ଭାଗ ଭାଗ ବିଜେଡି । ଭାଗ ଭାଗ ବିଜେଡି ନେତା । କାହା ସହ କାହା କଥା ମେଳି ଖାଉନି । ଦଳ କନ୍ଦଳ ଜଳ ଜଳ ହୋଇ ପଦାରେ ପଡିଥିବାବେଳେ ବରିଷ୍ଠ ନେତା କହୁଛନ୍ତି ଦଳରେ ସବୁ ଠିକ୍ ଚାଲିଛି । ବିଜେଡିରେ ୱକଫ୍ ଘମାସାନ ଭିତରେ ନବୀନ ନିବାସରେ ଆଜି ବରିଷ୍ଠ ନେତା ଭିଡ ଜମାଇଥିଲେ । ପ୍ରଣବ ପ୍ରକାଶ ଦାସ, ଅନଙ୍ଗ ଉଦୟ ସିଂଦେଓ, ପ୍ରସନ୍ନ ଆଚାର୍ଯ୍ୟ, କଳିକେଶ ସିଂ ଦେଓ ଏବଂ ପ୍ରତାପ ଦେବ ପ୍ରମୁଖ ନବୀନଙ୍କ ସହ ଆଲୋଚନା କରିଛନ୍ତି ।

ଗତକାଲି ୱାକଫ୍ ଝଡ ଭିତରେ ସାଂସଦ ମୁନ୍ନା ଖାନ୍ କର୍ମୀଙ୍କୁ ଧରି ନବୀନ ନିବାସରେ ପହଞ୍ଚିଥିଲେ । ନବୀନଙ୍କୁ ପ୍ରଶ୍ନ କରିଥିଲେ । କିନ୍ତୁ ନବୀନ ନିର୍ଦ୍ଧିଷ୍ଟ ପ୍ରଶ୍ନର ଉତ୍ତର ନ ଦେଇ କେବଳ ଦେଖିବି ବୋଲି କହି ଏଡାଇଗଲେ । ନବୀନଙ୍କ ଏପରି ଉତ୍ତର କର୍ମୀଙ୍କ ଅସନ୍ତୋସ ଆହୁରି ବଢାଇଥିଲା । ସିଧାସଳଖ ନବୀନ ନିବାସ ଭିତରେ ପାଣ୍ଡିଆନ୍ ହଟାଓ ବିଜେଡି ବଞ୍ଚାଅ, ପାଣ୍ଡିଆନ୍ ଗୋ ବ୍ୟାକ ନାରା ଦେଇଥିଲେ ବିଜେଡି କର୍ମୀ । ଯାହା ଥିଲା ଇତିହାସରେ ପ୍ରଥମ । ନବୀନ ନିବାସରେ ପାଣ୍ଡିଆନ ଗୋ ବ୍ୟାକ୍ ନାରା । 

ପରେ ଆଜି ପୁଣି ବରିଷ୍ଠ ନେତା ନବୀନଙ୍କୁ ଭେଟିଛନ୍ତି । ନବୀନ ନିବାସରେ ଆଲୋଚନା ପରେ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ । କହିଛନ୍ତି ନବୀନ ପଟ୍ଟନାୟକ ଅଛନ୍ତି, ଦଳ ଆହୁରି ମଜଭୁତ ଅଛି ଓ ଲୋକମାନଙ୍କ ଭରସାର ଦଳ ହୋଇ ରହିବ । ଆଜି ସମ୍ପୂର୍ଣ୍ଣ ଭାବେ ସଂଗଠନ କାର୍ଯ୍ୟକ୍ରମକୁ ଆଗେଇବାକୁ ନବୀନ ପଟ୍ଟନାୟକଙ୍କୁ ଭେଟିଥିଲୁ । ରାଜ୍ୟ ସଭାପତି, ଜିଲ୍ଲା ସଭାପତି ଓ ରାଜ୍ୟ କମିଟି ସହ ଅନ୍ୟ କର୍ମକର୍ତ୍ତା ଚୟନ ନେଇ ଆଲୋଚନା ହୋଇଛି । ସଂଗଠନ ନିର୍ବାଚନ କାର୍ଯ୍ୟକ୍ରମ ଚାଲିଛି ।

