Messi Retirement / ଅନ୍ତର୍ଜାତୀୟ ଫୁଟବଲରୁ ଅବସର ନେଲେ ଲିଓନେଲ ମେସି…ଆଉ ନିଜ ଦେଶ ପାଇଁ ଖେଳିବେ ନାହିଁ

ଫୁଟବଲ ଜଗତର ପ୍ରଶଂସକଙ୍କ ପାଇଁ ଆସିଛି ବଡ଼ ଖବର। ମେସିଙ୍କ ଫ୍ୟାନ୍ସମାନଙ୍କୁ ବଡ଼ ଝଟକା ଲାଗିଛି। ଆର୍ଜେଣ୍ଟିନାର ମହାନ ଫୁଟବଲର୍‌ ଲିଓନେଲ ମେସି ଅନ୍ତର୍ଜାତୀୟ ଫୁଟବଲ୍‌ରୁ ଅବସର ଘୋଷଣା କରିଛନ୍ତି। ଏଣିକି ସେ ଆର୍ଜେଣ୍ଟିନାର ଜର୍ସିରେ ମଇଦାନକୁ ଓହ୍ଲାଇବେ ନାହିଁ। ମେସି ନିଜର ଇନଷ୍ଟାଗ୍ରାମ ମାଧ୍ୟମରେ ଏହି ବଡ଼ ଘୋଷଣା କରିଛନ୍ତି। ସ୍ପେନ ବିପକ୍ଷ ବିଶ୍ୱକପ ଫାଇନାଲରେ ପରାଜୟର ଦୁଇ ଦିନ ପରେ ସେ ଏହି ନିଷ୍ପତ୍ତି ନେଇଥିବା କହିଛନ୍ତି। ତେବେ ତାଙ୍କ ପିତାଙ୍କ ମୃତ୍ୟୁ ମଧ୍ୟ ଏହି ଅନ୍ତିମ ନିଷ୍ପତ୍ତିକୁ ପ୍ରଭାବିତ କରିଥିବା ମେସି ଜଣାଇଛନ୍ତି।

View this post on Instagram

A post shared by Leo Messi (@leomessi)

• ପ୍ରାୟ ଦୁଇ ଦଶନ୍ଧି ଧରି ଦେଶ ପାଇଁ ଖେଳିଥିଲେ

୩୯ ବର୍ଷୀୟ ମେସି ପ୍ରାୟ ଦୁଇ ଦଶନ୍ଧି ଧରି ଆର୍ଜେଣ୍ଟିନାର ପ୍ରତିନିଧିତ୍ୱ କରିଥିଲେ। ସେ ୨୦୨୨ ଫିଫା ବିଶ୍ୱକପରେ ଫ୍ରାନ୍ସକୁ ପରାସ୍ତ କରି ଆର୍ଜେଣ୍ଟିନାକୁ ବିଜୟୀ କରାଇଥିଲେ। ମେସି ତାଙ୍କ ଦଳକୁ ୨୦୨୬ ଫିଫା ବିଶ୍ୱକପରେ ଲଗାତାର ବିଶ୍ୱ ଚାମ୍ପିଅନସିପ୍ ପାଇଁ ନେତୃତ୍ୱ ଦେବାକୁ ଚାହୁଁଥିଲେ। କିନ୍ତୁ ସ୍ପେନ ତାଙ୍କ ସ୍ୱପ୍ନକୁ ଧୂଳିସାତ୍ କରିଦେଲା। ମେସି ଆର୍ଜେଣ୍ଟିନା ପାଇଁ ୨୦୭ଟି ମ୍ୟାଚ୍ ଖେଳି ୧୨୫ଟି ଗୋଲ କରିଛନ୍ତି।
ମେସି ଅନ୍ତର୍ଜାତୀୟ ଫୁଟବଲରେ ଦ୍ୱିତୀୟ ସର୍ବାଧିକ ମ୍ୟାଚ୍ ଖେଳିଥିବା ଖେଳାଳି। ସେ ଏକ ଉଲ୍ଲେଖନୀୟ ଅନ୍ତର୍ଜାତୀୟ କ୍ୟାରିୟର ଉପଭୋଗ କରିଛନ୍ତି, ଅନେକ ଐତିହାସିକ ସଫଳତା ହାସଲ କରିଛନ୍ତି।

