ରୋଚକ ସ୍ଥିତିରେ ବିଜେଡିର ସାଙ୍ଗଠନିକ ନିର୍ବାଚନ ପ୍ରକ୍ରିୟା ।ନେତାଙ୍କ ରାସ୍ତା ରେ କଣ୍ଟା ସାଜିଛନ୍ତି ନେତା । ନିଜ ପସନ୍ଦର ନେତାକୁ ଜିଲ୍ଲା ସଭାପତି କରିବା ପାଇଁ ଚାଲିଛି ଜୋରସୋର ଲବି । ୨୪ ବର୍ଷ ପରେ ଶାସନରୁ ହଟିଛି ବିଜେଡି । ପ୍ରଥମ ଥର ପାଇଁ ବିରୋଧୀ ଦଳ ଭୂମିକାରେ ସାଙ୍ଗଠନିକ ନିର୍ବାଚନ ପ୍ରକ୍ରିୟା ରେ ବିଜେଡି । ଦଳ କ୍ଷମତାରୁ ହଟିଲା ପରେ ଖୋଲା ଖୋଲି ନେତୃତ୍ୱଙ୍କୁ ଚ୍ୟଲେଞ୍ଜ ଦେଉଛନ୍ତି ନେତା । ବିଜେଡିରେ ଆରମ୍ଭ ହୋଇଛି ବିଦ୍ରୋହ । ଏହାରି ଭିତରେ କେନ୍ଦ୍ରାପଡ଼ା ଜିଲ୍ଲା ସଭାପତି ଚୟନକୁ ନେଇ ଶଙ୍ଖ ଭବନ ରେ ପଶିଛି କେଁ ।

ସୂଚନା ଅନୁସାରେ ବିଜେଡି ବିଧାୟକ ଧ୍ରୁବ ସାହୁ ଓ ଦେବି ମିଶ୍ରଙ୍କ ଭିତରେ ହୋଇଛି ତୁ ତୁ ମେଁ ମେଁ । ଜିଲ୍ଲା ସଭାପତି ଚୟନକୁ ନେଇ ଛିଡ଼ୁନି ଅଙ୍କ । କେନ୍ଦ୍ରାପଡ଼ା ଜିଲ୍ଲା ସଭାପତି ନେଇ ଶଙ୍ଖ ଭବନରେ ଚାଲିଥିଲା ବୈଠକ । ସଭାପତି ନା କୁ ନେଇ କିଛି ବିଧାୟକ ରଖିଥିଲେ ପ୍ରସ୍ତାବ । ଯାହାକୁ ନେଇ ଉଚ୍ଚ ବାଚ ହୋଇଥିବା ସୂଚନା । କେନ୍ଦ୍ରାପଡ଼ାରେ ଅତନୁ,ପ୍ରତାପ, ଗଣେଶ୍ୱର,ଧ୍ରୁବ ଓ ଅଂଶୁମାନଙ୍କସହମତିକୁ ନେଇ ଜିଲ୍ଲା ସଭାପତି ଚୟନ ବିଜେଡି ପାଇଁ କାଠିକର ପାଠ ।

ଆସନ୍ତା ୧୯ ତାରିଖରେ ନବୀନ ପଟ୍ଟନାୟକଙ୍କୁ ପୁନର୍ବାର ରାଜ୍ୟ ସଭାପତି କରିବା ପାଇଁ ଆପାତତଃ ନିଷ୍ପତ୍ତ ବିଜେଡି । ୧୬ଟି ଜିଲ୍ଲାର ଜିଲ୍ଲା ସଭାପତି ପଦବି ପାଇଁ ନାଁ ଚୂଡ଼ାନ୍ତ ହୋଇଛି । ଔପଚାରିକତା ଦୃଷ୍ଟିରୁ ସେମାନେ ସଭାପତି ପଦବି ପାଇଁ ପ୍ରାର୍ଥୀପତ୍ର ଦାଖଲ କରିଛନ୍ତି । ଯଦିଓ ଜିଲ୍ଲା ସଭାପତିଙ୍କ ନାମ ଘୋଷଣା ହୋଇନାହିଁ, ତେବେ ଦଳୀୟ ମହଲରେ ହେଉଥିବା ଚର୍ଚ୍ଚା ଅନୁଯାଇ ୧୦ରୁ ଅଧିକ ସାଂଗଠନିକ ଜିଲ୍ଲାରେ ଭୀଷଣ ଅଡୁଆ ରହିଛି ।

