୩୩ତମ ଦିନରେ ଚଳଚଞ୍ଚଳ ରଥଖଳା । ଶେଷ ହୋଇଛି ତିନି ରଥର ମୁଖ୍ୟ ମହାରଣାଙ୍କ ତତ୍ତ୍ୱାବଧାନରେ ଦଣ୍ଡା ଫ୍ରେମର ବିଭିନ୍ନ ଅଂଶଗୁଡ଼ିକର ନମ୍ୱରିଂ ହୋଇ କଳସା ପାଇଁ ମାପ ଚିହ୍ନ ଗାରିଆ କାର୍ଯ୍ୟ । ଦଣ୍ଡା ଫ୍ରେମ ଖୋଲାଯାଇ, ଶ୍ରୀଜୀଉମାନଙ୍କର ପାଞ୍ଚଦଣ୍ଡାରେ ଲାଗିଥିବା ଅଂଶ ଗୁଡ଼ିକର କାପ, କଳଶା ଓ ବିନ୍ଧକାର୍ଯ୍ୟ ସମ୍ପନ୍ନ ହେବ । ପୂର୍ବାହ୍ନରେ ତିନିରଥ ଚକଅଖ ସଂଯୋଗ ସହ ଚକ ଥାକ ହୋଇ ଦିଗ ନିର୍ଣ୍ଣୟ କାର୍ଯ୍ୟ ସମ୍ପନ୍ନ ହେବ । ସୋମବାର ତିନି ରଥର ଚାରିଟି ଲେଖାଏଁ ଧ୍ୱଜବତା ନିର୍ମାଣ ଶେଷ ହୋଇଛି ।

ତିନିରଥର ବେଦି ସିଂହାସନ ଜଗତପୃଷ୍ଠ ସେଣିର ଚଉପଟ କାମ, ତାଳଧ୍ୱଜ ରଥ ଓ ନନ୍ଦିଘୋଷ ରଥର ଦୁଇଟି ପୋଲ ଗୟଳର ଚଉପଟ କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ଦର୍ପଦଳନ ରଥର ମହାରଣା ସେବକମାନେ ଧୂଳିଦଣ୍ଡାର ଚଉପଟ ପରେ ଗୋଲେଇ କାର୍ଯ୍ୟ ଶେଷ କରିଛନ୍ତି । ମହାପ୍ରଭୁଙ୍କ ଅନବସର ଗୃହ ପ୍ରସ୍ତୁତ ପାଇଁ ତାଳଧ୍ୱଜ ରଥର ମୁଖ୍ୟ ମହାରଣାଙ୍କ ତତ୍ତ୍ୱାବଧାନରେ ତିନିଟି ଅଣସର ଗୟଳ ଚଉପଟ ଓ ତାର ଗୋଲେଇ କାର୍ଯ୍ୟ ଶେଷ ପର୍ଯ୍ୟାୟରେ ରହିଛି ।

ରୂପକାର ସେବକମାନେ ତିନି ରଥ ନାଟ ଗୋଡ଼ରେ ଖୋଦେଇ ଓ ଚିତ୍ରାଙ୍କନ କାର୍ଯ୍ୟ ଜାରି ରଖିଛନ୍ତି । କରତୀ ସେବକ ନନ୍ଦିଘୋଷ ରଥର ପୋଲ ଗୟଳ ଚିରଟ ଶେଷ ପରେ ଦର୍ପଦଳନ ରଥର ୪୦ ଫୁଟିଆ ଧଉରା ପୋଲ ଗୟଳ କାଠର ଉଭୟ ପାର୍ଶ୍ୱରେ ଚିତାକାର୍ଯ୍ୟ ଜାରି ରଖିଛନ୍ତି । ଓଝା ସେବକ ତିନି ରଥର ଦଣ୍ଡା କଣ୍ଟା, ଗୟଳ କଣ୍ଟା, ଗରଗରା କଣ୍ଟା ନିର୍ମାଣ ଶେଷ ପର୍ଯ୍ୟାୟରେ ପହଞ୍ଚାଇଛନ୍ତି । ଆଜି ୨୦୫ ଜଣ ସେବକ ରଥ ନିର୍ମାଣ ସେବା ଯୋଗାଇଛନ୍ତି ।