ସେହିପରି ସଞ୍ଜୟ ଦାସବର୍ମା କହିଛନ୍ତି ଆଜି ଦଳର ବରିଷ୍ଠ ନେତାମାନେ ଆଲୋଚନା କରୁଛନ୍ତି । 33 ସାଙ୍ଗଠନିକ ଜିଲ୍ଲାରେ କିପରି ସଭାପତି ନିର୍ବାଚନ ହେଉଛି, ବ୍ଲକ ସଭାପତି ଚୟନରେ କଣ ସମସ୍ୟା ରହୁଛି, କିଭଳି ନିର୍ବାଚନ ଠିକ ଭାବେ ହେବ, ସେ ନେଇ ସଭାପତିଙ୍କୁ ଅବଗତ କଲୁ । ଅନ୍ୟ ସବୁ କଥା ସ୍ପଷ୍ଟ କାଲି ହୋଇଛି । ସବୁ ସନ୍ଦେହର ଶୀଘ୍ର ତା ସମାଧାନ ହେବ । ନବୀନ ପଟ୍ଟନାୟକଙ୍କ ନେତୃତ୍ୱରେ ଦୃଢ଼ ବିରୋଧୀ ଦଳ ସହ ଲୋକଙ୍କ ଆଶା ଓ ଭରସାର ଦଳ ହୋଇ ରହିବ ।

ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀ ମିଶ୍ର କହିଛନ୍ତି ସଂଗଠନ ନିର୍ବାଚନ ପାଇଁ ଗତକାଲି DROମାନଙ୍କ ବୈଠକ ନେଇଥିଲେ ବିଜେଡି ରାଜ୍ୟ ନିର୍ବାଚନ ଅଧିକାରୀ ପ୍ରତାପ ଦେବ । ଯେଉଁ ସବୁ ନାଁ ଆସିଛି, ସବୁ କାର୍ଯ୍ୟସୂଚୀ ନେଇ ନବୀନ ପଟ୍ଟନାୟକଙ୍କୁ ଅବଗତ କରିଛୁ ।

ୱାକଫ୍ ବିଲ୍ କୁ ନେଇ ପ୍ରକୃତରେ ବିଜେଡିର ଏଜେଣ୍ଡା କ'ଣ ? ସପକ୍ଷରେ, ବିପକ୍ଷରେ ନା ବିବେକ ଅନୁସାରେ, ରାଜ୍ୟସଭାରେ ଭୋଟିଂ ପାଇଁ କ'ଣ ଥିଲା ନବୀନଙ୍କ ନିର୍ଦ୍ଦେଶ ? ଘଟଣା ଉପରେ ଯବନିକା ପଡିବା ଉଚିତ୍ ବୋଲି କହିଛନ୍ତି ବରିଷ୍ଠ ବିଜେଡି ନେତା ପଦ୍ନନାଭ ବେହେରା । ଖୁବଶୀଘ୍ର ଯବନିକା ପଡୁ, ଅଧିକ ସମୟ ନ ନେବା ଉଚିତ୍ । ସାଂସଦ ମୁନ୍ନା ଖାନ୍ କାର୍ଯ୍ୟାନୁଷ୍ଠାନ ପାଇଁ ସଭାପତିଙ୍କୁ ଭେଟିଛନ୍ତି । ଅନୁଧ୍ୟାନ ପରେ କାର୍ଯ୍ୟାନୁଷ୍ଠାନ ହେବ କହିଛନ୍ତି ପଦ୍ମନାଭ ।

ସେପଟେ ଦଳ ଦଳ ହୋଇ ନବୀନଙ୍କୁ ଭେଟିବା । ପୁଣି ଦଳରେ କାହାର କାହା ସହ କଥା ମେଳି ନଖାଇବା । ୱକଫ୍ କୁ ନେଇ ଭିନ୍ନ ମତ ପ୍ରକାଶ ପାଇବା ଏଇଆ ଦର୍ଶାଉଛି ଯେ ବିଜେଡି ଭାଗ ଭାଗ ହୋଇଯାଇଛି । ବିଜେଡି ନେତା ମଧ୍ୟ ବାଗ ଭାଗ ହୋଇଯାଇଛନ୍ତି । ଦଳ କନ୍ଦଳ ଜଳ ଜଳ ହୋଇ ପଦାରେ ପଡିଥିବା ବେଳେ ବରିଷ୍ଠ କହୁଛନ୍ତି ସବୁ ଠିକ୍ ଅଛି ।