Crime / ବ୍ୟାରେଜ ଉପରେ କାର ରଖି ଯୁବକ ନିଖୋଜ, ମିଳିଲା ସୁଇସାଇଡ୍ ନୋଟ୍‌

ବ୍ୟାରେଜ ଉପରେ କାର ରଖି ଯୁବକ ନିଖୋଜ । ମହାନଦୀକୁ ଡେଇଁ ପଡ଼ିଥିବା ଅନୁମାନ । ଯୁବକ ଜଣକ ଭୁବନେଶ୍ୱର ନୟାପଲ୍ଲୀ ଅଞ୍ଚଳର ଶକ୍ତିକାନ୍ତ ସାହୁ । ସ୍ଥାନୀୟ ଲୋକଙ୍କଠାରୁ ଖବର ପାଇ ବାରଙ୍ଗ ଅଗ୍ନିଶମ ବାହିନୀ ମହାନଦୀରେ ଖୋଜାଖୋଜି ଜାରି ରଖିଛି । ଯୁବକ ଜଣକ ମହାନଦୀକୁ ଡେଇଁଛନ୍ତି ନା ଆଉ କେଉଁ ଆଡେ ଚାଲି ଯାଇଛନ୍ତି ତାହା ଅସ୍ପଷ୍ଟ ରହିଛି । ସେପଟେ ବାରଙ୍ଗ ଥାନା ପୋଲିସ ଓ ଜୋନ ଏସିପି ଘଟଣାସ୍ଥଳରେ ପହଞ୍ଚି ପରିବାର ଲୋକଙ୍କ ସହ ଘଟଣା ବିଷୟରେ ପଚରାଉଚରା କରୁଛନ୍ତି । କାର ସହ କାରରୁ ଏକ ସୁଇସାଇଡ଼ ନୋଟ ଜବତ କରି ତଦନ୍ତ ଜାରି ରଖିଛନ୍ତି । ଅନ୍ୟପଟେ ମହାନଦୀକୁ ଡେଇଁ ଥିବା ସନ୍ଦେହ କରି ଅଗ୍ନିଶମ ବାହିନୀ ଏବଂ ଓଡ୍ରାଫର ଯବାନ ମାନେ ମହାନଦୀରେ ଖୋଜା ଖୋଜି ଜାରି ରଖିଛନ୍ତି ।

ସୂଚନାନୁଯାୟୀ କାର୍ ଭିତରେ ସୁଇସାଇଡ୍ ନୋଟ୍ । କିନ୍ତୁ ନାହାନ୍ତି ଯୁବକ । ମୁଣ୍ଡଳୀ ବ୍ୟାରେଜ ଛକରେ ଥୁଆହୋଇଛି କାର୍ । କିନ୍ତୁ ଯୁବକଙ୍କର ନାହିଁ ପତ୍ତା । କୁଆଡ଼େ ଗଲେ ଯୁବକ ? ମୁଣ୍ଡଳୀ ବ୍ୟାରେଜ ଛକରେ ଗାଡ଼ି ରଖି ମ ଡେଇଁପଡିଛନ୍ତି ନାଁ ଅନ୍ୟ କେଉଁଆଡ଼େ ପଳାଇଛନ୍ତି ? ଯୁବକଙ୍କୁ ପାଣି ଭିତରେ ଖୋଜୁଛି ଅଗ୍ନିଶମ ବାହିନୀ । କିନ୍ତୁ ମିଳିନି ତାଙ୍କ ପତ୍ତା । ନିଖୋଜ ଯୁବକ ଜଣକ ହେଉଛନ୍ତି ଶକ୍ତିକାନ୍ତ ସାହୁ । ତାଙ୍କ ଘର ଭୁବନେଶ୍ୱରରେ ବୋଲି ଜଣାପଡ଼ିଛି । ତେବେ ତାଙ୍କ ନିଖୋଜ ନେଇ ପରିବାର ଲୋକଙ୍କ ପକ୍ଷରୁ କିଛି ସୂଚନା ମିଳିନାହିଁ ।

