Argus News - ୱାକଫ ସଂଶୋଧନ ବିଲକୁ ନେଇ ସଂସଦରେ ଘମାସାନ

ସିଏଏ, ଟ୍ରିପିଲ ତଲାକ୍, ୟୁସିସି ପରେ ମୋଦି ସରକାରଙ୍କ ବଡ଼ ପଦକ୍ଷେପ । ବିରୋଧୀଙ୍କ ତୀବ୍ର ବିରୋଧ ସତ୍ବେ ଲୋକସଭାରେ ଆଜି ସଂଶୋଧିତ ଓ୍ବାକଫ୍ ବିଲ୍ ଆଗତ କରିଛନ୍ତି ସଂସଦୀୟ ଓ ସଂଖ୍ୟାଲଘୁ ବ୍ୟାପାର ମନ୍ତ୍ରୀ କିରଣ ରିଜିଜୁ । ବିଲ୍ କୁ ନେଇ ଦୀର୍ଘ ୮ ଘଣ୍ଟାର ଚର୍ଚ୍ଚା ଅବଧି ଧାର୍ଯ୍ୟ ହୋଇଥିଲେ ବି ପ୍ରଥମରୁ ଗୃହରେ କେବଳ ବିରୋଧର ସ୍ବର ତୀବ୍ର କରିଛନ୍ତି ବରୋଧୀ । ସଂଶୋଧିତ ବିଲ୍ ରେ କୌଣସି ମୁସଲିମ୍ ସମ୍ପ୍ରଦାୟର ସମ୍ପତ୍ତି ଛଡାଇ ନିଆଯିବ ନାହିଁ। ଆଲୋଚନା ପରେ ବିଧେୟକ ଉପରେ ଭୋଟିଂ ହେବ ବୋଲି ସ୍ପଷ୍ଟ କରିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ କିରଣ ରିଜିଜୁ । ବିଲ କୁ ସାମ୍ବିଧାନିକ ବ୍ୟବସ୍ଥା ବିରୋଧୀ ଓ ସଂଖ୍ୟାଲଘୁ ବିରୋଧୀ କହି ଜୋରଦାର ହଙ୍ଗାମା କରିଛନ୍ତି କଂଗ୍ରେସ ସମେତ ଅନ୍ୟ ବିରୋଧୀ ସାଂସଦ । ଦେଶରେ ୮.୭୨ ଲକ୍ଷ ୱାକଫ ସଂପତ୍ତି ରହିଥିଲେ ବି ସଂଖ୍ୟାଲଘୁ ଗରିବ କାହିଁକି ବୋଲି ପାଲଟା ପ୍ରଶ୍ନ କରି ବିରୋଧୀଙ୍କୁ ଦୃଢ଼ ଜବାବ ଦେଇଛନ୍ତି ସଂଖ୍ୟାଲଘୁ ବ୍ୟାପାର ମନ୍ତ୍ରୀ ।

JDU, TDP, LJP, ଶିବସେନା-ସିନ୍ଦେ ଗୋଷ୍ଠୀ, NCP-ଅଜିତ ପାୱାର ଗୋଷ୍ଠୀ, RLD, JDS ପ୍ରମୁଖ ବିଲ୍ କୁ ସମର୍ଥନ କରିଥିବାବେଳେ ଇଣ୍ଡିମେଣ୍ଟ କରିଛି ଜୋରଦାର ବିରୋଧ । ମୁସଲମାନଙ୍କ ଧାର୍ମିକ ସ୍ବାଧୀନତା ଉପରେ ଅଙ୍କୁଶ ଲଗାଯାଉଛି ବୋଲି ବିରୋଧୀଙ୍କ ଅଭିଯୋଗକୁ ମଧ୍ୟ ଖଣ୍ଡନ କରିଛନ୍ତି ଆଇନ ମନ୍ତ୍ରୀ । ୱାକଫ ବିଲ୍ କୌଣସି ଧାର୍ମିକ ବ୍ୟବସ୍ଥା ବିରୋଧୀ ନୁହେଁ ବୋଲି କହିବା ପରେ ବି ଥମିନାହିଁ ବିରୋଧୀଙ୍କ ନାରାବାଜି । ୱାକଫ ସଂଶୋଧନ ବିଲ୍ ୱାକଫ ସମ୍ପତ୍ତିର ସୁରକ୍ଷା କରିବା ସହ ଗରିବ ସଂଖ୍ୟାଲଘୁଙ୍କ ପାଇଁ ବରଦାନ ହେବ ବୋଲି କହିଛନ୍ତି ବିଜେପି ସାଂସଦ ରବିଶଙ୍କର ପ୍ରସାଦ ।

ଗତବର୍ଷ ୮ ଅଗଷ୍ଟ ରେ ଲୋକସଭାରେ ବିଲ ଆଗତ କରି ଯୁଗ୍ମ ସଂସଦୀୟ କମିଟିକୁ ପଠାଇଥିଲେ ସରକାର । ଦେଶର ବିଭିନ୍ନ ସ୍ଥାନରେ ୩୬ଟି ବୈଠକରେ କମିଟିକୁ ମୋଟ୍‌ ୯୭ ଲକ୍ଷ ୨୭ ହଜାର ୭୭୨ଟି ସ୍ମାରକପତ୍ର ମିଳିଥିଲା । ବୁଧବାର ଲୋକସଭାରେ ବିଲ୍ ପାରିତ ହେବା ପରେ ଗୁରୁବାର ରାଜ୍ୟସଭାରେ ବିଲ୍ ପାରିତ କରିବାକୁ ଲକ୍ଷ୍ୟ ରଖିଛନ୍ତି ସରକାର । ଉଭୟ ଲୋକସଭା ଓ ରାଜ୍ୟସଭାରେ ସରକାରଙ୍କ ସପକ୍ଷରେ ରହିଛି ସଂଖ୍ୟା ଗଣିତ । ବିଲ୍ ପାସ୍ ପାଇଁ ଲୋକସଭାରେ ୨୭୨ ସମର୍ଥନ ଜରୁରୀଥିବାବେଳେ ସରକାରଙ୍କ ସପକ୍ଷରେ ରହିଛି ୨୯୨ରୁ ଅଧିକ ସମର୍ଥନ । ସେହିପରି ରାଜ୍ୟସଭାରେ ୧୧୯ ସାଂସଦଙ୍କ ସମର୍ଥନ ଆବଶ୍ୟକ ଥିବାବେଳେ ସରକାରଙ୍କ ସମର୍ଥନରେ ଅଛନ୍ତି ୧୨୫ ସାଂସଦ।