Bahuda Yatra 2026 / ଭୋଭୋ କାନ୍ଦୁଛନ୍ତି ଭକ୍ତ, ଶ୍ରୀମନ୍ଦିର ଫେରିବେ କାଳିଆ ସାଆନ୍ତ

ଭକ୍ତିର ମହାସ୍ରୋତରେ ଆଜି ଉଛୁଳି ଉଠିଛି ଶ୍ରୀକ୍ଷେତ୍ର... ନଅ ଦିନର ଆଡ଼ପମଣ୍ଡପ ଲୀଳା ସାରି ଆଜି ପୁଣି ନୀଳାଚଳ ଅଭିମୁଖେ ବାହୁଡ଼ିଯିବେ ମହାପ୍ରଭୁ । ଆଷାଢ଼ ଶୁକ୍ଳପକ୍ଷ ଦ୍ୱିତୀୟାରେ ରତ୍ନବେଦୀ ଛାଡ଼ି ଜନ୍ମବେଦୀକୁ ଯାଇଥିବା ତିନିଠାକୁର, ଏବେ ଦଶମୀ ତିଥିରେ ଭାଇ ବଳଭଦ୍ର ଓ ଭଉଣୀ ସୁଭଦ୍ରାଙ୍କୁ ସାଥିରେ ନେଇ ଫେରିବେ ଶ୍ରୀମନ୍ଦିର ।

ବଡ଼ଦାଣ୍ଡରେ ଗଡ଼ିବ ତିନିରଥ, ଆଉ ଘଣ୍ଟ, ଶଙ୍ଖ, ହୁଳହୁଳି ଓ ‘ଜୟ ଜଗନ୍ନାଥ’ ଧ୍ୱନିରେ ପ୍ରକମ୍ପିତ ହୋଇଉଠୁଛି ପୁରୀ । ଅପରାହ୍ଣ ୪ଟାରୁ ରଥଟଣା ପାଇଁ ନୀତି ନିର୍ଘଣ୍ଟ ଧାର୍ଯ୍ୟ ହୋଇଥିବାବେଳେ ସମସ୍ତ ପ୍ରସ୍ତୁତି ଶେଷ । ଲକ୍ଷଲକ୍ଷ ଭକ୍ତଙ୍କ ମଧ୍ୟରେ ଦିବ୍ୟ ବାହୁଡ଼ାର ସେହି ଅପୂର୍ବ ମୁହୂର୍ତ୍ତକୁ ନେଇ ଉତ୍ସବମୁଖର ପୁରୀ । ଶରଧାବାଲିରେ ଆଜି ଭାବର ବନ୍ୟା ।

ଏପଟେ ଗୁଣ୍ଡିଚା ମନ୍ଦିର ସମ୍ମୁଖରେ ଲକ୍ଷଲକ୍ଷ ଭକ୍ତଙ୍କ ଭିଡ଼, ସେପଟେ ତିନିରଥ ଉପରେ ବିରାଜମାନ ତିନିଠାକୁରଙ୍କ ଦର୍ଶନ ପାଇଁ ସମସ୍ତଙ୍କ ଆଖି ଅପେକ୍ଷାରେ । ଆଉ କିଛି କ୍ଷଣ ପରେ ଆରମ୍ଭ ହେବ ରଥଟଣା । ନଅ ଦିନର ଆଡ଼ପମଣ୍ଡପ ଲୀଳାଖେଳା ସାରି ଏବେ ନୀଳାଚଳ ଅଭିମୁଖେ ଫେରିବାକୁ ପ୍ରସ୍ତୁତ ମହାପ୍ରଭୁ । କିନ୍ତୁ ଏହି ଫେରା ମୁହୂର୍ତ୍ତ ଭକ୍ତଙ୍କ ପାଇଁ ସହଜ ନୁହେଁ । କାହାର ଆଖିରେ ଲୁହ, କାହାର ହାତ ଉପରେ, ଆଉ କାହାର ମୁହଁରେ କେବଳ ଗୋଟିଏ ଡାକ ‘ହେ କାଳିଆ, ପୁଣି କେବେ ଦେଖା ଦେବୁ ।’

