ଭୁବନେଶ୍ଵର: ଅର୍ଗସ ପକ୍ଷରୁ ଆୟୋଜିତ ପ୍ରଥମ କ୍ରିକେଟ୍ ଲିଗର ଚାମ୍ପିଅନ ହୋଇଛି ଅର୍ଗସ ୱାରିଅର ଟିମ୍ । ଏକ ରୋମାଞ୍ଚକର ଫାଇନାଲ ମ୍ୟାଚରେ ଅର୍ଗସ ଷ୍ଟ୍ରାଇକ୍ ଫୋର୍ସକୁ ୩ ରନରେ ହରାଇ ଟ୍ରଫି ହାତେଇଛି ଅର୍ଗସ ୱାରିଅର । ଫାଇନାଲରେ ପ୍ରଥମେ ବ୍ୟାଟିଂ କରି ଅର୍ଗସ ୱାରିଅର, ଅର୍ଗସ ଷ୍ଟ୍ରାଇକ୍ ଫୋର୍ସ ଆଗରେ ୭୦ ରନର ବିଜୟ ଲକ୍ଷ୍ୟ ରଖିଥିଲା ।

୭୧ ରନର ବିଜୟ ଲକ୍ଷ୍ୟ ନେଇ ବ୍ୟାଟିଂ କରିଥିବା ଅର୍ଗସ ଷ୍ଟ୍ରାଇକ୍ ଫୋର୍ସ ନିର୍ଦ୍ଧାରିତ ୧୦ ଓଭରରେ ୮ ୱିକେଟ୍ ହରାଇ ୬୮ ରନ କରିବାରେ ସକ୍ଷମ ହୋଇଥିଲା । ଖେଳ ଶେଷରେ ଅର୍ଗସ ନ୍ୟୁଜର ଏଡିଟର ଇନ୍ ଚିଫ୍ ସଞ୍ଜୟ ଜେନା ବିଜୟୀ ଓ ରନର୍ସ ଅଫ ଦଳକୁ ଟ୍ରଫି ସହ ପୁରସ୍କାର ରାଶି ପ୍ରଦାନ କରିଥିଲେ ।

ଏଭଳି କ୍ରିକେଟ୍ ଲିଗର ଆୟୋଜନ ପାଇଁ ବିଜୟୀ ଟିମର କ୍ୟାପଟେନ ତଥା ଅର୍ଗସ ନ୍ୟୁଜର ଏକଜିକ୍ୟୁଟିଭ୍ ଏଡିଟର ଦୁର୍ଗାଶିଷ ମ୍ୟାନେଜମେଣ୍ଟ ସହ ସମସ୍ତ ଟିମର ଖେଳାଳିଙ୍କୁ ଧନ୍ୟବାଦ ଜଣାଇଥିଲେ । ଅର୍ଗସ ଷ୍ଟ୍ରାଇକ୍ ଫୋର୍ସ ପକ୍ଷରୁ ଉଭୟ ବୋଲିଂ ଓ ବ୍ୟାଟିଂରେ ଚମତ୍କାର ପ୍ରଦର୍ଶନ କରିଥିବା କରନ ଦୁବେଙ୍କୁ ପ୍ଲେୟାର ଅଫ ଦ ସିରିଜି ଟ୍ରଫି ସହ ପୁରସ୍କାର ରାଶି ଦିଆଯାଇଥିଲା ।

ପଡ଼ିଆରେ ଶୃଙ୍ଖଳିତ ଖେଳ ପ୍ରଦର୍ଶନ ପାଇଁ ଅର୍ଗସ ଷ୍ଟ୍ରାଇକ୍ ଫୋର୍ସକୁ ଫେୟାର ପ୍ଲେ ପୁରସ୍କାର ମଧ୍ୟ ମିଳିଥିଲା । ନହରକଣ୍ଟା ଖେଳ ପଡ଼ିଆରେ ଅନୁଷ୍ଠିତ ହୋଇଥିଲା ସମସ୍ତ ଲିଗ ଓ ଫାଇନାଲ ମ୍ୟାଚ୍ । ଏଥିରେ ଅର୍ଗସ ନ୍ୟୁଜ୍ ଓ ଅର୍ଗସ ଡିଜିଟାଲ ପକ୍ଷରୁ ୪ଟି ଟିମ୍ ଭାଗ ନେଇଥିଲେ ।

ଅର୍ଗସ ୱାରିଅର, ଅର୍ଗସ ଷ୍ଟ୍ରାଇକ୍ ଫୋର୍ସ, ଅର୍ଗସ ୱାଇଲ୍ଡ ଡଗ୍ ଓ ଅର୍ଗସ ଫାଇଟର ମଧ୍ୟରେ ହୋଇଥିଲା ରୋମାଞ୍ଚକର ମୁକାବିଲା । ଅର୍ଗସ ଏଚଆର ହେଡ ରତିକାନ୍ତ ସାହୁ ପୂରା ଲିଗର ଆୟୋଜନରେ ମୁଖ୍ୟ ଭୂମିକା ନିଭାଇଥିଲେ । ପବିତ୍ର ପ୍ରଧାନ ଏବଂ ଚଣ୍ଡିପ୍ରସନ୍ନ ମହାପାତ୍ର ଅମ୍ପାୟାର ଦାୟିତ୍ଵ ତୁଲାଇଥିଲେ ।