୪୯.୧ ଓଭର୍ ବାକି ଥାଇ ଦିନିକିଆ ମ୍ୟାଚ୍ ଜିତିଗଲା ଟିମ୍

କ୍ରିକେଟକୁ ଅନିଶ୍ଚିତତାର ଖେଳ କୁହାଯାଏ । କେତେବେଳେ କିଏ ଜିତିବ ଆଉ କିଏ ହାରିବ ? ତାହା କହିବା ମୁସ୍କିଲ୍ । କିନ୍ତୁ କ୍ରିଜ୍‌ରେ ଏମିତି କିଛି ଘଟିଛି ଯାହାକୁ ନେଇ ସମଗ୍ର କ୍ରିକେଟ ଜଗତ ଆଶ୍ଚର୍ଯ୍ୟ । ଏକ ଦିନିକିଆ ମ୍ୟାଚ୍ ମାତ୍ର ୫ଟି ବଲ୍‌ରେ ସରି ଯାଇଛି । ଆଶ୍ଚର୍ଯ୍ୟ ଲାଗୁଥିଲେ ବି ଏହା ସତ । ୫୦ ଓଭର୍ ମ୍ୟାଚକୁ ମାତ୍ର ୫ଟି ବଲ୍‌ରେ ଜିତି ନେଇଛି ଏକ ଦଳ । ଆପଣ ବି ଭାବୁଛନ୍ତି ନା ଏହା କେମିତି ସମ୍ଭବ ?

ଆଜ୍ଞା ହଁ, ଏମିତି ଘଟିଛ ଆଇସିସି ପୁରୁଷ ଅଣ୍ଡର-୧୯ ବିଶ୍ୱକପ୍ ଆମେରିକା କ୍ୱାଲିଫାୟର୍ସର ଏକ ମ୍ୟାଚରେ । ଯେଉଁଠି କାନାଡ଼ାର ୧୯ ବର୍ଷରୁ କମ୍ ପୁରୁଷ ଦଳ ଆର୍ଜେଣ୍ଟିନାକୁ ୫୦ ଓଭର ବିଶିଷ୍ଟ ମ୍ୟାଚରେ ମାତ୍ର ୫ ରନ୍‌ରେ ହରାଇ ଦେଇଛି । ଆଉ ଏହି ରୋମାଞ୍ଚକର ମ୍ୟାଚ୍ ପୂରା କ୍ରିକେଟ ଦୁନିଆର ଧ୍ୟାନ ଆକର୍ଷଣ କରିଛି ।

ସୂଚନା ଅନୁସାରେ, ଏହି ମ୍ୟାଚରେ ଆର୍ଜେଣ୍ଟିନା ଦଳ ଟସ୍ ଜିତି ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । କିନ୍ତୁ ଆର୍ଜେଣ୍ଟିନାର ପ୍ରଥମେ ବ୍ୟାଟିଂ ନିଷ୍ପତ୍ତି ସମ୍ପୂର୍ଣ୍ଣ ଭୁଲ୍ ଥିଲା । କାନାଡ଼ାର ଘାତକ ବୋଲିଂ ଆଗରେ ଅସହାୟ ହୋଇ ପଡ଼ିଥିଲା ଆର୍ଜେଣ୍ଟିନା । ୧୯.୪ ଓଭର ପର୍ଯ୍ୟନ୍ତ ଆର୍ଜେଣ୍ଟିନା ସଂଘର୍ଷ କରି ସମସ୍ତ ୱିକେଟ୍ ହାତେଇଥିଲା ମାତ୍ର ୨୩ ରନ୍ । ମ୍ୟାଚରେ ଆର୍ଜେଣ୍ଟିନା ଦଳ ମାତ୍ର ଗୋଟିଏ ଚଉକା ଓ ଗୋଟିଏ ଛକା ମାରିଥିଲା । ୭ ଜଣ ଖେଳାଳି କୌଣସି ରନ୍ ନ କରି ଆଉଟ୍ ହୋଇଥିବା ବେଳେ ଜଣେ ବି ଖେଳାଳି ୨ ଅଙ୍କ ସ୍କୋର୍ କରି ପାରି ନଥିଲେ ।

ଆଉ ୨୪ ରନର ସାମାନ୍ୟ ଲକ୍ଷ୍ୟକୁ କାନାଡ଼ା ଟିମ୍ ମାତ୍ର ୫ଟି ବଲ୍‌ରେ ହାସଲ କରି ନେଇଥିଲା । ୧୯ ବର୍ଷରୁ କମ୍ କାନାଡ଼ା ଦଳ ପାଇଁ ଖେଳୁଥିବା ଯୁବରାଜ ସାମରା ୪ଟି ବଲ୍‌ରେ ୨ଟି ଚୌକା ଓ ୨ଟି ଛକ୍କା ମାରିଥିଲେ । ଆର୍ଜେଣ୍ଟିନା ଦଳ ଅତିରିକ୍ତ ୩ ରନ୍ ପ୍ରଥମ ଓଭରରେ ଦେଇଥିଲା । କାନାଡ଼ାର ଓପନର ଧର୍ମ ପଟେଲ ପ୍ରଥମ ବଲରେ ଏକ ରନ୍ କରିଥିଲେ । ଏହିଭଳି ଭାବେ କାନାଡ଼ା ମାତ୍ର ୫ଟି ବଲ୍‌ରେ ୨୪ ରନ୍ ହାସଲ କରି ମ୍ୟାଚ୍ ଜିତି ନେବା ସହ ସମସ୍ତଙ୍କୁ ଚକିତ କରି ଦେଇଛି ।