Ishan Kishan / ଦୁଲୀପ ଟ୍ରଫି ଫାଇନାଲରେ ଇଶାନ କିଷନଙ୍କ ଦ୍ୱିଶତକ, ରଚିଲେ ଇତିହାସ

ଚେନ୍ନାଇ: ଦୁଲୀପ ଟ୍ରଫି ୨୦୨୬-୨୭ର ଫାଇନାଲରେ ଇଶାନ କିଷନଙ୍କ ବ୍ୟାଟ୍‌ରୁ ବଡ଼ ଇନିଂସ ଦେଖିବାକୁ ମିଳିଛି । ସାଉଥ୍ ଜୋନ୍ ବିପକ୍ଷରେ ଇଷ୍ଟ ଜୋନ୍‌ର ଅଧିନାୟକ ଇଶାନ ଦ୍ୱିଶତକ ହାସଲ କରିଛନ୍ତି । ଚେନ୍ନାଇର ଏମ୍‌ଏ ଚିଦମ୍ବରମ୍ ଷ୍ଟାଡିୟମରେ ଫାଇନାଲ ମ୍ୟାଚ୍‌ର ଦ୍ୱିତୀୟ ଦିନରେ ଇଶାନଙ୍କୁ ଏହି ସଫଳତା ମିଳିଛି ।

ପ୍ରଥମ ଦିନ ଖେଳ ଶେଷ ବେଳକୁ ଇଶାନ ୧୧୧ ରନ୍‌ରେ ନଟ୍‌ଆଉଟ୍ ଥିଲେ । ଦ୍ୱିତୀୟ ଦିନରେ ମଧ୍ୟ ସେ ଦମଦାର୍ ବ୍ୟାଟିଂ କରିଛନ୍ତି । ୨୬ଟି ଚୌକା ଓ ୨ଟି ଛକା ସହାୟତାରେ ୨୭୦ ବଲ୍‌ରେ ଦ୍ୱିଶତକ ହାସଲ କରିଛନ୍ତି ଇଶାନ କିଷନ । ଇଷ୍ଟ ଜୋନ୍‌ର ପ୍ରଥମ ପାଳିରେ ୧୧ତମ ଓଭରରେ ଦେବଦତ୍ତ ପଡିକଲଙ୍କ ଦ୍ଵିତୀୟ ବଲ୍‌ରେ ଚୌକା ମାରି ଇଶାନ କିଷନ ୨୦୦ ରନ୍ ପୂରଣ କରିଛନ୍ତି ।

ଦୁଲୀପ ଟ୍ରଫିରେ ଏହା ଇଶାନଙ୍କ ପ୍ରଥମ ଦ୍ୱିଶତକ । ଏଥିସହ ଦୁଲୀପ ଟ୍ରଫି ଫାଇନାଲରେ ଦ୍ୱିଶତକ ହାସଲ କରିଥିବା ପଞ୍ଚମ ବ୍ୟାଟର ହେଉଛନ୍ତି ଇଶାନ କିଷନ । ଇଷ୍ଟ ଜୋନ୍ ପକ୍ଷରୁ ଫାଇନାଲରେ ଦ୍ୱିଶତକ ମାରିବାରେ ଇଶାନ ହେଉଛନ୍ତି ପ୍ରଥମ ବ୍ୟାଟ୍ସମ୍ୟାନ୍ ।

ଦୁଲୀପ ଟ୍ରଫି ଫାଇନାଲ‌ରେ ଦ୍ଵିଶତକ

ଦୁଲୀପ ଟ୍ରଫି ଫାଇନାଲରେ ଦ୍ୱିଶତକ କରିଥିବା ପୂର୍ବତନ ବ୍ୟାଟରଙ୍କ ତାଲିକାରେ ରମନ ଲାମ୍ବା, ଅଂଶୁମାନ ଗାଏକୱାଡ଼, ଚେତେଶ୍ୱର ପୂଜାରା ଓ ଯଶସ୍ୱୀ ଜୟସୱାଲଙ୍କ ନାଁ ରହିଛି । ଇଶାନ ଏହି ତାଲିକାରେ ଯୋଡ଼ି ହୋଇଛନ୍ତି।

