ଅର୍ଗସ ବ୍ୟୁରୋ:ପ୍ୟାରିସ ଅଲମ୍ପିକ୍ସରେ ଦେଶକୁ ତୃତୀୟ ପଦକ ଭେଟିଛନ୍ତି ସୁଟର ସ୍ୱପ୍ନିଲ କୁଶାଲେ। ୫୦ ମିଟର ରାଇଫଲ ଥ୍ରୀ-ପୋଜିସନ ଫାଇନାଲରେ ବ୍ରୋଞ୍ଜ ଜିତି ରଚିଛନ୍ତି ଇତିହାସ । ପ୍ୟାରିସ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତିଥିବା ସ୍ୱପ୍ନିଲଙ୍କୁ ଛୁଟୁଛି ପୁରସ୍କାରର ସୁଅ । ସ୍ୱପ୍ନିଲଙ୍କ ପାଇଁ ରେଳବାଇ ଓ ମହାରାଷ୍ଟ୍ର ସରକାରଙ୍କ ତରଫରୁ ଦୁଇଟି ବଡ଼ ଘୋଷଣା କରାଯାଇଛି । ସ୍ୱପ୍ନିଲଙ୍କୁ ୧ କୋଟି ଟଙ୍କା ପ୍ରଦାନ କରିବାକୁ ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ଘୋଷଣା କରିଥିବାବେଳେ ,ଭାରତୀୟ ରେଳବାଇରେ ଟିକେଟ କଲେକ୍ଟର ଭାବେ କାର୍ଯ୍ୟରତ ସ୍ୱପ୍ନିଲଙ୍କ  ହେବ ପ୍ରମୋସନ । ସ୍ୱପ୍ନିଲଙ୍କୁ ଓଏସଡି ପଦକୁ ରେଲୱେ ପକ୍ଷରୁ ପ୍ରମୋସନ ଦିଆଯାଇଥିବା ନେଇ ରେଳ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଛି । ଅଲିମ୍ପିକ୍ସର ଷଷ୍ଠ ଦିବସରେ ପୁରୁଷ ୫୦ ମିଟର ରାଇଫଲ ୩ ପୋଜିସନ୍ସ ଫାଇନାଲରେ ସ୍ୱପ୍ନିଲ କୁସାଲେ ବ୍ରୋଞ୍ଜ ପଦକ ଜିତିଥିଲେ । ୧୦ ମିଟର ଏୟାର ପିସ୍ତଲ ଇଭେଣ୍ଟରେ ମନୁ ଭାକର ବ୍ରୋଞ୍ଜ ଜିତିଥିବା ବେଳେ ଏୟାର ପିସ୍ତଲ ମିକ୍ସଡ ଇଭେଣ୍ଟରେ ମନୁ ଭାକର-ସରବଜୋତ ସିଂହ ବ୍ରୋଞ୍ଜ ମେଡାଲ ଜିତିଥିଲେ ।