ଅର୍ଗସ ବ୍ୟୁରୋ: ଦୁଷ୍କର୍ମକାରୀଙ୍କୁ ମୃତ୍ୟୁ ଦଣ୍ଡାଦେଶ । ନାବାଳିକାକୁ ଦୁଷ୍କର୍ମ ସହ ହତ୍ୟା ଅଭିଯୋଗରେ ଜଣେ ଯୁବକଙ୍କୁ ମୃତ୍ୟୁ ଦଣ୍ଡାଦେଶ ଦିଆଯାଇଛି । ମାମଲାର ୩୧ ଦିନ ଭିତରେ ତଦନ୍ତ ଶେଷ ହୋଇଥିଲା । ଏହାପରେ ଦୁଇମାସ ମଧ୍ୟରେ ପ୍ରକାଶ ପାଇଛି ରାୟ । ଅକ୍ଟୋବର ୫ରେ ପଶ୍ଚିମବଂଗର ୨୪ ପ୍ରଗଣା ଜିଲ୍ଲାରେ ୧୦ ବର୍ଷୀୟା ନାବାଳିକାକୁ ଜଣେ ଯୁବକ ଦୁଷ୍କର୍ମ ପରେ ନିର୍ମମ ଭାବେ ହତ୍ୟା କରିଥିଲା । ନାବାଳିକା ଜଣଙ୍କ ଟିୟୁସନରୁ ଯାଇ ନ ଫେରିବାରୁ ପରିବାର ପକ୍ଷରୁ ଥାନାରେ ଅଭିଯୋଗ କରାଯାଇଥିଲା । ଘଟଣାର ତଦନ୍ତ କରି ହତ୍ୟାକାରୀ ଯୁବକଙ୍କୁ ଗିରଫ କରିଥିଲା କୋଲକତା ପୋଲିସ । ସେ ନାବାଳିକାକୁ ପ୍ରଲୋଭିତ କରି ଏଭଳି ବୀଭତ୍ସ କାଣ୍ଡ ଭିଆଇଥିଲା । ମାମଲାର ୬୨ ଦିନ ମଧ୍ୟରେ ହତ୍ୟାକାରୀ ଯୁବକଙ୍କୁ ମୃତ୍ୟୁ ଦଣ୍ଡାଦେଶ ଦିଆଯାଇଛି ।