ୍ୟ କିଛି ଲେଖିବାକୁ କବି ଓ ଲେଖକଙ୍କୁ ପ୍ରେରଣା ଦେଇଥାଏ । ମନରେ ଉନ୍ମାଦ ଭରିଥାଏ । କଳାକାର ଟିଏ ପାଇଁ ନୂଆଁ କିଛି ଚିନ୍ତା କରିବାର ବାଟ ଫିଟାଇଥାଏ । ଆଉ ସେଇଥି ପାଇଁ ତ ଏହି ଅଳସୀ ଫୁଲ କୋରାପୁଟର ପ୍ରାକୃତିକ ସୌନ୍ଦର୍ଯ୍ୟର ଅନ୍ୟତମ ସ୍ରୋତ ।

ଶୀତ ଦାଉରୁ ନିଜକୁ ସତେଜ ପାଇଁ ନିଆ ଜାଳି ବସନ୍ତି । ଆଉ ଚା' ପିଇ ନିଜକୁ ସତେଜ କରି ଚାଲି ଯାଆନ୍ତି କର୍ମ କ୍ଷେତ୍ରକୁ । କୋରାପୁଟ ହେଉଛି ଓଡିଶାର ଭୂସ୍ବର୍ଗ । କେହି କେହି ଏହାକୁ ଓଡିଶାର କାଶ୍ମୀର ବୋଲି ବି କୁହନ୍ତି । କୋରାପୁଟର ପ୍ରାକୃତିକ ସୌନ୍ଦର୍ଯ୍ୟ ଓ ପରିବେଶ ବର୍ଷ ସାରା ଏଠାକୁ ପର୍ଯ୍ୟଟକଙ୍କୁ ଆକର୍ଷିତ କରିଥାଏ । ତେବେ ଦର୍ଶକ ବନ୍ଧୁ ଆପଣଙ୍କୁ ଯଦି ସମୟ ମିଳୁଛି ତେବେ ଥରୁଟେ କୋରାପୁଟର ଏହି ଅପୂର୍ବ ସୌନ୍ଦର୍ଯ୍ୟକୁ ମନଭରି ଉପଭୋଗ କରିଆସନ୍ତୁ ।

Argus News | argus news | Odisha Latest News, Breaking News, Trending News, Live TV