ଭୁବନେଶ୍ଵର: ରାଜ୍ୟ ରାଜନୀତିରେ ହେବ ନୂଆ ଦଳର ଅଦ୍ଭ୍ୟୁଦୟ । କଂଗ୍ରେସରୁ ବହିଷ୍କାର ପରେ ନୂଆ ଆଞ୍ଚଳିକ ଦଳ ଗଢ଼ିବେ କଟକ-ବାରବାଟୀର ପୂର୍ବତନ ବିଧାୟକ ମହମ୍ମଦ ମୋକିମ୍ । ଏନେଇ ଅର୍ଗସ୍ ନ୍ୟୁଜ୍‌କୁ ମହମ୍ମଦ ମୋକିମ୍ ବିସ୍ତୃତ ସୂଚନା ଦେଇଛନ୍ତି ।

ପୂର୍ବତନ ବିଧାୟକ ମହମ୍ମଦ ମୋକିମ୍ କହିଛନ୍ତି, "ମାର୍ଚ୍ଚ ଶେଷ ସୁଦ୍ଧା ନୂଆ ଆଞ୍ଚଳିକ ଦଳ ଗଠନ କରାଯିବ । ନୂଆ ଦଳ ଗଠନ ପୂର୍ବରୁ ଜାନୁଆରୀ ୧୨ରେ ହେବ ଯୁବ ସମାବେଶ । ଯେଉଁଥିରେ ଉପକୂଳ ଓଡ଼ିଶାର ୧୦ ଜିଲ୍ଲାର ଯୁବନେତା ସାମିଲ ହେବେ ।

ଏଥିସହ ପଢ଼ନ୍ତୁ: 'ମଦ ଓ ମାଗଣା ଯୋଜନାକୁ ବିରୋଧ କରିବ ନୂଆ ଆଞ୍ଚଳିକ ଦଳ'

ଏଥିପାଇଁ ବହୁତ ବ୍ୟକ୍ତି ବିଶେଷ ଓ ଅନୁଷ୍ଠାନ ସହ ପରାମର୍ଶ କରୁଛୁ । ଯେଉଁ ଯୁବ ନେତାଙ୍କୁ ସୁବିଧା ସୁଯୋଗ ମିଳିପାରି ନାହିଁ, ସେମାନଙ୍କୁ ଏକତ୍ରିତ କରୁଛୁ । ବର୍ତ୍ତମାନ ପର୍ଯ୍ୟନ୍ତ ନୂଆ ଦଳର ନାମ ସ୍ଥିର କରାଯାଇ ନାହିଁ । ନୂଆ ଦଳରେ କଂଗ୍ରେସ ଓ ବିଜେଡିର ନେତା ବି ରହିବେ ବୋଲି କହିଛନ୍ତି ମହମ୍ମଦ ମୋକିମ୍ ।

ନୂଆ ବର୍ଷରେ ନୂଆ ଆଞ୍ଚଳିକ ଦଳ ଗଠନ ନେଇ ମୋକିମ୍ ସ୍ପଷ୍ଟ ଆଭିମୁଖ୍ୟ ରଖିଥିଲେ । ବିଭିନ୍ନ ବର୍ଗର ଲୋକଙ୍କୁ ଭେଟିବା ପରେ କେଉଁ ପ୍ରସଙ୍ଗକୁ ନେଇ ଦଳ ଗଠନ ହେବ ସେନେଇ ଘୋଷଣା କରିଥିଲେ ମହମ୍ମଦ ମୋକିମ୍ । ମଦ ଓ ମାଗଣା ଯୋଜନା ନୂଆ ଆଞ୍ଚଳିକ ଦଳର ମୁଖ୍ୟ ପ୍ରସଙ୍ଗ ହେବ ବୋଲି କହିଥିଲେ ।

ଏଥିସହ ପଢ଼ନ୍ତୁ: ବାଂଲାଦେଶରେ ପୁଣି ହିନ୍ଦୁଙ୍କୁ ହତ୍ୟା; ସାମ୍ବାଦିକଙ୍କୁ ଗୁଳି କଲେ, ବ୍ୟବସାୟୀଙ୍କୁ ହାଣିଦେଲେ

ସେ କହିଥିଲେ, ଉଦୀୟମାନ ୟଙ୍ଗ ବିଗ୍ରେଡ୍‌ଙ୍କୁ ନେଇ ନୂଆ ଆଞ୍ଚଳିକ ଦଳ ଗଠନ ହେବ । ଯୁବ ସଶକ୍ତିକରଣ, ମହିଳା ସଶକ୍ତିକରଣ ଏବଂ ମଦ ବିରୋଧି ଆନ୍ଦୋଳନକୁ ସମର୍ଥନ କରୁଥିବା ବ୍ୟକ୍ତି ବିଶେଷଙ୍କୁ ପ୍ରାଧାନ୍ୟ ଦିଆଯିବ । ଦଳ ଗଠନର ମୁଖ୍ୟ ଉଦ୍ଦେଶ୍ୟ ରହିବ କେବଳ ରାଜ୍ୟର ଉନ୍ନତି ।

ଏଥିସହ ମାଗଣା ଯୋଜନା ବଦଳରେ ଲୋକଙ୍କୁ ରୋଜଗାରରକ୍ଷମ କରିବାକୁ ଯୋଜନା କରାଯିବ ବୋଲି କହିଛନ୍ତି ମୋକିମ୍ । ବିଜେଡିକୁ ଛାଡ଼ିଦେଲେ ଓଡ଼ିଶାରେ ଗଠନ ହୋଇଥିବା କୌଣସି ଆଞ୍ଚଳିକ ଦଳ ପ୍ରାୟତଃ ସଫଳ ହୋଇ ନାହାନ୍ତି । ବର୍ତ୍ତମାନ ଦେଖିବାର କଂଗ୍ରେସରୁ ବିତାଡ଼ିତ ହୋଇଥିବା ନେତା ମହମ୍ମଦ ମୋକିମ୍ ଯେଉଁ ଆଞ୍ଚଳିକ ଦଳ ଗଠନର ସୂତ୍ରଧର ସାଜିଛନ୍ତି ତାହା କେତେ ସଫଳ ହେଉଛି ।