ଅର୍ଗସ ବ୍ୟୁରୋ: ସମୟର ସବୁଠାରୁ ସୁନ୍ଦର ଉପଲବ୍ଧି କଣ ଜାଣନ୍ତି ? ସମୟ ହେଉଛି ପରିବର୍ତ୍ତନଶୀଳ । କଭୀ ଗମ୍, କଭୀ ଖୁସି । କଭୀ ଆସୁଁ, କଭୀ ହସୀ । ନା କଣ କହୁଛନ୍ତି ? ବେଶୀ ନୁହେଁ, ଏଇ ଛଅ ମାସ ତଳର କଥା । ୧୯ ନଭେମ୍ବର ୨୦୨୩ରେ ଥିଲା ଦୁଃଖ, ନିରାଶା, ହତାଶା। 

କିନ୍ତୁ ଆଜି ଖୁସି, ଉତ୍ସାହ ଆଉ ହସର ବେଳ । ୱାନଡେ ୱାର୍ଲ୍ଡ କପରେ ଅଷ୍ଟ୍ରେଲିଆ ଠାରୁ ପରାସ୍ତ ହେବା ପରେ ଯେତେବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାରତୀୟ ଟିମ୍ ମେମ୍ବରଙ୍କୁ ଡ୍ରେସିଂ ରୁମରେ ଭେଟିଥିଲେ, ଖେଳାଳିମାନେ ବେଶ ଭାଙ୍ଗି ପଡ଼ିଥିଲେ । ପ୍ରଧାନମନ୍ତ୍ରୀ ସମସ୍ତେ ଖେଳାଳି ଓ କୋଚିଂ ଷ୍ଟାଫଙ୍କର  ପିଠି ଥାପୁଡ଼ାଇ ସାହସ ଭରିଥିଲେ । 

ଏବେ ଛଅ ମାସ ପରେ ଯେତେବେଳେ ଭାରତୀୟ ଟିମ୍ ୱାର୍ଲ୍ଡ ଟି୨୦ ଜିତି ସ୍ବଦେଶ ଫେରିଛି ସେମିତି ଏକ ସାକ୍ଷାତ ବି  ହୋଇଛି । ଅବଶ୍ୟ ବିଶ୍ବକପ ବିଜୟ ପରେ ମୋଦି ନିଜେ ଫୋନ୍ କରି ରୋହିତ, ବିରାଟ ଓ କୋଚ୍ ଦ୍ରାବିଡଙ୍କ ସହ କଥା ହୋଇଥିଲେ । ହେଲେ ଆଜି ଟ୍ରଫି ନେଇ କପ୍ତାନ ରୋହିତ ଶର୍ମା ପିଏମ୍ ମୋଦିଙ୍କୁ ଭେଟିବା ପାଇଁ ତାଙ୍କ ସରକାରୀ ଆବାସରେ ପହଞ୍ଚିଥିଲେ । ଟିମ୍ ସହିତ ବିସିସିଆଇ ପ୍ରେସିଡେଣ୍ଟ ରୋଜର ବିନ୍ନି ଓ ସେକ୍ରେଟାରୀ ଜୟ ଶାହ  ମଧ୍ୟ ସାଥିରେ ଥିଲେ। ପ୍ରଧାନମନ୍ତ୍ରୀ ସବୁ ଖେଳାଳିଙ୍କ ସହ କଥାବାର୍ତ୍ତା କରିଥିଲେ ଆଉ ଖେଳାଳିମାନେ ବି ୱାଲର୍ଡ କପ୍ ସ୍ମୃତି ସେୟାର କରିଥିଲେ । କଥାବାର୍ତ୍ତା ବେଳେ ଖେଳାଳି ସହ ବେଶ ହସଖୁସି ହେଉଥିବାର ମଧ୍ୟ ଦେଖିବାକୁ ମିଳିଥିଲେ ମୋଦି । ଖେଳାଳିଙ୍କ ଚେହେରାରେ ବି ଖୁସି ହିଁ ଖୁସି ଝଲକୁଥିଲା । 

ତେବେ ଏହା ପୂର୍ବରୁ ବାତ୍ୟା ପାଇଁ ବାର୍ବାଡୋସରେ ଫସିଥିବା ଟିମ୍ ଇଣ୍ଡିଆ ଆଜି ସକାଳେ ସ୍ବତନ୍ତ୍ର ବିମାନ ଯୋଗେ ଆସି ନୂଆଦିଲ୍ଲୀରେ ପହଞ୍ଚିଥିଲା । ଆଉ ଇଏ ହେଉଛି ସେହି ସମୟର ଦୃଶ୍ୟ। ଏୟାରପୋର୍ଟରୁ ହୋଟେଲ, ପ୍ରିୟ କ୍ରିକେଟରଙ୍କ ସ୍ବାଗତ ପାଇଁ ପୂରା ପ୍ରସ୍ତୁତ ଥିଲେ ଫ୍ୟାନ । ଏତେ ବର୍ଷ ପରେ ୱାର୍ଲଡ କପ୍ ଭାରତ ଲେଉଟୁଥିବାରୁ ଚାରିଆଡ଼େ ଉତ୍ସାହ, ଉଦ୍ଦୀପନା, ଦେଖିବାକୁ ମିଲିଥିଲା । ଖେଳାଳିମାନେ ବି ଡ୍ୟାନ୍ସ କରି ତ ପୁଣି କେକ୍ କାଟି ଖୁସି ମନାଇଥିଲେ।

ଅଧିକ ପଢ଼ନ୍ତୁ କ୍ରୀଡ଼ା ଖବର