ଘର କାମ ସାରି ସାନ ଝିଅକୁ ଶୁଆଇ ଦେଇ ବଡ ଝିଅକୁ ଧରି ସ୍କୁଲ ଛାଡିବାକୁ ବାହାରି ପଡିଲେ ପ୍ରବିଣା । ସ୍ଵାମୀ ଯେହେତୁ ସଅଳ ଡିଉଟି ଚାଲିଯାଆନ୍ତି, ସେଥିପାଇଁ ଏଇଟା ତାଙ୍କର ନିତିଦିନିଆ କାମ । ୪ ପ୍ରାଣୀଙ୍କୁ ନେଇ ସଂସାରଟି ଖୁବ ଖୁସିରେ ଚାଲିଯାଏ । ଝିଅର ସ୍କୁଲ କାଳେ ଲେଟ ନହୋଇଯିବ ବୋଲି ତର ତର ହୋଇ କାମ ସାରି ଝିଅକୁ ଧରି ବାହାରି ପଡିଲେ ସ୍କୁଟିରେ।

ହେଲେ ସବୁ ଦିନ ସମାନ ନଥାଏ । କି ସବୁ ସମୟ ବି ସମାନ ନଥାଏ । ମୁଣ୍ଡରେ ହେଲମେଟ୍ ଆଉ ହାତରେ ଝିଅର ସ୍କୁଲ୍ ବ୍ୟାଗ୍।

ହେଲେ ଦଇବ ବୋଧେ ଏ ହସଖୁସି ସହି ପାରିଲାନି...ସେଥିପାଇଁ ଦେଖୁ ନାହାନ୍ତି...ଏଇ କିଛି ସମୟ ପୂର୍ବରୁ ଝିଅକୁ ସ୍କୁଲ ଛାଡିବାକୁ ଯାଉଥିବା ମା ଟା କେମିତି ମୁହଁ ମାଡି ଏହି ଟ୍ରକ ଚକା ତଳେ ଚାପି ହୋଇଯାଇଛି । ହେଲମେଟ୍ ମୁଣ୍ଡରେ ଅଛି । ଆଗରେ ଝିଅର ସ୍କୁଲ ବ୍ୟାଗ୍ । ହେଲେ ସେ ସବୁଦିନ ପାଇଁ ଶୋଇଯାଇଛନ୍ତି । ଏମିତି ଜାଗାକୁ ଚାଲି ଯାଇଛନ୍ତି ଯେ ଆଉ କେବେ ବି ଆସିବେନି । ଝିଅ ମା' ମା' ଚିତ୍କାର କଲା ବେଳକୁ ମା' ବା ଶୁଣିବ କେମିତି । ଗୋଡରୁ ଅଣ୍ଟା ପର୍ଯ୍ୟନ୍ତ ଟ୍ରକ୍ ତାଙ୍କୁ ଏମିତି ଚାପି ଦେଇଛି ଯେ, ସେଇଠି ହିଁ ତାଙ୍କ ଜୀବନ ଚାଲିଯାଇଛି ।

ଏ ହୃଦୟ ବିଦାରକ ଦୃଶ୍ୟ ଆଜି ସକାଳୁ ପୁରା ତାଳଚେର ବାସିନ୍ଦାଙ୍କୁ ଦୋହଲାଇ ଦେଇଛନ୍ତି । ଯିଏ ଦେଖୁଛି ତା ଆଖିରୁ ଲୁହ ରହୁନି । ସମସ୍ତଙ୍କ ମନରେ ସେଇ ଗୋଟିଏ ପ୍ରଶ୍ନ ହେ ଭଗବାନ ଏମିତି ମୃତ୍ୟୁ କାହିଁକି । କଣ ତାଙ୍କର ଭୂଲ୍ ଥିଲା ଯେ, ଛୋଟ ଛୋଟ ଛୁଆ ଗୁଡାଙ୍କୁ ମା ଛେଉଣ୍ଡ କରିଦେଲୁ ।

ଅନୁଗୋଳ ଜିଲ୍ଲା ତାଳଚେର ଦେଉଳବେଡା କଲୋନୀ ରାସ୍ତାରେ 42 ବର୍ଷୀୟ ପ୍ରବୀଣା ସାହୁ ଝିଅକୁ ସ୍କୁଲରେ ଛାଡିବାକୁ ଗଲାବେଳେ ହଠାତ୍ ଟ୍ରକ୍ ଧକ୍କାରେ ତାଙ୍କର ମୃତ୍ୟୁ ହୋଇଛି । ଆଉ 10 ବର୍ଷୀୟ ଏହି କୁନି ଝିଅର ଗୋଡ ଟ୍ରେକ ତଳେ ଚାପି ହୋଇ ଗୋଟେ ଗୋଡ ନଷ୍ଟ ହୋଇଯାଇଛି । ଝିଅଟି ଚତୁର୍ଥ ଶ୍ରେଣୀରେ ପଢୁଥିବାବେଳେ ମା ମା କାନ୍ଦରେ ଫାଟି ପଡୁଛି ପୁରା ଅଞ୍ଚଳ ।

ଆଉ ସବୁଠୁ ବଡ କଥା ସ୍ୱାମୀ ଘରେ ମା ଛୁଆକୁ ଛାଡି ଡ୍ୟୁଟି ଯାଇଥିବାବେଳେ ଏତେ ବଡ ଅଘଟଣ ଘଟିଯାଇଥିଲା । ତାଙ୍କୁ ଖବର ଦିଆଯିବା ପରେ ସେ ବି ଏହି ଖବର ପାଇ ପୁରା ହତବାକ୍ । ନା ତାଙ୍କ ପାଟିରୁ ଶବ୍ଦ ବାହାରୁଛି..ନା ସେ କିଛି ବୁଝିପାରୁଛନ୍ତି । କେଇଟା ମୁହୂର୍ତ୍ତରେ ତାଙ୍କର ପୁରା ସଂସାର ଉଜୁଡି ଯାଇଛି ।

ସେପଟେ ଏହି ଘଟଣାକୁ ନେଇ ଆନ୍ଦୋଳନରେ ବସିଛନ୍ତି ସ୍ଥାନୀୟ ଲୋକେ । ଏହି ଅଞ୍ଚଳରେ ଟ୍ରକ୍ ଯିବାକୁ ଅନୁମତି ନଥିବାବେଳେ କେମିତି ଅଚନକ ଟ୍ରକ୍ ଆସିଲା । ଏହାକୁ କିଏ ଚଲାଉଥିଲା । ଏହାର ତଦନ୍ତ କରାଯାଉ । ତା ସହ ମୃତକଙ୍କ ପରିବାରକୁ କ୍ଷତିପୂରଣ ଦାବି ନେଇ ଆନ୍ଦୋଳନରେ ବସିଛନ୍ତି ସ୍ଥାନୀୟ ଲୋକେ । ଘଟଣାସ୍ଥଳରେ ସ୍ଥାନୀୟ ପୋଲିସ ପହଂଚି ତଦନ୍ତ ଜାରିରଖିଛି।