ଜୟ ଜଗନ୍ନାଥ କହି ଅଭିଭାଷଣ ଆରମ୍ଭ କଲେ ପ୍ରଧାନମନ୍ତ୍ରୀ । ଏହାସହ ବାବା ଲିଙ୍ଗରାଜଙ୍କ ନାମ ବି ନେଲେ ପ୍ରଧାନମନ୍ତ୍ରୀ ମୋଦି । ଓଡ଼ିଶାର ପ୍ରଥମ ବିଜେପି ସରକାର ସଫଳତାର ସହ ଏକ ବର୍ଷ ପୂରଣ କରିଛି । 20 ଜୁନ୍ ଖୁବ୍ ବିଶେଷ ଦିନ । ବର୍ଷପୂର୍ତ୍ତି କେବଳ ସରକାରର ନୁହେଁ, ସୁଶାସନ ସ୍ଥାପନାର ବର୍ଷପୂର୍ତ୍ତି । ଜନସେବା ଓ ଜନବିଶ୍ବାସକୁ ସମର୍ପିତ ଏହି ଏକ ବର୍ଷ । ଓଡ଼ିଶାର କୋଟି କୋଟି ମତଦାତାଙ୍କ ବିଶ୍ବାସ ରଖିବାର ଏହି ଏକ ବର୍ଷ । ମୁଖ୍ୟମନ୍ତ୍ରୀ ମୋହନ ମାଝୀ ଓ ତାଙ୍କର ପୁରା ଟିମକୁ ଅଭିନନ୍ଦନ । ନିରନ୍ତର କାମ କରି ଓଡ଼ିଶାର ବିକାଶକୁ ନୂଆ ଗତି ଦେଇଛି ବିଜେପି ସରକାର ବୋଲି କହିଛନ୍ତି ପ୍ରଧାନମନ୍ତ୍ରୀ ।

ଓଡ଼ିଶା କେବଳ ରାଜ୍ୟ ନୁହେଁ, ଭାରତର ଆଭିଜାତ୍ୟର ଦିବ୍ୟ ତାରକା । ଓଡ଼ିଶା ଭାରତୀୟ ସଂସ୍କୃତିକୁ ସମୃଦ୍ଧ କରିଆସିଛି । ଓଡ଼ିଶା ଭୂମିକା ଏବେ ଆହୁରି ବଡ଼ ହୋଇଯାଇଛି । ଗତ 1 ବର୍ଷରେ ଓଡ଼ିଶା ବିକାଶ ବି ଓ ଆଭିଜାତ୍ୟ ବି ମନ୍ତ୍ରକୁ ଆଗକୁ ନେଇ ଚାଲିଛି । ବିଜେପି ସରକାରର 1 ବର୍ଷ ପୂର୍ତ୍ତି ବେଳେ ଜଗନ୍ନାଥଙ୍କ ରଥଯାତ୍ରା ପ୍ରସ୍ତୁତି ଚାଲିଛି । ମହାପ୍ରଭୁ ଆମ ପାଇଁ ଆରାଧ୍ୟ ଓ ପ୍ରେରଣା ଉଭୟ । ଶ୍ରୀମନ୍ଦିର ସହ ଜଡ଼ିତ ପ୍ରସଙ୍ଗର ଗତ ଏକ ବର୍ଷରେ ସମାଧାନ ହୋଇଛି । କୋଟି କୋଟି ଭକ୍ତଙ୍କ ନିବେଦନର ମାନ ରଖିଛନ୍ତି ମୋହନ ସରକାର । ସରକାର ଗଠନ ହେବା କ୍ଷଣି ଶ୍ରୀମନ୍ଦିର ଚାରି ଦ୍ବାର ଖୋଲାଯାଇଥିଲା । ଶ୍ରୀମନ୍ଦିର ରତ୍ନଭଣ୍ଡାର ବି ଖୋଲାଯାଇସାରିଛି । ଏହା କୋଟି କୋଟି ଭକ୍ତଙ୍କ ଆସ୍ଥାର ସମ୍ମାନ କରିବାର କାର୍ଯ୍ୟ କରାଯାଇଛି ।