ଅର୍ଗସ ବ୍ୟୁରୋ: ଦିଲ୍ଲୀ ସିଂହାସନ ପାଇଁ ମହାସଂଗ୍ରାମ । ଆସନ୍ତା ମାସ ୫ ତାରିଖରେ ହେବାକୁ ଯାଉଛି ସମ୍ମୁଖ ଯୁଦ୍ଧ । ୮ରେ ଆସିବ ଦିଲ୍ଲୀ ଜନତାଙ୍କ ନିର୍ଣ୍ଣୟ । ଦିଲ୍ଲୀ ବିଧାନସଭା ନିର୍ବାଚନ ତାରିଖ ଘୋଷଣା ହେବା ମାତ୍ରେ ନିର୍ବାଚନ ଆଚରଣ ବିଧି ଲାଗୁ ହୋଇଛି। ନିର୍ବାଚନ ପାଇଁ ଆସନ୍ତା ୧୦ରେ ପ୍ରକାଶ ପାଇବ ବିଜ୍ଞପ୍ତି । ନାମାଙ୍କନ ଦାଖଲର ଶେଷ ତାରିଖ ୧୭ ଜାନୁଆରୀ ଓ 20 ଜାନୁଆରୀ ପ୍ରତ୍ୟାହାରର ଶେଷ ତାରିଖ । ସମସ୍ତ ୭୦ ଆସନରେ ଭୋଟିଂ ପାଇଁ ୧୩ ଶହ ୩ଟି ପୋଲିଂ ଷ୍ଟେସନ ବ୍ୟବସ୍ଥା ହେବ । ୨୧୦ଟି ମଡେଲ ପୋଲିଂ ଷ୍ଟେସନ ମଧ୍ୟରୁ ୭୦ଟି ପୋଲିଂ ଷ୍ଟେସନ ମହିଳାଙ୍କ ଦ୍ୱାରା ପରିଚାଳିତ ହେବ ଏବଂ ଦିବ୍ୟାଙ୍ଗଙ୍କ ପାଇଁ ସ୍ୱତନ୍ତ୍ର ଭାବେ ୭୦ଟି ପୋଲିଂ ଷ୍ଟେସନ ବ୍ୟବସ୍ଥା କରିଛି ନିର୍ବାଚନ କମିଶନ ।

ନିର୍ବାଚନ କମିଶନ ପକ୍ଷରୁ ତାରିଖ ଘୋଷଣା ପରେ ପ୍ରମୁଖ ତିନି ଦଳ ବିଜେପି, ଆପ୍ ଓ କଂଗ୍ରେସ ମଧ୍ୟରେ ତୀବ୍ର ହୋଇଛି ବାକ୍ ଯୁଦ୍ଧ । ଦିନେ ରାଷ୍ଟ୍ରୀୟ ବିକଳ୍ପ ହେବାର ସ୍ବପ୍ନ ଦେଖିଥିବା ଆପ୍ ଏବେ ଦୁର୍ନୀତିର କାଠଗଡ଼ାରେ । ସେପଟେ କ୍ଷମତା ବଜାୟ ରଖିବାକୁ ଯୋଜନା ପରେ ଯୋଜନା ଘୋଷଣା କରି ଆପ୍ ସଂଯୋଜକ କେଜ୍ରିୱାଲ ଦିଲ୍ଲୀବାସୀଙ୍କ ମନ ଜିଣିବାକୁ କରୁଛନ୍ତି ଜୋରଦାର ଉଦ୍ୟମ । କଂଗ୍ରେସ ବି ଆପ ଦୁର୍ନୀତିକୁ କରିଛି ଟାର୍ଗେଟ୍ ।

ଶାସକ ଆପକୁ ଗାଦିଚ୍ୟୁତ କରିବା ପାଇଁ ଅଣ୍ଟା ଭିଡିଛି ବିଜେପି । ଗତ ଦୁଇଟି ନିର୍ବାଚନ ତୁଳନାରେ ଏଥର ଅଧିକ ଆକ୍ରମଣାତ୍ମକ ଆଭିମୁଖ୍ୟ ଆପଣାଇ ବିଜେପି ଆପ୍ ମୁଣ୍ଡବିନ୍ଧାର କାରଣ ବନିଛି । ଗତ ଶନିବାର ବିଜେପି ପ୍ରଚାରର ମଙ୍ଗ ଧରି ଖୋଦ୍ ପ୍ରଧାନମନ୍ତ୍ରୀ ମୋଦି ଦିଲ୍ଲୀରେ ପରିବର୍ତ୍ତନର ଆହ୍ବାନ ଦେଇଛନ୍ତି ।