ଅହମ୍ମଦାବାଦ: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ପାଞ୍ଚ ଟିକିଆ ଟି-୨୦ ସିରିଜର ଚତୁର୍ଥ ମୁକାବିଲା ବୁଧବାର ଦିନ ଲକ୍ଷ୍ନୈାରେ ଖେଳାଯିବାର ଥିଲା କିନ୍ତୁ ଅତ୍ୟଧିକ ଘନକୁହୁଡି ହେତୁ ଏହି ମ୍ୟାଚ୍‌କୁ ବାତିଲ କରିଦିଆଯାଇଥିଲା । ଏହି ପାଞ୍ଚ ଟିକିଆ ସିରିଜର ଶେଷ ମ୍ୟାଚ୍‌ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମ୍‌ରେ ଖେଳାଯିବ । ଭାରତୀୟ ଦଳର ଏହି ଷ୍ଟାଡିୟମ୍‌ରେ ଦମ୍‌ଦାର ପ୍ରଦର୍ଶନ ରହିଛି । ଏହି ଷ୍ଟାଡିୟମ୍‌ରେ ଟି- ୨୦ ମ୍ୟାଚ୍‌ରେ ଭାରତୀୟ ଦଳ କେବଳ ଇଂଲଣ୍ଡଠାରୁ ପରାଜୟ ହୋଇଛି । ଆଶା କରାଯାଉଛି କି ଭାରତ ଏହି ସିରିଜ୍‌କୁ ନିଜ ନାମରେ କରିବ ।

ଭାରତୀୟ କ୍ରିକେଟ୍‌ ଦଳ ଅହମ୍ମଦାବାଦ୍‌ରେ ୭ ଟି-୨୦ ମ୍ୟାଚ୍ ଖେଳିଛି । ଯେଉଁଥିରେ ୫ ଟି-୨୦ ମ୍ୟାଚ୍‌ ବିଜୟ ଲାଭ କରିଛି । ଅନ୍ୟ ଦୁଇଟି ମ୍ୟାଚ୍‌ ଭାରତ ସପକ୍ଷରେ ଯାଇନାହିଁ । ଏହି ଦୁଇଟି ମ୍ୟାଚ୍‌ ଇଂଲଣ୍ଡ ବିଜୟ ଲାଭ କରିଥିଲା । ଏହିଆଧାରରୁ ଜଣାଯାଉଛି ଯେ, ଭାରତୀୟ ଦଳ ଅହମ୍ମଦାବଦ୍‌ରେ ସିରିଜ୍‌ ନିଜ ନାମରେ କରିବ ।

ଏହି ସିରିଜ୍‌ରେ ଭାରତୀୟ ଦଳ ୨-୧ରେ ଆଗୁଆ ଅଛି । ପ୍ରଥମ ଏବଂ ତୃତୀୟ ମ୍ୟାଚ୍‌ ଜିତିଥିବା ଭାରତୀୟ ଦଳ ଦ୍ଵିତୀୟ ଟି-୨୦ ମ୍ୟାଚ୍‌ରେ ପରାଜୟର ସାମନା କରିଥିଲା । ଯଦି ଶେଷ ମୁକାବିଲା ଦକ୍ଷିଣ ଆଫ୍ରିକା ବିଜୟ ହୁଏ ତେବେ ସିରିଜ ଡ୍ର ହୋଇଯିବ ।

ଅହମ୍ମଦାବାଦ୍‌ରେ ଭାରତୀୟ ଦଳର ନଜର କ୍ୟାପଟେନ୍‌ ସୂର୍ଯ୍ୟକୁମାରଙ୍କ ଉପରେ ରହିବ । ଚଳିତ ବର୍ଷ ସୂର୍ଯ୍ୟକୁମାରଙ୍କ ପର୍‌ଫରମାନ୍ସ ବହୁତ ଖରାପ ରହିଛି । ବିଗତ ୨୦ ଇଂନିସ୍‌ରେ ତାଙ୍କ ବ୍ୟାଟ୍‌ରୁ ଗୋଟିଏ ବି ଅର୍ଦ୍ଧଶତକ ଦେଖିବାକୁ ମିଳିନାହିଁ । ଅହମ୍ମଦାବାଦ ପିଚ୍‌ ବ୍ୟାଟିଂ ପାଇଁ ଅନୁକୂଳ ବୋଲି ଜଣାଯାଏ । ଯାହାକି ଏଠାରେ ସୂର୍ଯ୍ୟକୁମାର ଗୋଟିଏ ବଡ ପାଳି ଖେଳି ନିଜ ଫର୍ମକୁ ଫେରିବେ ବୋଲି ଆଶା କରାଯାଉଛି ।

ଅଧିକ ପଢନ୍ତୁ: https://argusnews.in/tag/fog-cancels-cricket-match

ଆହତ ଶୁଭମନ୍‌ ଗିଲ୍‌ ଅହମ୍ମଦାବାଦ୍‌ ଟି-୨୦ ମ୍ୟାଚ୍‌ରେ ଖେଳିବା ସମ୍ଭାବନା ବହୁତ କମ୍‌ ରହିଛି । ସେଥିପାଇଁ ପଞ୍ଚମ ଟି-୨୦ ମ୍ୟାଚ୍‌ରେ ସଞ୍ଜୁ ସାମ୍‌ସନଙ୍କ ଉପରେ ସମସ୍ତଙ୍କ ନଜର । ସଞ୍ଜୁ ସାମ୍‌ସନ ଲକ୍ଷ୍ନୈାରେ ଖେଳିବାର ସମ୍ଭାବନା ମଧ୍ୟ ଥିଲା । କିନ୍ତୁ ଏହି ମ୍ୟାଚ୍‌ ବାତିଲ ହେବା କାରଣରୁ ସେ ଗୋଟିଏ ଚାନ୍ସ ହରାଇଥିଲେ । ଯଦି ଅହମ୍ମଦାବାଦ୍‌ରେ ସଞ୍ଜୁ ସାମ୍‌ସନ୍‌ଙ୍କୁ ଖେଳିବାକୁ ସୁଯୋଗ ମିଳେ ତେବେ ଏକ ବଡ ପାଳି ଖେଳି ଦଳରେ ନିଜ ସ୍ଥାନ ପକ୍କା କରିବେ ବୋଲି ଆଶା କରାଯାଉଛି ।