ଇଶାନଙ୍କ ଏହି ବଡ଼ ଇନିଂସ ସହ ଇଷ୍ଟ ଜୋନ୍‌ର ସ୍ଥିତି ମଧ୍ୟ ମଜଭୁତ୍ ହୋଇଛି । ତାଙ୍କ ସହ କୁମାର କୁଶାଗ୍ର ମଧ୍ୟ ଶତକ ହାସଲ କରି ଇଷ୍ଟ ଜୋନ୍‌ର ବଡ଼ ସ୍କୋରରେ ଯୋଗଦାନ କରିଛନ୍ତି । ଇଶାନ ଓ କୁଶାଗ୍ରଙ୍କ ମଧ୍ୟରେ ପଞ୍ଚମ ୱିକେଟ୍ ପାଇଁ ୨୩୦ ରନ୍‌ର ଭାଗିଦାରୀ ଇଷ୍ଟ ଜୋନକୁ ଦୃଢ଼ ସ୍ଥିତିରେ ପହଞ୍ଚାଇଛି ।

ପରେ ଇଶାନ ୨୫୦ ରନ୍‌ରେ ପହଞ୍ଚିବା ପରେ ରିଟାୟର୍ଡ ହର୍ଟ ହୋଇଥିଲେ । ଇଶାନଙ୍କ ୨୫୦ ରନ୍‌ର ଇନିଂସ ଦୁଲୀପ ଟ୍ରଫି ଫାଇନାଲର ଏକ ବଡ଼ ବ୍ୟକ୍ତିଗତ ସ୍କୋର । ଇଶାନଙ୍କ ଏହି ଇନିଂସ ତାଙ୍କ ଫାର୍ଷ୍ଟ କ୍ଲାସ୍ କ୍ରିକେଟ୍‌ରେ ଆଉ ଏକ ବଡ଼ ରେକର୍ଡ ଯୋଡ଼ିଛି । ଇଶାନଙ୍କ ଫାର୍ଷ୍ଟ କ୍ଲାସ୍ କ୍ୟାରିୟରର ସର୍ବୋଚ୍ଚ ସ୍କୋର ୨୭୩ ରନ୍ । ଯାହା ସେ ଝାଡ଼ଖଣ୍ଡ ପକ୍ଷରୁ ଦିଲ୍ଲୀ ବିପକ୍ଷରେ ରଣଜୀ ଟ୍ରଫିରେ କରିଥିଲେ ।

ଭାଙ୍ଗିଲେ ୩୯ ବର୍ଷର ରେକର୍ଡ

ଇଶାନ କିଷନ, ଅଂଶୁମାନ ଗାଏକୱାଡ଼ଙ୍କ ୩୯ ବର୍ଷ ପୁରୁଣା ରେକର୍ଡ ଭାଙ୍ଗିଛନ୍ତି । ଇଶାନଙ୍କ ପୂର୍ବରୁ ଅଂଶୁମାନଙ୍କ ନାଁରେ ଅଧିନୟକ ବାବେ ଦୁଲୀପ ଟ୍ରଫି ଫାଇନାଲ୍‌ରେ ସର୍ବାଧିକ ରନ୍ ରେକର୍ଡ ଥିଲା । ଅଂଶୁମାନ ୧୯୮୭ରେ ୱେଷ୍ଟ ଜୋନ୍ ପକ୍ଷରୁ ନର୍ଥ ଜୋନ୍ ବିପକ୍ଷରେ ୩୪୪ ବଲ୍‌ରେ ୩୧ ଚଉକା ସହାୟତାରେ ୨୧୬ ରନ୍ କରିଥିଲେ ।