ଗୁରୁବାର ରାତିରେ ମୁଣ୍ଡଳୀ ବ୍ୟାରେଜ ଛକରେ ଏକ କଳା ରଙ୍ଗର କାର୍ ଦୀର୍ଘ ସମୟ ଧରି ଥୁଆହୋଇ ରହିଥିଲା । ସେହି ସମୟରେ ଗୋଡ଼ିସାହି ଫାଣ୍ଡି ପୋଲିସ ସମ୍ପୃକ୍ତ ଅଞ୍ଚଳରେ ପାଟ୍ରୋଲିଂ କରୁଥିଲା । ପାଟ୍ରୋଲିଂ ବେଳେ କାର୍‌ଟି ରାସ୍ତା କଡ଼ରେ ଥୁଆହୋଇ ରହିଥିବା ଦେଖିବାକୁ ମିଳିଥିଲା । ତେବେ ଥୁଆହୋଇ ରହିଥିବା କାର୍‌ର ଡୋର୍ କିନ୍ତୁ ଲକ୍ ହୋଇନଥିଲା । ତେଣୁ ପୋଲିସ ଗାଡ଼ିଟିକୁ ତଲାସି କରିବାକୁ ଅଟକିଥିଲା । କାର୍‌ଟିକୁ ଯାଞ୍ଚ କରିବା ବେଳେ ସେଥିରୁ ଗୋଟିଏ ମୋବାଇଲ୍ ଓ ଏକ ସୁଇସାଇଡ୍ ନୋଟ୍ ଦେଖିବାକୁ ପାଇଥିଲା ।

ସୁଇସାଇଡ୍ ନୋଟ୍‌ରୁ ଯୁବକଙ୍କ ପରିବାର ସମ୍ପର୍କରେ ପୋଲିସ ଜାଣିବାକୁ ପାଇଥିଲା । ଏହାକୁ ଆଧାର କରି ପୋଲିସ ପରିବାର ଲୋକଙ୍କୁ ଘଟଣା ସମ୍ପର୍କରେ ଖବର ଦେଇଥିଲା । ଏହାସହ ପୋଲିସ ରାତିରେ ଆଖପାଖ ଅଞ୍ଚଳରେ ଖୋଜାଖୋଜି କରିଥିଲା । କିନ୍ତୁ ଯୁବକଙ୍କର କିଛି ପତ୍ତା ପାଇନଥିଲା ।

ଶୁକ୍ରବାର ସକାଳୁ ଘଟଣାସ୍ଥଳରେ ବାରଙ୍ଗ ଅଗ୍ନିଶମ ବାହିନୀ ପହଞ୍ଚିଥିଲା । ତେବେ ଯୁବକ ଜଣଙ୍କ କାର୍‌ ରଖି ମହାନଦୀକୁ ଡେଇଁପଡିଥିବା ସନ୍ଦେହ କରି ଖୋଜାଖୋଜି ଜାରି ରଖିଛି ଅଗ୍ନିଶମ ବାହିନୀ । ଖବର ଲେଖା ହେବା ପର୍ଯ୍ୟନ୍ତ ଯୁବକଙ୍କର କୌଣସି ପତ୍ତା ମିଳିନଥିବା ଜଣାପଡିଛି । ତେବେ କାହିଁକି ଯୁବକ ଜଣଙ୍କ ଏଭଳି ନୋଟ୍ ଲେଖିଛନ୍ତି ସେ ସମ୍ପର୍କରେ କିଛି ଜଣାପଡିନାହିଁ । ସେ ଆତ୍ମହତ୍ୟା ଉଦ୍ୟମ କରିଛନ୍ତି ନା ଅନ୍ୟ କେଉଁଆଡେ ପଳାଇ ଯାଇଛନ୍ତି ସେ ନେଇ ପୋଲିସ ତଦନ୍ତ ଆରମ୍ଭ କରିଛି ।

ଅଧିକ ପଢ଼ନ୍ତୁ ଓଡ଼ିଶା ଖବର...