Latest Update: LIVE Bahuda Yatra Live Update from Bada Danda

ଶରଧାବାଲିରେ ଭକ୍ତମାନେ ଭୋଭୋ ହୋଇ କାନ୍ଦୁଛନ୍ତି, ଧୂଳିରେ ଗଡ଼ି ଦଣ୍ଡବତ ହେଉଛନ୍ତି । ମହାପ୍ରଭୁ ଆଗକୁ ବଢ଼ୁଛନ୍ତି, କିନ୍ତୁ ଭକ୍ତଙ୍କ ମନ ତାଙ୍କୁ ଛାଡ଼ିବାକୁ ପ୍ରସ୍ତୁତ ନୁହେଁ। ଘଣ୍ଟ, ଶଙ୍ଖ, ହୁଳହୁଳି ଓ ‘ଜୟ ଜଗନ୍ନାଥ’ ଧ୍ୱନିରେ ସାରା ପରିବେଶ ଭକ୍ତିମୟ। ଏହା କେବଳ ଏକ ଯାତ୍ରା ନୁହେଁ, ଏହା ଭକ୍ତ ଓ ଭଗବାନଙ୍କ ମଧ୍ୟରେ ଭାବର ଅଦ୍ଭୁତ ବିନିମୟ।
ଗୁଣ୍ଡିଚା ମନ୍ଦିର ସାମ୍ନାରେ ଲକ୍ଷଲକ୍ଷ ଭକ୍ତ ତିନିଠାକୁରଙ୍କୁ ଚାହିଁବସିଛନ୍ତି । ଆଉ କିଛି ସମୟ ପରେ ଆରମ୍ଭ ହେବ ରଥଟଣା । ଲୀଳାଖେଳା ସାରି ଠାକୁର ମନ୍ଦିରକୁ ଫେରିଯିବାକୁ ପ୍ରସ୍ତୁତ । ଯାହାକୁ ନେଇ ଭକ୍ତ ବି ଭୋଭୋ ହୋଇ ଶରଧାବାଲିରେ କାନ୍ଦିକାନ୍ଦି ଦଣ୍ଡବତ ହେଉଛନ୍ତି ।

ଲୁହଭରା ଆଖିରେ ହାତଯୋଡ଼ି ବ୍ରହ୍ମାଣ୍ଡ ଠାକୁରଙ୍କୁ ପ୍ରାର୍ଥନା କରୁଛନ୍ତି, ହେ ଠାକୁରେ.... ଆଉ କିଛି ସମୟ ପରେ ଆପଣ ଶ୍ରୀମନ୍ଦିର ଅଭିମୁଖେ ବାହୁଡ଼ିଯିବେ । ପୁଣି ଆପଣଙ୍କୁ ଭକ୍ତଙ୍କ ଗହଣ‌ରେ ଦେଖିବାକୁ ଗୋଟାଏ ବର୍ଷ ଅପେକ୍ଷା କରିବାକୁ ହେବ। ସେତେଦିନ ଯାଏଁ ଆପଣଙ୍କ କୃପା ଦୃଷ୍ଟି ଏଜଗତ ଉପରେ ରଖିଥିବ ପ୍ରଭୁ... ଏ ସମାଜର ମଙ୍ଗଳ ହେଉ ଏତିକି ପ୍ରାର୍ଥନା ପ୍ରଭୁ। ଆପଣଙ୍କ କରୁଣା ପାଇଁ ଏ ଶରୀରରେ ଜୀବନ ଅଛି। ସାହା ହୋଇଥିବ ପ୍ରଭୁ.. ସାହା ହୋଇଥିବ..... ଜୟ ଜଗନ୍ନାଥ ଜୟ ଜଗନ୍ନାଥ...।