ଉପରାଷ୍ଟ୍ରପତି ନିର୍ବାଚନ ପାଇଁ ଉତ୍କଣ୍ଠା । ଏନଡିଏ ପ୍ରାର୍ଥୀ ସି.ପି. ରାଧାକ୍ରିଷ୍ଣନ୍ ଓ ଇଣ୍ଡିମେଣ୍ଟ ପ୍ରାର୍ଥୀ ବି. ସୁଦର୍ଶନ ରେଡ୍ଡିଙ୍କ ମଧ୍ୟରେ ଟକ୍କର । ଆସନ୍ତାକାଲି ପାର୍ଲାମେଣ୍ଟ ହାଉସରେ ନିର୍ଣ୍ଣାୟକ ଭୋଟ୍ । ନିର୍ବାଚନରେ NDAର ଶତ ପ୍ରତିଶତ ମତଦାନ ପାଇଁ ବିଜେପି ରଣନୀତି ପ୍ରସ୍ତୁତ କରିଛି । ସାଂସଦମାନେ କେମିତି ମତଦାନ କରିବେ ସେ ସମ୍ପର୍କରେ NDA ସାଂସଦମାନଙ୍କର ୱାର୍କ ସପ୍ ରଖାଯାଇଥିଲା । ସମ୍ବିଧାନର ଧାରା 66 ଅନୁସାରେ ଇଲେକ୍ଟୋରାଲ କଲେଜ ମାଧ୍ୟମରେ ହେବ ଉପରାଷ୍ଟ୍ରପତି ନିର୍ବାଚନ । ମୋଟ୍ 788 ଇଲେକ୍ଟୋରାଲ କଲେଜ ଭୋଟ୍ ମଧ୍ୟରୁ ଏବେ 6 ଜଣ ସାଂସଦଙ୍କ ପଦ ଖାଲି ରହିଛି। ତେଣୁ 782 ଜଣ ସଦସ୍ୟ ଏଥର ଉପରାଷ୍ଟ୍ରପତି ନିର୍ବାଚନରେ ଭୋଟ ଦେବେ। ବିଜୟ ପାଇଁ ଆବଶ୍ୟକ ସଂଖ୍ୟା ହେଉଛି 394। NDA ପାଖରେ 422 ସାଂସଦଙ୍କ ସମର୍ଥନ ରହିଥିବାରୁ ସି.ପି ରାଧାକ୍ରିଷ୍ଣନଙ୍କ ବିଜୟ ସମ୍ଭାବନା ଉଜ୍ଜ୍ବଳ ।

ସେପଟେ ଉପରାଷ୍ଟ୍ରପତି ନିର୍ବାଚନ ପୂର୍ବରୁ ସାଂସଦ ପ୍ରତାପ ଷଡ଼ଙ୍ଗୀଙ୍କ ବାସ ଭବନରେ ଏକାଠି ହୋଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବିଜେପି ରାଜ୍ୟ ସଭାପତି ମନମୋହନ ସାମଲ। ବିଜେପି ପ୍ରଭାରୀ ବିଜୟ ପାଲ ସିଂ ତୋମରଙ୍କ ସହ ଓଡ଼ିଶାର ବିଜେପି ସାଂସଦ ମାନେ ଯୋଗ ଦେଇଥିଲେ । ସେପଟେ ଭୋଟିଂରୁ ବିରତ ରହିବାକୁ ଘୋଷଣା କରିଛନ୍ତି ବିଜେଡି ଓ ଭାରତୀୟ ରାଷ୍ଟ୍ର ସମିତି । ବିଜେଡି ସଭାପତି ନବୀନ ପଟ୍ଟନାୟକ ଦଳର ବରିଷ୍ଠ ନେତା ଓ ସାଂସଦ ମାନଙ୍କ ସହ ଆଲୋଚନା ପରେ ଭୋଟିଂରୁ ବିରତି ରହିବାକୁ ନିଷ୍ପତ୍ତି ନିଆଯାଇଥିବା କହିଛନ୍ତି ବିଜେଡି ସାଂସଦ ସସ୍ମିତ ପାତ୍ର । ସେପଟେ କେନ୍ଦ୍ରମନ୍ତ୍ରୀ ଜୁଏଲ ଓରାମ କହିଛନ୍ତି,ଉପରାଷ୍ଟ୍ରପତି ନିର୍ବାଚନରେ ବିରତ ରହିବା ଅର୍ଥ ଏନଡିଏକୁ ସପୋର୍ଟ କରିବା । ବିଜେଡି ବିରତ ରହିଲେ ଏନଡିଏକୁ ଫାଇଦା ମିଳିବ ।

Argus News | argus news | -Argusnews Home: Odisha Latest News, Breaking News, Trending News, Live TV and more