ଭକ୍ତ ପ୍ରିୟ କାଳିଆ ସାଆନ୍ତ । ଭକ୍ତର ଭକ୍ତି ତାକୁ ପାଗଳ କରିଦିଏ । ଭକ୍ତ ପାଇଁ ସେ ସବୁକିଛି ତ୍ୟାଗ କରିଦେଇପାରେ । ନନ୍ଦିଘୋଷ ଛାଡି ବିଜେ କରିପାରେ ବଳରାମ ଦାସଙ୍କ ବାଲିରଥକୁ ତ ଷାଠିଏ ପଉଟି ଭୋଗ ଛାଡି ଖାଇ ପାରେ କରମା ବାଇର କ୍ଷୀରି ।

ଭକ୍ତ ଓ ଭଗବାନଙ୍କର ଭଲପାଇବାର ଏମିତି ଅନେକ କାହାଣୀ ରହିଛି । କାଳିଆର ଭକ୍ତ ପୀରତି ଖାଲି ଓଡିଶାରେ ସୀମିତ ନାହିଁ...ସୁଦୂର ମହାରାଷ୍ଟ୍ରର ଭକ୍ତ ପାଇଁ ବି ସେ ଧାରଣ କରିଥିଲେ ଗଜାନନ ବେଶ ବା ହାତୀ ବେଶ । ଯାହାରି ପାଇଁ ଆଜି ଏ ଆୟୋଜନ...ଏ ଆଡମ୍ବର ।

ମହାରାଷ୍ଟ୍ରର ଗଣପତି ଭଟ୍ଟ । ଗଣେଶ ଦେବତାଙ୍କର ପରମ ଭକ୍ତ । ଦିନେ ସେ ପୁରୀ ଆସିଥିଲେ । ତାଙ୍କର ପାଣ୍ଡିତ୍ୟ ପାଇଁ ସେ ରାଜାଙ୍କ ଦ୍ୱାରା ସମ୍ମାନିତ ହୋଇଥିଲେ । ରାଜା ତାଙ୍କୁ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ଅନୁରୋଧ କରିଥିଲେ । ଯୋଗକୁ ସେଦିନ ପଡିଥିଲା ସ୍ନାନପୂର୍ଣ୍ଣିମା ।

ହେଲେ ଭଟ୍ଟ ମହାଶୟ ସ୍ନାନବେଦୀରେ ପ୍ରଭୁ ଶ୍ରୀ ଜଗନ୍ନାଥଙ୍କୁ ଦର୍ଶନ କରିଥିଲେ ସତ । କିନ୍ତୁ ସ୍ନାନବେଦୀରେ ସେ ଯେଉଁ ଜଗନ୍ନାଥଙ୍କୁ ଦେଖିଲେ, ତାଙ୍କର ଧାରଣା ହେଲା ଏ ଯେହେତୁ ଗଣେଶରୂପ ନୁହନ୍ତି, ତେଣୁ ଏ ବ୍ରହ୍ମ ନୁହନ୍ତି । ସେ ନିରାଶ ମନରେ ଫେରିଗଲେ ।

ଏହା ଜାଣି ଶ୍ରୀଜଗନ୍ନାଥ ମୁଦିରଥ ସେବକଙ୍କୁ ସ୍ୱପ୍ନାଦେଶ ଦେଇ କହିଲେ ମୋର ପରମଭକ୍ତ ଗଣପତି ଭଟ୍ଟ ମୋର ଗଣପତି ରୂପର ଦର୍ଶନ ନପାଇ ନିରାଶ ମନରେ ଫେରିଯାଉଛି । ତୁମେ ଯାଇ ତାକୁ କୁହ ସେ ଆସି ଏକାଗ୍ର ଚିତ୍ତରେ ମୋର ଦର୍ଶନ କରୁ । ମୁଁ ତାକୁ ଗଣପତି ରୂପରେ ଦର୍ଶନ ଦେବି । ଏହାପରେ ଗଣପତି ଭଟ୍ଟ ଅଧାବାଟରୁ ଫେରିଥିଲେ । ଆଉ ଦେଖିବାକୁ ପାଇଥିଲେ ସ୍ନାନବେଦୀରେ ବିରାଜିତ ଥିବା ବିଗ୍ରହମାନେ ଆଉ କେହି ନୁହନ୍ତିଁ, ତାଙ୍କର ଚିର ଆରାଧ୍ୟ ଦେବତା ଗଜାନନ ।

