ହାରିଗଲା ଭାରତ । ନ୍ୟୁଜିଲାଣ୍ଡ ବିପକ୍ଷ ସିରିଜ୍‌ରେ ଭାରତ ପରାଜୟ ବରଣ କରିଛି । ଯେଉଁ ଟିମ୍‌କୁ ବିଶ୍ୱର ସବୁ ଦଳ ଡରୁଥିଲେ, ଏବେ ସେଇ ଟିମ୍‌ ବାରମ୍ବାର ପରାଜୟ ବରଣ କରୁଛି । ଭାରତୀୟ କ୍ରିକେଟକୁ ସତେ ଯେମିତି ନଜର ଲାଗିଯାଇଛି । ନ୍ୟୁଜିଲାଣ୍ଡ ବିପକ୍ଷ ସିରିଜରେ ଭାରତ ୨-୧ରେ ପରାଜୟ ବରଣ କରିଛି। ଭାରତ ମାଟିକୁ ଆସି ନ୍ୟୁଜିଲାଣ୍ଡ ଏକ ଐତିହାସିକ ବିଜୟ ହାସଲ କରିଛି ।

ଆଉ ସବୁଠାରୁ ବଡ଼ କଥା ହେଲା, ଏହି ପରାଜୟ ଭାରତୀୟ ଦଳର ଦୁର୍ବଳତାକୁ ପଦାରେ ପକାଇ ଦେଇଛି । ଯାହାକୁ ନେଇ ସାରା ବିଶ୍ୱରେ ଚର୍ଚ୍ଚା ଆରମ୍ଭ ହୋଇଛି । କ୍ରିକେଟ୍‌ ଫ୍ୟାନ୍‌ମାନେ ନିରାଶ ହୋଇଛନ୍ତି । ତେବେ ଭାରତୀୟ ଦଳର ପରାଜୟ ପଛରେ ଏକ ବଡ଼ କାରଣ ହେଲା ନିସ୍ପ୍ରଭ ବୋଲିଂ। ଭାରତୀୟ ପିଚରେ ନ୍ୟୁଜିଲାଣ୍ଡ ବ୍ୟାଟ୍ସମ୍ୟାନମାନେ ଆରାମରେ ଖେଳିଥିଲେ ଓ ଡାରିଲ୍ ମିଚେଲଙ୍କୁ ରୋକିବାକୁ ଭାରତୀୟ ବୋଲର ସକ୍ଷମ ହୋଇନଥିଲେ। ବୋଲିଂ ସମୟରେ ୬ଷ୍ଠ ବୋଲରଙ୍କ ଅଭାବ ଭାରତକୁ ସମସ୍ୟାରେ ପକାଇଥିଲା। ତାହାର ଫାଇଦା ନ୍ୟୁଜିଲାଣ୍ଡ ନେଇଥିଲା।

ଅଲରାଉଣ୍ଡର ଓ୍ବାସିଂଟନ ସୁନ୍ଦର ଆହତ ହୋଇ ବାଦ ପଡ଼ିବା ଓ ଅକ୍ଷର ପଟେଲଙ୍କୁ ସାମିଲ କରାନଯିବା ଦଳକୁ ସମସ୍ୟାରେ ପକାଇଥିଲା। ଦଳର ଆଉ ଏକ ଦୁର୍ବଳତା ହେଲା ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ଖରାପ ଫର୍ମ । ଏହି ସିରିଜରେ ଭାରତୀୟ ଦଳରେ ଦେଖାଯାଇଥିବା ସବୁଠାରୁ ବଡ଼ ସମସ୍ୟା ହେଲା ତାରକା ବ୍ୟାଟ୍ସମ୍ୟାନ ରୋହିତ ଶର୍ମାଙ୍କ ଖରାପ ଫର୍ମ । ରୋହିତ ୩ଟି ଦିନିକିଆରେ ଗୋଟିଏ ବି ଅର୍ଦ୍ଧଶତକ ମାରିପାରିନଥିଲେ । ଆସନ୍ତା ବର୍ଷ ଦିନିକିଆ ବିଶ୍ବକପ ହେବାକୁ ଥିବା ବେଳେ ଏହା ଭାରତୀୟ ଦ​ଳ ପାଇଁ ଚିନ୍ତାର କାରଣ ହୋଇଛି। ଏପରିକି ପ୍ରକୃତରେ ତାଙ୍କର ବିଶ୍ବକପ ଖେଳିବା ନେଇ କ୍ଷୁଧା ଅଛି କି ନାହିଁ ସେନେଇ ପ୍ରଶ୍ନ କରିଛନ୍ତି ନ୍ୟୁଜିଲାଣ୍ଡର ପୂର୍ବତନ ଦ୍ରୁତବୋଲର ସାଇମନ ଡଲ୍ ।

ଅନ୍ୟପଟେ ଏହାରି ଭିତରେ ଏକ ଶୂଭ ଖବର ମଧ୍ୟ ସାମ୍ନାକୁ ଆସିଛି । ତାହା ହେଲା ଜବରଦସ୍ତ ଫର୍ମରେ ଅଛନ୍ତି ବିରାଟ କୋହଲି । ଦକ୍ଷିଣ ଆଫ୍ରିକା ସିରିଜ ପରେ ସେ ଏହି ସିରିଜରେ ବି ଉଲ୍ଲେଖନୀୟ ପ୍ରଦର୍ଶନ କରିଥିଲେ । ସେହିପରି ନୀତୀଶ ରେଡ୍ଡି ଓ ହର୍ଷିତ ରାଣାଙ୍କ ଅଲରାଉଣ୍ଡ ପ୍ରଦର୍ଶନ ଭାରତ ପାଇଁ ସୁନ୍ଦର ଆଶା ସଂଚାର କରିଛି ।