Argus News - ଭାଙ୍ଗୁଛି ବିଜେଡି, ଆଉ ନାହିଁ ନବୀନଙ୍କ କର୍ତ୍ତୃତ୍ଵ

ରାଜ୍ୟସଭା ନିର୍ବାଚନରେ ହୋଇଛି ବଡ଼ ଓଲଟ ପାଲଟ...ସୁପ୍ରିମୋ ନବୀନଙ୍କୁ ତାଙ୍କରି ଦଳର ବିଧାୟକମାନେ ଦେଇଛନ୍ତି ଜବରଦସ୍ତ ଝଟକା । ନମ୍ବର ଥାଇ ବି ବିଜେଡି ପ୍ରାର୍ଥୀ ଦତ୍ତେଶ୍ଵର ହୋତାଙ୍କୁ ପରାଜୟର ମୁହଁ ଦେଖିବାକୁ ପଡ଼ିଲା । ବିଜେଡି ସହ କଂଗ୍ରେସ ବିଧାୟକ ବି କ୍ରସ୍ ଭୋଟିଂ କରିଥିବାବେଳେ ବାଜିମାରିଛି ବିଜେପି । ନିଜ ଦଳ ଉପରୁ କର୍ତ୍ତୃତ୍ବ ହରାଉଥିବା ନବୀନ ଔଷଧ ରାଗରେ ତାଟିଆ କାମୁଡୁଛନ୍ତି ।

ମାତ୍ର ୪ଟି ରାଜ୍ୟସଭା ଆସନ । ବିଜେପିର ଥିଲା ୨ଟି ପକ୍କା । ସଂଖ୍ୟା ଦେଖିଲେ ବିଜେଡିର ବି ଥିଲା ଗୋଟିଏ ଲେଖା । କିନ୍ତୁ ହେଲା ଏମିତି ଛକା ପଞ୍ଝା, ବଦଳିଗଲା ସବୁ ଗଣିତ । ବିଜେଡି ଓ କଂଗ୍ରେସ ବିଧାୟକଙ୍କ କ୍ରସ୍ ଭୋଟିଂ ବଦଳାଇ ଦେଇଛି ରାଜ୍ୟସଭା ମ୍ୟାଥମେଟିକ୍ସ । ଜଣେ ଅଧେ ନୁହେଁ ୧୧ ଜଣ ବିଧାୟକ କରିଛନ୍ତି ନିଜ ଦଳ ବିରୋଧରେ ମତଦାନ । ବିଜେଡିର ୮ ଜଣ ଆଉ କଂଗ୍ରେସର ୩ ଜଣ ।

କାଟୁ କଲାନି ଦଳର ହ୍ଵିପ୍, କାମ କଲାନି ସୁପ୍ରିମୋଙ୍କ ଟ୍ୟୁସନ, କି ଦଳର ବରିଷ୍ଠଙ୍କ ଧମକ ଚମକ । ରାଜ୍ୟସଭା ଫଳାଫଳ ଗୋଟିଏ ପଟେ ବିଜେଡି ଓ କଂଗ୍ରେସର ଶୀର୍ଷ ନେତୃତ୍ବଙ୍କୁ ଦେଖାଇଲା ଦିନରେ ଜହ୍ନ, ଅନ୍ୟପଟେ ଚମତ୍କାର ରଣକୌଶଳ କରି ବିଜେପି କଲା ବାଜିମାତ୍ ।

ସବୁଠୁ ବଡ଼ ଝଟକା ଖାଇଲେ ବିଜେଡି ନବୀନ ପଟ୍ଟନାୟକ । ୨୪ ପରାଜୟ, ନୂଆପଡ଼ା ଚିତପଟାଙ୍ଗ ପରେ ନବୀନଙ୍କ ମାଟିତଳେ ଥିବା ବାକିଥିବା ମାଟି ଖସାଇଦେଲା ଏହି ରାଜ୍ୟସଭା ନିର୍ବାଚନ । ନବୀନଙ୍କୁ ପାନେ ଦେଇଛନ୍ତି ତାଙ୍କ ଦଳର ୬ ଜଣ ବିଧାୟକ ସୌଭିକ ବିଶ୍ବାଳ, ଦେବୀ ରଞ୍ଜନ ତ୍ରିପାଠୀ, ଚକ୍ରମଣି କହଁର, ସୁବାସିନୀ ଜେନା, ରମାକାନ୍ତ ଭୋଇ, ନବକିଶୋର ମଲ୍ଲିକ । ଏମାନଙ୍କର ସହ ନିଲମ୍ବିତ ବିଧାୟକ ସନାତନ ମହାକୁଡ଼ ଓ ଅରବିନ୍ଦ ମହାପାତ୍ର କଲେ କ୍ରସ୍ ଭୋଟିଂ ।

