ପୁଣି ଇଣ୍ଡିଆ ଟିମରେ ବଡ଼ ବିବାଦ ଦେଖାଦେଇଛି। ଗମ୍ଭୀର, କୋହଲି, ରୋହିତଙ୍କ ମଧ୍ୟରେ ବର୍ଡର ଗାଭାସ୍କର ଟ୍ରଫି ୨୦୨୪-୨୫ରେ ଟିମ୍ ଇଣ୍ଡିଆ ପଛରେ ପଡ଼ିଯାଇଛି। ଏହାରି ଭିତରେ ସାମ୍ନାକୁ ଆସିଛି ଡ୍ରେସିଂ ରୁମ୍ ଗୁମର କଥା, ଗୌତମ ଗମ୍ଭୀରଙ୍କ ନାଲି ଆଖି ସମସ୍ତଙ୍କୁ ଦେଖିବାକୁ ପଡ଼ିଛି। ଜଣ ଜଣ କରି ସମସ୍ତଙ୍କ ଉପରେ ବର୍ଷିଛନ୍ତି ଗମ୍ଭୀର ବୋଲି ଶୁଣିବାକୁ ମିଳୁଛି। ଏହି ଘଟଣା କ୍ରିକେଟ ଜଗତରେ ହଇଚଇ ସୃଷ୍ଟି କରିଛି। ସିରିଜ ଆରମ୍ଭରୁ ଭାରତୀୟ ଦଳ ଗତ ୩ଟି ମ୍ୟାଚ୍ ରୁ ୨ଟିରେ ପରାଜୟ ବରଣ କରିଥିବା ବେଳେ ଗୋଟିଏ ମ୍ୟାଚ୍ ଡ୍ର ରହିଛି। ମେଲବର୍ଣ୍ଣ ଟେଷ୍ଟରେ ଭାରତୀୟ ଦଳର ପ୍ରଦର୍ଶନ ଅତ୍ୟନ୍ତ ଖରାପ ରହିଥିଲା, ଖେଳର ଶେଷ ଦିନରେ ଭାରତୀୟ ଇନିଂସ ତାସ୍ ଘର ଭଳି ଭୁଶୁଡ଼ି ପଡ଼ିଥିଲା। ତେବେ ଏବେ ନୂଆ ବର୍ଷ ଆରମ୍ଭ ହୋଇଛି ଏବଂ ଟିମ୍ ଇଣ୍ଡିଆ ଏକ ନୂଆ ଆରମ୍ଭ କରିବାକୁ ଲକ୍ଷ୍ୟ ରଖିଛି ।

କିନ୍ତୁ ବର୍ଷର ପ୍ରଥମ ଦିନରେ ଏକ ଆଶ୍ଚର୍ଯ୍ୟଜନକ ଖବର ସାମ୍ନାକୁ ଆସିଛି । ମିଡିଆ ରିପୋର୍ଟ ଅନୁସାରେ ଟିମ୍ ଇଣ୍ଡିଆର ଡ୍ରେସିଂ ରୁମରେ କିଛି ଠିକ୍ ନାହିଁ । ମେଲବର୍ଣ୍ଣ ଟେଷ୍ଟରେ ପରାଜୟ ପରେ ଟିମ୍ ଇଣ୍ଡିଆର ଡ୍ରେସିଂ ରୁମ୍ ରେ ତୀବ୍ର ଉତ୍ତେଜନା ପ୍ରକାଶ ପାଇଛି, ଯାହା ଆଶ୍ଚର୍ଯ୍ୟଜନକ ଭାବେ ସାମ୍ନାକୁ ଆସିଛି। ଗୌତମ ଗମ୍ଭୀର ଭାରତୀୟ ବ୍ୟାଟ୍ସମ୍ୟାନଙ୍କ ପ୍ରଦର୍ଶନରେ ଆଦୌ ଖୁସି ନୁହନ୍ତି। ଏଭଳି ସ୍ଥିତିରେ ମେଲବର୍ଣ୍ଣ ମ୍ୟାଚ୍ ହାରିବା ପରେ ଡ୍ରେସିଂ ରୁମ୍ ରେ ଗମ୍ଭୀରଙ୍କ କ୍ରୋଧ ରୋହିତ ଶର୍ମା-ବିରାଟ କୋହଲିଙ୍କ ସମେତ ସମଗ୍ର ଟିମ୍ ଇଣ୍ଡିଆ ଉପରେ ପଡ଼ିଥିଲା। ଗମ୍ଭୀର ଖେଳାଳିଙ୍କୁ କଡ଼ା ସମାଲୋଚନା କରି କହିଛନ୍ତି ଯେ ଆପଣ ଜାଗ୍ରତ ଅଛନ୍ତି କି ନାହିଁ।

ମୁଁ ଏତେ ଦିନ ଧରି କିଛି କହୁନାହିଁ, ଏହାର ଅର୍ଥ ନୁହେଁ ଯେ ଏହାକୁ ହାଲୁକା ଭାବରେ ଗ୍ରହଣ କରନ୍ତୁ । ଏହାବ୍ୟତୀତ ଗମ୍ଭୀର ଖେଳାଳିମାନଙ୍କୁ ଚେତାବନୀ ଦେଇଛନ୍ତି ଯେ ଯେଉଁମାନେ ତାଙ୍କ ରଣନୀତି ଅନୁସରଣ କରନ୍ତି ନାହିଁ ସେମାନଙ୍କୁ ମଧ୍ୟ ଦଳରୁ ବାଦ୍ ଦିଆଯାଇପାରେ। ଜୁଲାଇ ୯ତାରିଖରେ କୋଚ୍ ଭାବେ ଦାୟିତ୍ୱ ଗ୍ରହଣ କରିଥିବା ଗମ୍ଭୀର ଏପର୍ଯ୍ୟନ୍ତ ଖେଳାଳିଙ୍କୁ ମୁକ୍ତ ସୁଯୋଗ ଦେଇଥିବାରୁ ତାଙ୍କ ଧୈର୍ଯ୍ୟ ଏବେ ଶେଷ ହୋଇଯାଇଛି। ତେବେ ଏବେ ସେ ଖରାପ ପ୍ରଦର୍ଶନରେ ବିରକ୍ତ ହୋଇ ଖେଳାଳିଙ୍କ ସମୀକ୍ଷା କରିଛନ୍ତି। ଏଥିରୁ ବାଦ ପଡ଼ିନାହାନ୍ତି ଦଳର କ୍ୟାପଟେନ ରୋହିତ ଶର୍ମା।