ଯୁବ, ଛାତ୍ର ଓ ମହିଳା ଟିମ କୁ ସମ୍ବର୍ଦ୍ଧିତ କରୁଥିଲା ବିଜେଡି । ସୋସିଆଲ ମିଡ଼ିଆ ପୋଷ୍ଟ କରି ସବୁ ସାରିଦେଲେ ଶ୍ରୀମୟୀ । ବିଜେଡି ଅନ୍ତଃ କନ୍ଦଳର ଖୋଲିଦେଲେ ପୋଲ । ମହାଭାରତ ଉପାଖ୍ୟାନ ରଖି ଶଙ୍ଖପତିଙ୍କୁ ପରୋକ୍ଷରେ ଦେଲେ ଧୃତରାଷ୍ଟ୍ରର ଆଖ୍ୟା । ପାଣ୍ଡିଆନଙ୍କୁ ବି ଦୁର୍ଯ୍ୟୋଧନ ବୋଲି କହି କଲେ ଟାର୍ଗେଟ । ଆହୁରି ଲେଖିଛନ୍ତି ଧୃତରାଷ୍ଟ୍ରଙ୍କର ତାଙ୍କ ପୁତ୍ରମାନଙ୍କ, ବିଶେଷତଃ ଦୁର୍ଯୋଧନ ପ୍ରତି ଅନ୍ଧ ପ୍ରୀତି, ତାଙ୍କୁ ନୀରବ ରହିବାକୁ ପ୍ରଭାବିତ କରିଥିଲା। କିଛି ଲୋକ ଧୃତରାଷ୍ଟ୍ର ପରି ଅନ୍ଧ, ଯେଉଁମାନେ ଅନ୍ୟାୟ ରୋକିବାକୁ ପ୍ରକୃତ ପ୍ରୟାସ କରନ୍ତି ନାହିଁ ।

ଇତିହାସ ଏପରି ଅଯୋଗ୍ୟ ରାଜାଙ୍କୁ କେବେ କ୍ଷମା କରେ ନାହିଁ, କାରଣ ସେମାନଙ୍କର ନିରବତା ଦୁଃଖଦ ପରିଣାମ ଆଣିଥାଏ । ନବୀନଙ୍କ ନୂଆ ମହିଳା ବ୍ରିଗେଡ଼ ରେ ଥିବା ଶ୍ରୀମୟୀ ମିଶ୍ର ଦଳୀୟ କାର୍ଯ୍ୟକ୍ରମରୁ ଦୁରେଇ ରହି କରିଥିବା ଏଭଳି ପୋଷ୍ଟ କୁ ନେଇ ଦୋହଲି ଯାଇଛି ଶଙ୍ଖ ଶିବିର । ଦଳୀୟ କନ୍ଦଳ ଜଳ ଜଳ ଦିଶିବା ପରେ ପ୍ୟାଚ ପକା ଉଦ୍ୟମ କରିଛନ୍ତି ମହିଳା ସଭାନେତ୍ରୀ ।

କେବଳ ମହିଳା ଜନତା ଦଳ ନୁହେଁ ଯୁବ, ଛାତ୍ର ଜନତା ଦଳରେ ବି ତୀବ୍ର ହୋଇଛି ଗୋଷ୍ଠୀ କନ୍ଦଳ । ସମ୍ବର୍ଦ୍ଧନା ସଭା ରୁ ଦୁରେଇ ରହିଛନ୍ତି ଅନେକ ଆଗ ଧାଡ଼ିର ଯୁବ ଛାତ୍ର ନେତା । ପୂର୍ବରୁ ମେଳି ବାନ୍ଧି ବିଦ୍ରୋହର ଡ଼ାକରା ଦେଇଥିବା ନେତା ଆଜି ଅନୁପସ୍ଥିତ ରହିଛନ୍ତି । ଏ ସବୁ ଭିତରେ ଦଳର ଛାତ୍ର ନେତା ହରିଶଙ୍କର ରାଉତଙ୍କ ବୟାନ ବି ବିଜେଡିରେ ବିସ୍ଫୋରଣ କରିଛି । ମହିଳା ସଭାନେତ୍ରୀଙ୍କ ଭଳି ଛାତ୍ର ସଭା ନେତ୍ରୀ ବି ପ୍ୟାଚ ପକ୍କା ଉଦ୍ୟମ କରିଛନ୍ତି ।

ଶ୍ରୀମୟୀ ମିଶ୍ରଙ୍କ ପୂର୍ବରୁ ଅରୁଣ ସାହୁ, ଅଶୋକ ପଣ୍ଡା, ବଦ୍ରୀ ପାତ୍ର , ଭୁପିନ୍ଦର ସିଂହ , ପ୍ରଫୁଲ୍ଲ ସାମଲ ଓ ଦେବାଶିଷ ସାମନ୍ତରାୟ ବି ଦଳର ପରିଚାଳନାକୁ ଉଠାଇଛନ୍ତି ପ୍ରଶ୍ନ । ପ୍ରତ୍ୟେକ୍ଷ ହେଉ କି ପରୋକ୍ଷ ଭାବେ ପାଣ୍ଡିଆନଙ୍କୁ ସମସ୍ତେ କରିଛନ୍ତି ଟାର୍ଗେଟ । ଚର୍ଚ୍ଚା ହେଉଛି ନବୀନ ଅସୁସ୍ଥ ପରେ ବିଜେଡିରେ ଫାଟ ଅଧିକ ବଢ଼ିଛି । ନବୀନଙ୍କ ଅସୁସ୍ଥତା ଦର୍ଶାଇ ପାଣ୍ଡିଆନ ଦମ୍ପତିଙ୍କ ହାକିମାତିକୁ ମାନିବାକୁ ଆଉ ପ୍ରସ୍ତୁତ ନୁହଁନ୍ତି ବିଜେଡି ନେତା ।