ରବିବାର ସନ୍ଧ୍ୟାରୁ ଅନ୍ଲାଇନ୍ ଟିକେଟ୍, ଜାଣନ୍ତୁ କେଉଁ ଓ୍ୱେବ୍ସାଇଟ୍ରୁ କିଣିବେ...
ଅର୍ଗସ ବ୍ୟୁରୋ: ରବିବାର ସନ୍ଧ୍ୟାରୁ ମିଳିବ ବାରବାଟୀ ଟିକେଟ । ବାରବାଟୀ କ୍ରିକେଟ୍ ଷ୍ଟାଡିୟମରେ ଆସନ୍ତା ୯ ତାରିଖ ଭାରତ-ଇଂଲଣ୍ଡ ଦିନିକିଆ ମ୍ୟାଚ୍ । ଏହା ଦିନିକିଆ ସିରିଜ୍ର ଦ୍ବିତୀୟ ମୁକାବିଲା । ଏହି ଦିବାରାତ୍ର ମ୍ୟାଚ୍ ପାଇଁ ରବିବାର ଅପରାହ୍ଣରୁ ଆରମ୍ଭ ହେବ ଟିକେଟ୍ ବିକ୍ରି । ଅପରାହ୍ଣ ୪ଟା ପରେ ଅନ୍ଲାଇନ୍ ମାଧ୍ୟମରେ ଟିକେଟ୍ ବିକ୍ରି ହେବ ବୋଲି ଓସିଏ ପକ୍ଷରୁ ଶନିବାର ସୂଚନା ମିଳିଛି। ତେବେ ଟିକେଟ କିଣିବାକୁ ନେଇ ଖେଳ ପ୍ରେମିଙ୍କ ମନରେ ରହିଛି ପ୍ରବଳ ଉତ୍ସାହ ।
ଅନ୍ୟପଟେ ଦେଖିବାକୁ ଗଲେ ବାରବାଟୀ ମୁକାବିଲା ଯେତିକି ପାଖେଇ ଆସୁଛି, ଓଡ଼ିଶା କ୍ରିକେଟ୍ ଆସୋସିଏସନ୍ ସେତିକି ସକ୍ରିୟ ହେଉଛି। ସରକାର, ପ୍ରଶାସନ ମଧ୍ୟ ନିଜନିଜ ସ୍ତରରେ ପ୍ରସ୍ତୁତିକୁ ଚୂଡ଼ାନ୍ତ ରୂପ ଦେବାରେ ବ୍ୟସ୍ତ । ଏହାରି ମଧ୍ୟରେ କ୍ରିକେଟ୍ପ୍ରେମୀଙ୍କ ମନରେ ଉତ୍ସାହ ବଢ଼ିଯାଇଛି। ଦୀର୍ଘ ୬ ବର୍ଷ ପରେ ପୁଣି ବାରବାଟୀ ଷ୍ଟାଡିୟମରେ ଖେଳାଯିବ ଦିନିକିଆ ମ୍ୟାଚ୍ । ଯେଉଁଥିପାଇଁ ଚାତକ ଭଳି ଚାହିଁ ରହିଛନ୍ତି ଖେଳ ପ୍ରେମୀ ।
ଏଥର ୪ ହଜାର ଟିକେଟ୍ ଅନଲାଇନରେ ବିକ୍ରି ପାଇଁ ସ୍ଥିର ହୋଇଛି। ସେହିପରି ୫ ଓ ୬ ତାରିଖରେ ସାଧାରଣ ଦର୍ଶକଙ୍କ ପାଇଁ କାଉଣ୍ଟରରେ ପାଖାପାଖି ୨୦ ହଜାର ଅଫଲାଇନ୍ ଟିକେଟ୍ ମିଳିବ। ଅବଶିଷ୍ଟ ଅନୁବନ୍ଧିତ ୟୁନିଟକୁ ଟିକେଟ ପ୍ରଦାନ କରିବ ଓସିଏ। ଅଫଲାଇନ୍ ଟିକେଟ ବିକ୍ରି ବେଳେ ମହିଳାଙ୍କ ପାଇଁ ସ୍ବତନ୍ତ୍ର କାଉଣ୍ଟର ରହିବ ବୋଲି ମଧ୍ୟ କୁହାଯାଇଛି । ୪ଟି ବ୍ୟାରିକେଡ ମଧ୍ୟରେ ୬ଟି କାଉଣ୍ଟରରୁ ଟିକେଟ୍ କିଣିବେ ଦର୍ଶକ।
ଗ୍ୟାଲେରୀ ୨-ଟିକେଟ ଦର ୯୦୦ ଟଙ୍କା
ଗ୍ୟାଲେରୀ ୪-ଟିକେଟ ଦର ୯୦୦ ଟଙ୍କା
ଗ୍ୟାଲେରୀ ୭-ଟିକେଟ ଦର ୭୦୦ ଟଙ୍କା
ସ୍ପେସିଆଲ ଏନକ୍ଲୋଜର ୬,୦୦୦ ଟଙ୍କା
ଏସି ଗ୍ୟାଲେରୀ ବକ୍ସ ୮,୦୦୦ ଟଙ୍କା
ନ୍ୟୁ-ପ୍ୟାଭିଲିଅନ ୧୦,୦୦୦ ଟଙ୍କା
📱 Get Argus News App
✨ଅନ୍ଲାଇନ୍ ଟିକେଟ ପାଇବାକୁ ହେଲେ ଗୁଗୁଲରେ ଡିଷ୍ଟ୍ରିକ୍ଟ ମୁଭି ଇଭେଣ୍ଟ ଡାଇନିଂ ସର୍ଚ୍ଚ କରି ଆପଣ ଏହାର ଓ୍ବେବ୍ସାଇଟ୍କୁ ଯିବେ । ତାପରେ ଟିକେଟ କିଣି ପାରିବେ । ଉଭୟ ଓ୍ୱେବ୍ସାଇଟ୍ ଏବଂ ମୋବାଇଲ ଆପ୍ରେ ମଧ୍ୟ ଟିକେଟ କିଣି ହେବ । ଓ୍ୱେବ୍ସାଇଟକୁ ଯିବା ପରେ ଗୁରୁତ୍ୱର ସହ ଏହାର ଅପସନ୍ଗୁଡ଼ିକୁ ପଢ଼ିବେ ଆଉ କ୍ଲିକ କରିବେ ।
ଅନ୍ୟପଟେ ଆଉ ଏକ ବଡ଼ କଥା ହେଲା, ଏଥର କଳାହାଣ୍ଡିର କଳା ମାଟିରେ ତିଆରି ହୋଇଛି ପିଚ୍ । ଆଶା କରାଯାଉଛି ଏହି ବ୍ଲାକ୍ ସଏଲ ପିଚରେ ଦେଖିବାକୁ ମିଳିବ ହାଇସ୍କୋରିଂ ମ୍ୟାଚ୍ । ସେହିପରି ଅଷ୍ଟ୍ରେଲିଆରୁ ଆସିଥିବା ସ୍ୱତନ୍ତ୍ର ଖତକୁ ୩୦ ୟାର୍ଡରେ ପକାଯାଇଛି । ଦିବାରାତ୍ର ମ୍ୟାଚ ହୋଇଥିବାରୁ କାକର ପ୍ରତି ବିଶେଷ ଧ୍ୟାନ ଦିଆଯାଇଛି ।