ଆଉ ମାତ୍ର ୨ ଦିନର ଅପେକ୍ଷା, ଆରମ୍ଭ ହେବ ଆଇପିଏଲ୍ ମହାସମର । ଆଇପିଏଲ୍ ଆରମ୍ଭ ପୂର୍ବରୁ ପେସ୍ ବୋଲରଙ୍କ ଲାଗି ଆସିଛି ଖୁସି ଖବର । ପୁରୁଣା ପ୍ରତିବନ୍ଧକ ହଟିଛି । ଏଣିକି ବଲ୍‌ରେ ବୋଲର ଲାଳର ବ୍ୟବହାର କରି ପାରିବେ । ଏନେଇ ଆଇପିଏଲ୍‌ରେ ଭାଗ ନେଉଥିବା ଟିମ୍ ଗୁଡ଼ିକର ଅଧିନାୟକ ମାନେ ଗୁରୁବାର ସହମତି ଦେଇଛନ୍ତି ।

ଆଇସିସି ଚାମ୍ପିଅନ୍ସ ଟ୍ରଫି ସମୟରେ ଭାରତର ଅଭିଜ୍ଞ ଦ୍ରୁତ ବୋଲର ମହମ୍ମଦ ସାମି କହିଥିଲେ, ବଲ୍‌ରେ ଲାଳ ଲଗାଇବା ଜରୁରୀ । ନଚେତ ଏହା ସମ୍ପୂର୍ଣ୍ଣ ଭାବେ ବ୍ୟାଟ୍ସମ୍ୟାନଙ୍କ ପକ୍ଷରେ ଯିବ । ଆଉ ସାମିଙ୍କ ଏହି ସ୍ଵରକୁ ସମର୍ଥନ କରିଥିଲେ ଦକ୍ଷିଣ ଆଫ୍ରିକାର ଭର୍ଣ୍ଣନ ଫିଲାନ୍ଦର ଓ ନ୍ୟୁଜିଲାଣ୍ଡର ଟିମ ସାଉଥି ।

ଗୁରୁବାର ମୁମ୍ବାଇରେ ଆଇପିଏଲ୍ ଟିମ୍ ଅଧିନାୟକମାନଙ୍କ ବୈଠକରେ ଏହି ନିଷ୍ପତ୍ତି ହୋଇଛି । ବିସିସିଆଇର ଜଣେ ବରିଷ୍ଠ ଅଧିକାରୀ ଏନେଇ ପିଟିଆଇକୁ ସୂଚନା ଦେଇଛନ୍ତି । କହିଛନ୍ତି, ଲାଳ ଲଗାଇବା ପ୍ରତିବନ୍ଧକକୁ ହଟାଇ ଦିଆ ଯାଇଛି । ଅଧିକାଂଶ ଅଧିନାୟକ ଏହି ପଦକ୍ଷେପ ପକ୍ଷରେ ଥିଲେ ।

କୋଭିଡ୍ ମହାମାରୀ ସମୟରେ ଆଇସିସି ସୁରକ୍ଷା ଦୃଷ୍ଟିରୁ ବଲ୍‌ରେ ଲାଳ ଲଗାଇବା ଉପରେ ପ୍ରତିବନ୍ଧକ ଲଗାଇଥିଲେ । ଫଳରେ ଦଶନ୍ଧି ଧରି ବଲ୍‌କୁ ଚମକାଇବା ଲାଗି ଲାଳର ବ୍ୟବହାର ହୋଇ ଆସୁଥିବା ବେଳେ ବନ୍ଦ ହୋଇଥିଲା । ଏହା ପରେ ୨୦୨୨ ଏହି ପ୍ରତିବନ୍ଧକକୁ ସ୍ଥାୟୀ କରା ଯାଇଥିଲା ।

ଏହା ଉପରେ ବିସିସିଆଇ ପୂର୍ବରୁ ଆଲୋଚନା କରିଥିଲା ଏବଂ ଅଧିନାୟକମାନଙ୍କ ଉପରେ ନିଷ୍ପତ୍ତି ଛାଡ଼ିଥିଲା । ଆଉ ଆଜିର ବୈଠକରେ ଆଇପିଏଲ୍‌ର ଚଳିତ ସଂସ୍କରଣରେ ଲାଳର ବ୍ୟବହାର କରିବା ଲାଗି ନିଷ୍ପତ୍ତି ନିଆ ଯାଇଛି । ଯାହାକି ପେସ୍ ବୋଲରଙ୍କ ଲାଗି ବେଶ୍ ଲାଭଦାୟୀ ହୋଇପାରେ ।

୧୦ ଦଳ, ୭୪ ମୁକାବିଲା

ଆଇପିଏଲ୍‌ର ୧୮ତମ ସଂସ୍କରଣର ପ୍ରଥମ ମୁକାବିଲା ମାର୍ଚ୍ଚ ୨୨ରେ ଖେଳାଯିବ । ମୋଟ ୧୦ଟି ଦଳ ୧୩ଟି ଭେନ୍ୟୁରେ ୭୪ଟି ମ୍ୟାଚ୍ ଖେଳିବେ । ରବିବାର ଓ ଶନିବାର ୨ଟି ଲେଖାଏଁ ମ୍ୟାଚ୍ ଖେଳାଯିବ । ଗୋଟିଏ ମ୍ୟାଚ୍ ଅପରାହ୍ନ ସାଢ଼େ ୩ଟା ଏବଂ ଦ୍ଵିତୀୟ ମ୍ୟାଚ୍ ସନ୍ଧ୍ୟା ସାଢ଼େ ୭ଟାରେ ଆରମ୍ଭ ହେବ ।

ପ୍ରଥମ କ୍ଵାଲିଫାୟର ଓ ଏଲିମିନେଟର ମୁକାବିଲା ହାଇଦ୍ରାବାଦରେ ଖେଳାଯିବାକୁ ଥିବା ବେଳେ ଦ୍ଵିତୀୟ କ୍ଵାଲିଫାୟାର ଓ ଫାଇନାଲ୍ ମ୍ୟାଚ୍ ହାଇଦ୍ରାବାଦରେ ଖେଳାଯିବ । ୬୫ ଦିନ ଧରି ଚାଲିବାକୁ ଥିବା ଆଇପିଏଲ୍‌ରେ ୧୦ ଦଳ ମୋଟ ୭୪ଟି ମ୍ୟାଚ୍ ଖେଳିବେ ।

Argus News | argus news | Odisha Latest News, Breaking News, Trending News, Live TV