ରାତି ପାହିଲେ ବାରବାଟୀରେ ବିଗ୍ ଫାଇଟ...ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ଏକ ରୋମାଞ୍ଚକର ମ୍ୟାଚ ଅପେକ୍ଷାରେ ଦର୍ଶକ । ଆଜି ଉଭୟ ଦଳର ଖେଳାଳି କଡ଼ା ସୁରକ୍ଷା ମଧ୍ୟରେ ବାରବାଟୀରେ ପହଂଚିଥିଲେ । ଆଉ ତା ପରେ ୩ଘଣ୍ଟା ଧରି ଅଭ୍ୟାସ କରିଛନ୍ତି । ଭାରତର ବ୍ୟାଟସମ୍ୟାନ ଓ ବୋଲର ଅଭ୍ୟାସ କରିଥିବା ବେଳେ ଦକ୍ଷିଣ ଆଫ୍ରିକାର ଖେଳାଳି ମଧ୍ୟ ପ୍ରାକ୍ଟିସ କରିଛନ୍ତି । ଦିନ ୧ଟା ୩୦ରୁ ଟିମ ଇଣ୍ଡିଆ ର ଖେଳାଳୀ ମୁଖ୍ୟ କୋଚ ଗୌତମ ଗମ୍ଭୀର ଓ ଅଧିନାୟକ ସୂର୍ଯ୍ୟକୁମାରଙ୍କ ସାଙ୍ଗରେ ଓହ୍ଲାଇ କଠିନ ଅଭ୍ୟାସ କରିଥିଲେ ।

ଖେଳାଳିଙ୍କ ଅଭ୍ୟାସ ସମୟରେ ଦର୍ଶକ କେତେ ଉତ୍ସାହିତ ଅଛନ୍ତି ମ୍ୟାଚକୁ ନେଇ ତାହା ସ୍ପଷ୍ଟ ବାରି ହୋଇପଡୁଥିଲା । ଟିମ୍ ଇଣ୍ଡିଆର ଅଧିନାୟକ ସୂର୍ଯ୍ୟକୁମାର କହିଛନ୍ତି, ଆମ ଟିମ ପୁରା ଫିଟ ଅଛି । ଦିନିକିଆ ସିରିଜ ଆମେ ଜିତିଛୁ । ଆସନ୍ତାକାଲି ଭଲ ମ୍ୟାଚ ହେବ । ପୁରା ଟିମ୍ ଦମରେ ପଡିଆକୁ ଓହ୍ଲାଇବ ।

ସେପଟେ ସନ୍ଧ୍ୟାରେ ଫ୍ଲଡ ଲାଇଟରେ ଦକ୍ଷିଣ ଆଫ୍ରିକା ଟିମ୍ କଠିନ ଅଭ୍ୟାସ କରିଛି । ଟି ଟ୍ଵେଣ୍ଟି ସିରିଜର ଆରମ୍ଭରୁ ବିଜୟ ଲକ୍ଷ୍ୟରେ ରହିଛି । ଦକ୍ଷିଣ ଆଫ୍ରିକା ଏକ ସନ୍ତୁଳିତ ଦଳ ଏବଂ ବାରବାଟୀରେ ଟି ଟ୍ଵେଣ୍ଟିରେ ଏହାର ବିଜୟ ହାର ଶତ ପ୍ରତିଶତ। ଦକ୍ଷିଣ ଆଫ୍ରିକା ଅଧିନାୟକ ମାକରମ କହିଛନ୍ତି, ଯଦିଓ ୨ ଟି ମ୍ୟାଚ ପୂର୍ବରୁ ଦକ୍ଷିଣ ଆଫ୍ରିକା ଏହି ପିଚରେ ଜିତିସାରିଛି, ମୁଁ ସେହି ଦଳରେ ଖେଳିନି । ଏହି ପିଚ ମୋ ପାଇଁ ନୂଆ ।

ଯଦି ଇତିହାସକୁ ଦେଖିବା ତେବେ ବାରବାଟୀ ଷ୍ଚାଡିୟମରେ ମୋଟ ୩ଟି ଟି ଟ୍ଵେଣ୍ଟି ମ୍ୟାଚ୍ ଖେଳାଯାଇଛି । ଭାରତ ୨ଟିରେ ହାରିଥିବା ବେଳେ ଗୋଟିଏ ମ୍ୟାଚରେ ଜିତିଛି । ୨ଟି ମ୍ୟାଚ୍ ଦକ୍ଷିଣ ଆଫ୍ରିକା ସହିତ ଖେଳାଯାଇଥିବା ବେଳେ ଗୋଟିଏ ମ୍ୟାଚ ଶ୍ରୀଲଙ୍କା ସହ ହୋଇଥିଲା । ବାରବାଟୀରେ ଖେଳାଯାଇଥିଲା ମୋଟ ୩ଟି ଟି ଟ୍ଵେଣ୍ଟି ମ୍ୟାଚ୍ କିଛି ଏହିପରି ।

୨୦୧୫ ଅକ୍ଟୋବର ୫ରେ ଭାରତ ବନାମ ଦକ୍ଷିଣ ଆଫ୍ରିକା ପ୍ରଥମ ଟି ଟ୍ଵେଣ୍ଟି, ୬ ଓ୍ଵିକେଟରେ ଜିତିଲା ଦକ୍ଷିଣ ଆଫ୍ରିକା
୨୦୧୭ ଡିସେମ୍ବର ୨୦ରେ ଭାରତ ବନାମ ଶ୍ରୀଲଙ୍କା ଦ୍ଵିତୀୟ ଟି ଟ୍ଵେଣ୍ଟି, ୯୩ରନରେ ଜିତିଥିଲା ଭାରତ ।
୨୦୨୨ ଜୁନ୍ ୧୨ରେ ଭାରତ ବନାମ ଦକ୍ଷିଣ ଆଫ୍ରିକା ତୃତୀୟ ଟି ଟ୍ଵେଣ୍ଟି, ୪ ଓ୍ଵିକେଟରେ ଜିତିଥିଲା ଦକ୍ଷିଣ ଆଫ୍ରିକା ।  ଆଉ ବର୍ତ୍ତମାନ ସମୟରେ ସମସ୍ତଙ୍କ ନଜର ଚତୁର୍ଥ ଟି ଟ୍ଵେଣ୍ଟି ଉପରେ...। 

ଅଧିକ ପଢ଼ନ୍ତୁ ଖେଳ ଖବର...