ଡିସେମ୍ବର 12ରେ କଣ କରିଥିଲେ ସନା, ଯେଉଁଥିପାଇଁ ସନ୍ଦେହ କଲେ ନବୀନ

ଆଗ ପଛେ ମାଳ ମାଳ ଶଙ୍ଖ ମାଳି ପକେଇ ଗୁଣିଆ ବୁଲୁଥିଲେ । ବଳ ଦେଉଥିଲେ । ଝାଡି ଦେଉଥିଲେ । ଡରିବାର ପ୍ରଶ୍ନ ନଥିଲା । 25 ବର୍ଷ ଧରି ନବୀନ ଏକା ମନ୍ତ୍ର ଫୁଙ୍କୁଥିଲେ, ବାକି ସବୁ ବୀଣା ଏତେ ନେତାଙ୍କୁ ଡାକି ଗୁପ୍ତ ମନ୍ତ୍ରଣା ଦିଅନ୍ତି । ଏମିତି କଣ ଆବଶ୍ୟକ ପଡ଼ିଲା ମିଡିଆ ଆଗରେ ରାଗିଗଲେ ? ଚମ୍ପୁଆ ବିଧାୟକ ସନା ମହାକୁଡ଼ଙ୍କୁ ଦେଖି କାହିଁକି ନବୀନ ଡରିଗଲେ ? ନିଜ ଦଳର MLA, ଶଙ୍ଖ ଟିକେଟରୁ ଜିତିଛନ୍ତି । ତଥାପି ଏତେ ଭୟ କାହିଁକି ? ଯେତେବେଳେ ଆଲୋଚନା ଚାଲିଛି ଯେ, ବିଧାନସଭାରେ ସନାଙ୍କୁ ଦେଖି ରାଗିଗଲେ ନବୀନ । ସେତେବେଳେ ସନ୍ଦେହ ପଛର କାରଣ ଖୋଜିଥିଲୁ ଆମେ ।

ମାସେ ତଳକୁ ଗଲାବେଳକୁ ମିଳିଥିଲା ସନାଙ୍କ ଗାଲରେ କେକ୍ ବୋଳି ଦେଉଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ସ୍ଥାନ ଥିଲା ଚମ୍ପୁଆଲ । ଉପସ୍ଥିତ ଥିଲେ ମୁଖ୍ୟମନ୍ତ୍ରୀଙ୍କ ସମେତ କେନ୍ଦୁଝରର ସମସ୍ତ ବିଧାୟକ ଓ ମନ୍ତ୍ରୀ । ଆଉ ତା ପରଠୁ ସନ୍ଦେହ ନିଆଁରେ ଜଳୁଛନ୍ତି ମୁଖିଆ । ସନ୍ଦେହକୁ ଅଧିକ ସନ୍ଦିହାନ କରିଦେଇଛି ବିଧାୟକ ଦଳ ବୈଠକରେ ସନାଙ୍କ ଅନୁପସ୍ଥିତି । ଆଉ ବିଧାନସଭାରେ ଯେତେବେଳେ ସନା ପ୍ରଣାମ କରନ୍ତି, ସେତେବେଳେ ନବୀନ ପଚାରନ୍ତି ଆର ୟୁ ୱିଥ୍ ବିଜେପି...

ସେପଟେ ସନାଙ୍କ ଠାଣୀ ଆଉ ବାଣୀ ବି କିଛି ଭିନ୍ନ ଇସାରା ଦେଉଛି । ସୁପ୍ରିମୋଙ୍କ ସନ୍ଦେହକୁ ବାଏଁ ବାଏଁ ଉଡାଇଦେଇଛନ୍ତି ବିଧାୟକ । କହିଛନ୍ତି ବିକାଶ ପାଖରେ ମୁଁ । ଅର୍ଥାତ ମୋହନ ମାଝୀ ଆମ ଜିଲ୍ଲାର । ତେଣୁ ମୁଖ୍ୟମନ୍ତ୍ରୀଙ୍କୁ ଭେଟିବାରେ ଅସୁବିଧା କେଉଁଠି ? ଯଦି ଭେଟିବା ଦ୍ୱାରା କିଛି ଉନ୍ନତିମୂଳକ କାର୍ଯ୍ୟ ହେଉଛି । ଭେଟିବା ପାଇଁ ମୋ ଅଧିକାର ରହିଛି । ମୁଁ ଏକା ଭେଟୁନି ବିଜେଡିର ଆଉ ଦୁଇ ବିଧାୟକ ବି ଭେଟିଛନ୍ତି ବୋଲି କହିଛନ୍ତି ଚମ୍ପୁଆ ବିଧାୟକ ସନା ମହାକୁଡ଼ ।

ସନ୍ଦେହ ଚକ୍ଷୁରେ କେବଳ ଚମ୍ପୁଆ ବିଧାୟକ ନା ଆଉ କିଏ କିଏ ଅଛନ୍ତି ? କ୍ଷମତା ଯିବା ପରେ କ୍ୟାମେରା ସାମ୍ନାରେ ନବୀନଙ୍କ ଏ ବାଣୀ ପ୍ରଥମ । ଆଉ ଦଳର ମୁଖିଆଙ୍କୁ ଏମିତି ଠାଣୀରେ କହିବା ବି ପ୍ରଥମ । 25 ବର୍ଷ ଧରି ପାଖରେ ଏତେ ଗୁଣିଆ ଧରି ବୁଲୁଥିବା ନବୀନ ଏମିତି ଭୟ କରିବା ବି ପ୍ରଥମ...