କଟକରେ କାହାକୁ ଜିଲ୍ଲା ସଭାପତି କରିବେ, ଦଳ ବୁଝିପାରୁନି । ଦେବାଶିଷ ସାମନ୍ତରାୟ, ପ୍ରଭାତ ତ୍ରିପାଠୀ, ପ୍ରଭାତ ବିଶ୍ଵାଳ, ଚନ୍ଦ୍ରସାରଥୀ ବେହେରାଙ୍କ ଆଣ୍ଟପଣ ଦଳର କ୍ଷମତାଶାଳୀ ଗୋଷ୍ଠୀର ନିଦ ହଜାଇ ଦେଲାଣି । ଖୋର୍ଦ୍ଧାରେ ସଭାପତି ହେବାକୁ ରାଜେନ୍ଦ୍ର ସାହୁ ପ୍ରମୁଖ ଦାବିଦାର ଥିବାବେଳେ ଦଳର ନିର୍ଦ୍ଦିଷ୍ଟ କ୍ଷମତାଶାଳୀ ଗୋଷ୍ଠୀ ତାଙ୍କ ସପକ୍ଷରେ ନାହାନ୍ତି । ବଲାଙ୍ଗିରରେ ରାଜପରିବାର ଓ ଟୁକୁନି ସାହୁଙ୍କୁ ନେଇ ବିବାଦ ରହିଛି । କଳାହାଣ୍ଡିରେ ଦଳ ଦିବ୍ୟଶଙ୍କର ମିଶ୍ରଙ୍କୁ ଚାହୁଁଥିବା ବେଳେ ପୁଷ୍ପେନ୍ଦ୍ର ସିଂହଦେଓଙ୍କ ସପକ୍ଷରେ ଅଧିକାଂଶ ନେତା ଥିବା କୁହାଯାଉଛି ।

ନବରଙ୍ଗପୁରରେ ପ୍ରଦୀପ ମାଝୀ ବନାମ ରମେଶ ମାଝୀ ବିବାଦ ଛିଣ୍ଡୁନି। କୋରାପୁଟରେ ଈଶ୍ଵର ପାଣିଗ୍ରାହୀ ଓ ରବି ନନ୍ଦଙ୍କୁ ନେଇ ଦଳ କିଛି ସ୍ଥିର କରିପାରୁନି । ଗଞ୍ଜାମରେ ଶୋଚନୀୟ ପରାଜୟ ପରେ ଦାୟିତ୍ୱ ନେବାକୁ ଅମଙ୍ଗ ନେତା । ଏହି ସବୁ ଜିଲ୍ଲା ନେତାଙ୍କ ମଧ୍ୟରେ ଛକାପଞ୍ଝା ଜୋର୍ ରହିଥିବାରୁ ସଭାପତି ପଦବି ପାଇଁ ଏକପାଖିଆ ଚୟନ ସମ୍ଭବ ହେଉ ନାହିଁ । କୌଣସି ଗୋଟିଏ ନାମ ଉପରେ ସହମତି ଆଣିବା ଏତେ ସହଜ ହେଉନାହିଁ । ପୁଣି ଏହା ମଧ୍ୟରୁ କିଛି ଜିଲ୍ଲାରେ ପାଣ୍ଡିଆନ ମାର୍କା ନେତାଙ୍କୁ ଥଇଥାନ କରିବାକୁ ଯୋଜନା ଚାଲିଥିବାରୁ ଆହୁରି ଅଡୁଆ ପରିସ୍ଥିତି ସୃଷ୍ଟି ହୋଇଛି । ସେପଟେ ପ୍ରମିଳା କହିଛନ୍ତି ସବୁ ଠିକ ଚାଲିଛି।

ଏଭଳି ରୋଚକ ସ୍ଥିତିରେ ବିଜେଡିର ଜିଲ୍ଲା ସଭାପତି ଚୟନରେ କୌଣସି ଗୋଟିଏ ନେତାଙ୍କ ଆଧିପତ୍ୟ ରହୁନାହିଁ | ନେତା ନେତାଙ୍କ ଭିତରେ ଟଣା ଓଟରା ସ୍ଥିତି ଭିତରେ କେତେ ସହଜ ହେବ ବିଜେଡିର ସାଙ୍ଗଠନିକ ନିର୍ବାଚନ ପ୍ରକ୍ରିୟା ଦେଖିବାକୁ ବାକି ରହିଲା ।

Argus News | argus news | -Argusnews Home: Odisha Latest News, Breaking News, Trending News, Live TV and more