ଚାମ୍ପିଅନ୍ସ ଟ୍ରଫି ବିଜେତା ଟିମ୍ ଇଣ୍ଡିଆକୁ ବଡ଼ ପରିମାଣର ପୁରସ୍କାର ମିଳିବ । ଭାରତୀୟ କ୍ରିକେଟ୍ କଣ୍ଟ୍ରୋଲ୍ ବୋର୍ଡ (BCCI) ୫୮ କୋଟି ଟଙ୍କା ପୁରସ୍କାର ବାବଦରେ ଦେବାକୁ ଘୋଷଣା କରିଛି । ଏହି ପୁରସ୍କାର ଅର୍ଥ ରାଶି ଦଳର ସମସ୍ତ ଖେଳାଳି, କୋଚିଂ ଓ ସହଯୋଗୀ ଷ୍ଟାଫଙ୍କ ମଧ୍ୟରେ ବାଣ୍ଟି ଦିଆଯିବ । ତେବେ ବିସିସିଆଇ ଏହା ସ୍ପଷ୍ଟ କରି ନାହିଁ କୋଚିଂ ଷ୍ଟାଫ ଓ ଖେଳାଳିଙ୍କୁ କେତେ ଲେଖାଏଁ ଅର୍ଥ ରାଶି ମିଳିବ ।

ଦୁବାଇରେ ଖେଳା ଯାଇଥିବା ଚାମ୍ପିଅନ୍ସ ଟ୍ରଫିର ଫାଇନାଲ୍ ମ୍ୟାଚ୍‌ରେ ନ୍ୟୁଜିଲାଣ୍ଡକୁ ୪ ୱିକେଟ୍‌ରେ ହରାଇଥିଲା ରୋହିତ ବାହିନୀ । ମାର୍ଚ୍ଚ ୯ରେ ଦୁବାଇର ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମ୍‌ରେ ଏହି ମ୍ୟାଚ୍ ଖେଳା ଯାଇଥିଲା । ଫାଇନାଲ୍ ମ୍ୟାଚ୍‌ରେ ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ନ୍ୟୁଜିଲାଣ୍ଡ ୫୦ ଓଭରରେ ୭ ୱିକେଟ୍ ହରାଇ ୨୫୧ ରନ୍ କରିବାରେ ସମର୍ଥ ହୋଇଥିଲା । ଜବାବରେ ଭାରତ ୪୯ ଓଭରରେ ୬ ୱିକେଟ୍ ହରାଇ ଲକ୍ଷ୍ୟ ହସାଲ କରିଥିଲା । ଅଧିନାୟକ ରୋହିତ ଶର୍ମା ୭୬ ରନ୍‌ର ପାଳି ଖେଳି ଦଳର ସ୍ଥିତି ସୁଦୃଢ଼ କରିଥିଲେ ।

ସବୁ ମ୍ୟାଚ୍ ଜିତିଥିଲା ଭାରତ

ଚାମ୍ପିଅନ୍ସ ଟ୍ରଫିର ଆୟୋଜକ ପାକିସ୍ତାନ ରହିଥିଲା । ପାକିସ୍ତାନ ସହ ଦୁବାଇରେ ହାଇବ୍ରିଡ୍ ମଡେଲରେ ଖେଳା ଯାଇଥିଲା ଟୁର୍ଣ୍ଣାମେଣ୍ଟ । ଦୁବାଇରେ ଭାରତ ସମସ୍ତ ମ୍ୟାଚ୍ ଖେଳିଥିବା ବେଳେ ଗୋଟିଏ ବି ହାରି ନଥିଲା । ଅର୍ଥାତ୍ ଟୁର୍ଣ୍ଣାମେଣ୍ଟରେ ଭାରତ ଥିଲା ଅପରାଜେୟ । ପ୍ରଥମ ମ୍ୟାଚରେ ଭାରତ, ବାଂଲାଦେଶକୁ ୬ ୱିକେଟ୍‌ରେ ହରାଇ ଅଭିଯାନ ଆରମ୍ଭ କରିଥିଲା । ଦ୍ଵିତୀୟ ମ୍ୟାଚରେ ୬ ୱିକେଟ୍‌ରେ ପାକିସ୍ତାନ ଓ ତୃତୀୟ ମ୍ୟାଚ୍‌ରେ ୪୪ ରନ୍‌ରେ ନ୍ୟୁଜିଲାଣ୍ଡକୁ ହରାଇଥିଲା । ସେହିଭଳି ସେମି ଫାଇନାଲ୍‌ରେ ୪ ୱିକେଟ୍‌ରେ ଅଷ୍ଟ୍ରେଲିଆକୁ ହରାଇଥିଲା ଭାରତୀୟ ଦଳ ।

ଏବେ ସୁଦ୍ଧା ଭାରତ ୩ଥର ଚାମ୍ପିଅନ୍ସ ଟ୍ରଫି ବିଜେତା ହୋଇଛି । ୨୦୦୨ରେ ଶ୍ରୀଲଙ୍କା ଚାମ୍ପିଅନ୍ସ ଟ୍ରଫିର ଆୟୋଜକ ରହିଥିଲା । ସେହିବର୍ଷ ଭାରତ-ଶ୍ରୀଲଙ୍କା ଯୁଗ୍ମ ବିଜେତା ଘୋଷିତ ହୋଇଥିଲେ । ୨୦୧୩ରେ ଇଂଲଣ୍ଡ ଆୟୋଜ ଥିବା ବେଳେ ଭାରତ ଜିତିଥିଲା ଚାମ୍ପିଅନ୍ସ ଟ୍ରଫି । ଏବେ ୨୦୨୫ରେ ଚାମ୍ପିଅନ୍ସ ଟ୍ରଫିର ଆୟୋଜକ ପାକିସ୍ତାନ ରହିଥିବା ବେଳେ ଭାରତ ଟାଇଟଲ୍ ହାତେଇଛି ।

ତେବେ ୯ ମାସ ମଧ୍ୟରେ ଅଧିନାୟକ ଭାବେ ରୋହିତ ଶର୍ମା ଲଗାତାର ୨ଟି ଆଇସିସି ଟ୍ରଫି ଜିତିଛନ୍ଚି । ଗତବର୍ଷ ଜୁନ୍ ୨୯ରେ ରୋହିତଙ୍କ ଅଧିନାୟକତ୍ଵରେ ଭାରତ ଟି-ଟ୍ଵେଣ୍ଟି ବିଶ୍ଵକପ୍ ଜିତିଥିଲା । ଆଉ ଏହା ପରେ ହିଁ ଅନ୍ତର୍ଜାତୀୟ ଟି-ଟ୍ଵେଣ୍ଟିରୁ ଅବସର ଘୋଷଣା କରିଥିଲେ ରୋହିତ ଶର୍ମା ।

Argus News | argus news | Odisha Latest News, Breaking News, Trending News, Live TV