ଅର୍ଗସ ବ୍ୟୁରୋ: ଇଂଲଣ୍ଡ ବିପକ୍ଷ ପ୍ରଥମ ଟି-ଟ୍ଵେଣ୍ଟି ମ୍ୟାଚ୍‌କୁ ଜିତି ନେଇଛି ଭାରତ । ୫ ମ୍ୟାଚ୍ ବିଶିଷ୍ଟ ଟି-ଟ୍ଵେଣ୍ଟି ସିରିଜର ପ୍ରଥମ ମ୍ୟାଚ୍ କୋଲକାତାର ଇଡେନ୍ ଗାର୍ଡେନରେ ଖେଳା ଯାଇଥିଲା । ସୂର୍ଯ୍ୟ କୁମାର ଯାଦବଙ୍କ ନେତୃତ୍ଵାଧିନ ଭାରତ ୭ ୱିକେଟରେ ପ୍ରଥମ ମ୍ୟାଚ୍ ଜିତି ମନୋବଳ ଦୃଢ଼ କରିଛି ।

ପ୍ରଥମ ଟି-ଟ୍ଵେଣ୍ଟିରେ ପେସ୍ ବୋଲର ମହମ୍ମଦ ସାମିଙ୍କୁ ଚୂଡ଼ାନ୍ତ ଏକାଦଶରେ ସାମିଲ୍ କରାଯାଇ ନଥିଲା । ଇଡେନ୍ ଗାର୍ଡେନରେ ୩ ସ୍ପିନରଙ୍କୁ ନେଇ ପଡ଼ିଆକୁ ଓହ୍ଲାଇଥିଲେ କ୍ୟାପଟେନ ସୂର୍ଯ୍ୟ କୁମାର । ସୂର୍ଯ୍ୟଙ୍କ ଏହି ନିଷ୍ପତ୍ତିରେ ସମସ୍ତେ ଚକିତ ଥିଲେ । କିନ୍ତୁ ଭାରତୀୟ ଦଳ ମ୍ୟାଚ ଜିତିବା ପରେ ଏହା ଠିକ୍ ପ୍ରମାଣିତ ହୋଇଛି ।

ମ୍ୟାଚରେ ସାମିଙ୍କୁ ବସାଇ କ୍ୟାପଟେନ୍ ସୂର୍ଯ୍ୟ କୁମାର ଜଣେ ମାତ୍ର ପେସ୍ ବୋଲରଙ୍କୁ ନେଇଥିଲେ । ପେସ୍ ବୋଲର ଅର୍ଶଦୀପଙ୍କ ସହ ଦଳରେ ୨ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ଓ ନୀତିଶ କୁମାର ରେଡ୍ଡୀ ଖେଳିଥିଲେ । ଆଉ ପ୍ରଥମ ଓଭରରୁ ବେଶ୍ ପ୍ରଭାବୀ ବୋଲିଂ କରିଥିଲେ ଅର୍ଶଦୀପ । ମାତ୍ର ୧୭ ରନରେ ଅର୍ଶଦୀପ ଇଂଲଣ୍ଡର ୨ଟି ୱିକେଟ୍ ଖସାଇବାରେ ସଫଳ ହୋଇଛି ।

ସେହିଭଳି ୩ ସ୍ପିନର ଅକ୍ଷର ପଟେଲ, ରବି ବିଷ୍ଣୋଇ ଓ ବରୁଣ ଚକ୍ରବର୍ତ୍ତୀ ମଧ୍ୟ ସଫଳତା ଦେଇଥିଲେ ଭାରତୀୟ ଦଳକୁ । ବରୁଣ ସର୍ବାଧିକ ୩ ୱିକେଟ୍ ନେଇ ପ୍ଲେୟାର ଅଫ ଦି ମ୍ୟାଚ୍ ହୋଇଥିଲେ । ସେହିଭଳି ଅକ୍ଷର ପଟେଲ ହାତେଇଥିଲେ ୨ଟି ୱିକେଟ୍ । ରବିଙ୍କୁ କୌଣସି ୱିକେଟ୍ ମିଳି ନଥିବା ବେଳେ ସେ ସ୍କୋର୍ ଉପରେ ବ୍ରେକ୍ ଲଗାଇଥିଲେ ।

ପ୍ରଥମେ ବ୍ୟାଟିଂ କରିଥିବା ଇଂଲଣ୍ଡ ୧୩୨ ରନ୍ କରିଥିଲା । ୧୩୩ ରନର ପିଛା କରୁଥିବା ଭାରତ ୧୨.୫ ଓଭରରେ ୩ ୱିକେଟ୍ ହରାଇ ମ୍ୟାଚ୍ ଜିତି ନେଇଥିଲା ଭାରତ । ଅଭିଶେକ ଶର୍ମା ୮ଟି ଛକ୍କା ମାରି ଦଳ ପକ୍ଷରୁ ସର୍ବାଧିକ ୭୯ ରନ୍ ସ୍କୋର୍ କରିଥିଲେ ।

Argus News | argus news | Odisha Latest News, Breaking News, Trending News, Live TV