ମୁମ୍ବାଇ: ଏସିଆ କପ୍‌ର ଠିକ୍ ପୂର୍ବରୁ ଭାରତୀୟ କ୍ରିକେଟ୍ କଣ୍ଟ୍ରୋଲ ବୋର୍ଡ (BCCI)କୁ ବଡ଼ ଝଟ୍‌କା ଲାଗିଛି । ଭାରତୀୟ କ୍ରିକେଟ ଦଳର ମୁଖ୍ୟ ପ୍ରାୟୋଜକ ଥିବା ଡ୍ରିମ୍୧୧ (Dream11) ଏବେ ଦଳର ସ୍ପନସରସିପ୍ କରିପାରିବ ନାହିଁ ବୋଲି ବିସିସିଆଇକୁ ଜଣାଇଛି । ନିକଟରେ ସଂସଦରେ ପ୍ରମୋସନ ଆଣ୍ଡ ରେଗୁଲେସନ ଅଫ୍ ଅନଲାଇନ୍ ଗେମିଂ ବିଲ୍-୨୦୨୫ ପାରିତ ହୋଇଥିଲା । ଆଉ ଏହି ବିଲ୍‌କୁ ରାଷ୍ଟ୍ରପତିଙ୍କ ମୋହର ପରେ ଟଙ୍କା ଦେଣନେଣ କରି ଖେଳା ଯାଉଥିବା ଗେମିଂ ଆପ୍ ଉପରେ ରୋକ୍ ଲାଗିଛି । ଫଳରେ ଡିମ୍୧୧ର ବ୍ୟବସାୟ ସମ୍ପୂର୍ଣ୍ଣ ଭାବେ ପ୍ରଭାବିତ ହୋଇଛି ।

ଖବର ଅନୁସାରେ, ଡିମ୍୧୧ର ଏକ ପ୍ରତିନିଧି ମଣ୍ଡଳୀ ମୁମ୍ବାଇ ସ୍ଥିତ ବିସିସିଆଇ କାର୍ଯ୍ୟାଳୟକୁ ଯାଇ ଏ ନିଷ୍ପତ୍ତି ନେଇ ଅବଗତ କରାଇଛନ୍ତି । ଭାରତୀୟ କ୍ରିକେଟ୍‌ ଦଳର ମୁଖ୍ୟ ପ୍ରାୟୋଜକରୁ ଡ୍ରିମ୍୧୧ ଓହରିବା ପରେ ଶୀଘ୍ର ବିସିସିଆଇ ନୂଆ ସ୍ପନସରସିପ୍ ପାଇଁ ଟେଣ୍ଡର ଡାକିବ । ସେପ୍ଟେମ୍ବର ୯ରୁ ୟୁଏଇରେ ଏସିଆ କପ୍ ଆରମ୍ଭ ହେବାକୁ ଥିବା ବେଳେ ବିସିସିଆଇକୁ ଶୀଘ୍ର ନୂଆ ପ୍ରାୟୋଜକ ଖୋଜିବାକୁ ପଡ଼ିବ ।

ଏନେଇ ବିସିସିଆଇ ଅଧିକାରୀ କହିଛନ୍ତି, ଡ୍ରିମ୍୧୧ର ଅଧିକାରୀ କମ୍ପାନୀର ସିଇଓ ହେମାଙ୍ଗ ଅମୀନଙ୍କ ନିଷ୍ପତ୍ତି ନେଇ ବିସିସିଆଇକୁ ଅବଗତ କରାଇଛନ୍ତି । ସ୍ପନସରସିପ୍ ନେଇ ହୋଇଥିବା ଚୁକ୍ତିକୁ ଡ୍ରିମ୍୧୧ ଆଗକୁ ଜାରି ରଖିବା ପାଇଁ ଅସମର୍ଥ ଥିବା ଜଣାଇଛି । ତେଣୁ, ଏସିଆ କପ୍‌ରେ ଭାରତୀୟ ଦଳର ପ୍ରାୟୋଜକ ଡ୍ରିମ୍୧୧ ରହିବ ନାହିଁ ।

କେତେ ଟଙ୍କାରେ ହୋଇଥିଲା ଚୁକ୍ତି ?

୨୦୨୩ରେ ବିସିସିଆଇ ସହ ଡ୍ରିମ୍୧୧ ୩୫୮ କୋଟି ଟଙ୍କାର ବଡ଼ ଧରଣର ରାଜିନାମା ସ୍ଵାକ୍ଷର କରିଥିଲା । ଏହି ଚୁକ୍ତିନାମା ଅନୁସାରେ ଡ୍ରିମ୍‌୧୧ ଭାରତୀୟ ମହିଳା ଦଳ, ଭାରତୀୟ ପୁରୁଷ ଦଳ, ୧୯ ବର୍ଷରୁ କମ୍ ଦଳ ଏବଂ ଇଣ୍ଡିଆ-ଏ ଟିମ୍‌ର କିଟ୍ ପାଇଁ ସ୍ପନସର ରାଇଟ୍ ପାଇଥିଲା ।

ଏବେ ଡ୍ରିମ୍୧୧ ଚୁକ୍ତିରୁ ଓହରିବାକୁ ଯାଉଥିବା ବେଳେ କମ୍ପାନୀକୁ କୌଣସି ଜରିମାନା ଦେବାକୁ ପଡ଼ିବ ନାହିଁ । କାରଣ ଚୁକ୍ତିରେ ସ୍ପଷ୍ଟ ଲେଖା ଅଛି, ଯଦି ସରକାରଙ୍କ ନୂଆ ଆଇନ୍ ପାଇଁ କମ୍ପାନୀର ବ୍ୟବସାୟ ପ୍ରଭାବିତ ହୁଏ ତ କମ୍ପାନୀ, ବିସିସିଆଇକୁ କୌଣସି ଜରିମାନା ଦେବ ନାହିଁ । ପ୍ରାୟ ୧୮ ବର୍ଷ ତଳେ ଆରମ୍ଭ ହୋଇଥିବା ଡ୍ରିମ୍‌୧୧ର ଏବେକାର ବଜାର ମୂଲ୍ୟ ପ୍ରାୟ ୮ ବିଲିୟନ୍ ଡଲାର ।

କେବଳ ବିସିସିଆଇ ନୁହେଁ ଡ୍ରିମ୍୧୧ ଆଇପିଏଲ୍‌ରେ ମଧ୍ୟ ବଡ଼ ନିବେଶ କରିଥିଲା । ମହେନ୍ଦ୍ର ସିଂ ଧୋନି, ରୋହିତ ଶର୍ମା, ହାର୍ଦ୍ଦିକ ପାଣ୍ଡ୍ୟା, ଋଷଭ ପନ୍ଥ, ଜଶପ୍ରୀତ ବୁମରାଙ୍କ ଭଳି ଖେଳାଳିଙ୍କୁ ବ୍ରାଣ୍ଡ ଆମ୍ବାସଡର କରିଥିଲା ଡ୍ରିମ୍୧୧ । ୨୦୨୦ରେ ଡ୍ରିମ୍୧୧ ଆଇପିଏଲ୍ ଟ୍ରଫିର ପ୍ରାୟୋଜକ ରହିଥିଲା ।

ଖେଳ ସମ୍ପର୍କିତ ଅଧିକ ଖବର ପଢ଼ନ୍ତୁ