ଫଳରେ ସଂଖ୍ୟା ଥାଇ ବି ବିଜେଡି ପ୍ରାର୍ଥୀ ଦତ୍ତେଶ୍ଵରଙ୍କୁ ପରାଜୟର ମୁହଁ ଦେଖିବାକୁ ପଡ଼ିଲା । ଖାଲି କ୍ରସ୍ ଭୋଟିଂ କଲେନି ବରଂ ବିଜେଡି ବିଧାୟକ ସୌଭିକ ଓ ଦେବୀ ପ୍ରତ୍ୟକ୍ଷ ଓ ପରୋକ୍ଷରେ ନବୀନ ଓ ତାଙ୍କ ଦଳର କାର୍ପଟଦାରଙ୍କୁ ମନଇଚ୍ଛା ଶୁଣାଇଲେ ।

ନିଜ ଦଳର ଶୋଚନୀୟ ପ୍ରଦର୍ଶନ ପରେ ଔଷଧ ରାଗରେ ତାଟିଆ କାମୁଡ଼ିଲେ ବିଜେଡି ସୁପ୍ରିମୋ ନବୀନ ପଟ୍ଟନାୟକ । କ୍ରସ୍ ଭୋଟିଂ ପ୍ରସଙ୍ଗରେ ନାଁ ନ ନେଇ ଅପରାଧିକ ପୃଷ୍ଠଭୂମି ଥିବା କହି ପ୍ରଭାତ ବିଶ୍ବାଳ, ପ୍ରଭାତ ତ୍ରିପାଠୀ, ରବିନ୍ଦ୍ର ଜେନାଙ୍କୁ କଲେ ଟାର୍ଗେଟ୍ । ତାଙ୍କୁ ମୁହଁତୋଡ଼ ଜବାବ ଦେଲେ ପ୍ରଭାତ ତ୍ରିପାଠୀ ।

ଖାଲି ଶଙ୍ଖ ନୁହେଁ ହାତ ଦଳର ୩ ବିଧାୟକ ବି ନିଜ ଦଳ ବିରୋଧରେ ଭୋଟ୍ ଦେଲେ । ଏମାନେ ହେଲେ ସୋଫିଆ ଫିର୍ଦ୍ଦୋସ୍, ରମେଶ ଜେନା ଓ ଦାଶରଥୀ ଗମାଙ୍ଗ । କିଏ କାହାକୁ ଭୋଟ୍ ଦେଲା, ମତଦାନ ପରେ ବିଧାୟକଙ୍କ ବୟାନ ବି ବଢ଼ାଇଲା ସସପେନ୍ସ । ଅରବିନ୍ଦ ମହାପାତ୍ର ବିଜେଡି ଏଜେଣ୍ଟଙ୍କୁ ଭୋଟ୍ ଦେଖାଇଲେ ନାହିଁ, ସେ ବିଜେପିକୁ ଭୋଟ୍ ଦେଲେ କି ? ଭୋଟ୍ ଦେଇ ଆସିବା ପରେ ତୁନି ରହିଲେ ଚନ୍ଦ୍ରମଣି କହଁର ? ସୋଫିଆ ଫିର୍ଦ୍ଦୋସ୍ ବି ମୁହଁ ଖୋଲିଲେନି ।

ନିର୍ବାଚନରେ ଜୟ ପରାଜୟ ସ୍ଵାଭାବିକ କିନ୍ତୁ ଏହି ରାଜ୍ୟସଭା ନିର୍ବାଚନ ଆହୁରି ସ୍ପଷ୍ଟ କରିଛି ବିଜୁ ଜନତା ଦଳର ଫାଟ । ସ୍ପଷ୍ଟ ହୋଇଛି ବିଜେଡି ଭାଙ୍ଗି ଭାଙ୍ଗି ଯାଉଛି, ଆଉ ନବୀନଙ୍କର କୌଣସି କର୍ତ୍ତୃତ୍ବ ନାହିଁ । କଂଗ୍ରେସ ବି ନିଜ ବିରୋଧୀ ବିଜେଡି ସହ ହାତ ମିଶାଇବାକୁ ନେଇ ପାନେ ପାଇଛି । ଆଉ ଏ ସବୁରୁ ବମ୍ପର ଲାଭ ଉଠାଇଛି ବିଜେପି।