ସେହିଦିନଠୁ ପ୍ରତିବର୍ଷ ସ୍ନାନମଣ୍ଡପରେ ପ୍ରଭୁଙ୍କର ହାତୀବେଶକୁ ଭକ୍ତମାନେ ଦର୍ଶନ କରିଆସୁଛନ୍ତି । କୁହାଯାଏ ସ୍ନାନଯାତ୍ରା ଓ ଗୁଣ୍ଡିଚା ଯାତ୍ରା ଏହି ଦୁଇଟି ଯାତ୍ରାରେ ଶ୍ରୀଜୀଉମାନେ ନିଜ ଇଚ୍ଛାରେ ରତ୍ନବେଦୀରୁ ଓହ୍ଲାଇ ଆସିଥାନ୍ତି ।

ଦେଖନ୍ତୁ ଏଠାରେ: Divine Darshan Of Lord Jagannath In 'Gajanana Besha' In Puri

ଭକ୍ତ ବତ୍ସଳ କାଳିଆ ସାଆନ୍ତ । ଦାସିଆ ବାଉରୀ ହାତରୁ ସେ ନଡିଆ ନେଇଛନ୍ତି, ବଳରାମ ଦାସଙ୍କ ଉପରେ ରାଜରୋଷରେ କ୍ଷୁବ୍ଧ ହୋଇ ନନ୍ଦିଘୋଷ ଛାଡି ବାଙ୍କୀ ମୁହାଣର ବାଲିରଥକୁ ଚାଲି ଯାଇଛନ୍ତି । ଜଗନ୍ନାଥ ଦାସଙ୍କ ଭକ୍ତିରେ ବିଭୋର ହୋଇ ମହୋଦଧିକୁ ସାତଲହଡି ପର୍ଯ୍ୟନ୍ତ ଘୁଞ୍ଚାଇ ଆଣିଛନ୍ତି । ଛଦ୍ମ ଜୟଦେବ ବେଶରେ ଗୀତଗୋବିନ୍ଦର ଅପୂର୍ଣ୍ଣ ପଦ ପୂରଣ କରିଛନ୍ତି ।

ରତ୍ନ ମୁଦି ବନ୍ଧା ଦେଇ ମାଣିକ ଗଉଡୁଣୀ ଠାରୁ ଦହି ଖାଇଛନ୍ତି । ଶ୍ରୀମନ୍ଦିର ପ୍ରତିଷ୍ଠାତା ରାଜା ଇନ୍ଦ୍ରଦ୍ୟୁମ୍ନଙ୍କ ପୁତ୍ର ହୋଇ ପୟାଶ୍ରାଦ୍ଧରେ ପିଣ୍ଡଦାନ କରିଛନ୍ତି । ଗଜପତିଙ୍କ ପାଇଁ କାଞ୍ଚି ଅଭିଯାନରେ ଯାଇଛନ୍ତି । ଏମିତି ପ୍ରଭୁଙ୍କ କେତେ ଅଦ୍ଭୂତ, ଅଲୌକିକ ଲୀଳା । ସେମିତି ସେହି ଭକ୍ତମାନଙ୍କ ମଧ୍ୟରୁ ଜଣେ ଗଣପତି ଭଟ୍ଟ । ଯାହାଙ୍କ ପାଇଁ ସ୍ନାନଯାତ୍ରା ଦିନ 108 ସୁବାସିତ ଗରା ଜଳରେ ସ୍ନାନ ପରେ ହାତୀବେଶରେ ଦର୍ଶନ ଦିଅନ୍ତି ମହାପ୍ରଭୁ ।

ଦୁଃଖୀ ରଙ୍କୀ, ପାପୀ ତପୀ ସମସ୍ତଙ୍କ ପାଇଁ ତାଙ୍କ ଦୁଆର ସାଆଣ ମେଲା । ତାଙ୍କ ପାଖରେ ଜାତି ଅଜାତି, ଧନୀ ଗରିବ ବଡ ସାନର ବିଚାର ନାହିଁ କି ଆଭିଜାତ୍ୟର ଅହଙ୍କାର ନାହିଁ । ଯିଏ ଯେଉଁ ଭାବରେ ତାଙ୍କୁ ଡାକିଛି, ସେ ରୂପରେ ସେ ଦେଖା ଦେଇଛନ୍ତି । ତାଙ୍କ ପୀଠରେ ଗଜପତି ଚଣ୍ଡାଳର କାମ କରନ୍ତି । ତାଙ୍କ ଆନନ୍ଦ ବଜାରରେ ଜାତି, ଧର୍ମ ବର୍ଣ୍ଣ ନିର୍ବିଶେଷରେ ସମସ୍ତେ ଏକତ୍ର ପ୍ରସାଦ ସେବନ କରନ୍ତି । ସେ ଭକ୍ତ ବତ୍ସଳ । ଭକ୍ତି ଓ ଭାବାବେଗରେ ବଶୀଭୂତ ।