• ମେସି ଲେଖିଛନ୍ତି ଭାବୁକ ମେସେଜ

ସନ୍ନ୍ୟାସକୁ ନେଇ ମେସି ଲେଖିଛନ୍ତି, ଫାଇନାଲ ପରେ ଏତେ ସମୟ ବିତିଯିବା ଏବଂ ଅନେକ ଚିନ୍ତା-ବିଚାର କରିବା ପରେ ମୁଁ ସମସ୍ତଙ୍କୁ ଜଣାଇବାକୁ ଚାହୁଁଛି ଯେ, ମୁଁ ଜାତୀୟ ଦଳରୁ ସନ୍ନ୍ୟାସ ନେଉଛି। ଏହା ଏପରି ଏକ ନିଷ୍ପତ୍ତି, ଯାହା ମୋତେ ବହୁତ ଦୁଃଖ ଦେଇଛି ଏବଂ ଆଜି ବି ମୋ ମନକୁ ଗଭୀର ଭାବେ ଆଘାତ କରୁଛି। କିନ୍ତୁ ମୁଁ ବୁଝୁଛି ଯେ, ଏହା ହିଁ ଏହି ନିଷ୍ପତ୍ତି ନେବାର ସଠିକ୍‌ ସମୟ।

ମେସି ଆହୁରି କହିଛନ୍ତି, "ମୁଁ ଶପଥ କରି କହୁଛି ଯେ, ମୁଁ ମୋର ସବୁକିଛି ଦେଇଛି। କେବଳ ଗତ କିଛି ବର୍ଷ ମଧ୍ୟରେ ନୁହେଁ, ଯେତେବେଳେ ଆମେ ସବୁକିଛି ଜିତିଥିଲୁ, ତା’ ପୂର୍ବରୁ ମଧ୍ୟ ମୁଁ ମୋର ସର୍ବସ୍ବ ଦେଇଛି। ମୁଁ ସବୁବେଳେ ଏହି ଜର୍ସି ପାଇଁ ଲଢ଼ିଛି ଏବଂ ମୋର ସମସ୍ତ ଶକ୍ତି ଲଗାଇଛି, ଯାହାଦ୍ୱାରା ଆପଣମାନଙ୍କୁ ଖୁସି ଦେଇପାରିବି।"

• ନୂତନ ଖେଳାଳିମାନଙ୍କୁ ସୁଯୋଗ ମିଳିବ

ମେସି ଆହୁରି ଲେଖିଛନ୍ତି ଯେ ତାଙ୍କ ଅବସର ପରେ, ନୂତନ ଖେଳାଳିମାନେ ଆର୍ଜେଣ୍ଟିନାକୁ ପ୍ରତିନିଧିତ୍ୱ କରିବାର ସୁଯୋଗ ପାଇବେ। ଦେଶରେ ଅନେକ ଉତ୍କୃଷ୍ଟ ଖେଳାଳି ଅଛନ୍ତି, ଏବଂ ସେମାନେ ଏହି ସୁଯୋଗ ପାଇବାକୁ ଯୋଗ୍ୟ। ମେସି ତାଙ୍କର ଲକ୍ଷ ଲକ୍ଷ ପ୍ରଶଂସକଙ୍କୁ ମଧ୍ୟ ଧନ୍ୟବାଦ ଜଣାଇଥିଲେ। ଏବେ, ସେ ପଡ଼ିଆରୁ ନୁହେଁ, ବରଂ ଷ୍ଟାଣ୍ଡରୁ ତାଙ୍କ ଦେଶ ପାଇଁ ଉତ୍ସାହିତ ହେବେ। ମେସି ତାଙ୍କ ପରିବାର, ପ୍ରଶିକ୍ଷକ ଏବଂ ସାଥୀ ଖେଳାଳିମାନଙ୍କୁ ମଧ୍ୟ ଧନ୍ୟବାଦ ଜଣାଇଛନ୍ତି।

ଆର୍ଜେଣ୍ଟିନା ପାଇଁ ଦୀର୍ଘ ବର୍ଷ ଧରି ଖେଳିଥିବା ମେସିଙ୍କ ଅବସର ଫୁଟବଲ୍‌ ପ୍ରଶଂସକଙ୍କୁ ଭାବବିହ୍ବଳ କରିଛି। ତାଙ୍କ ନେତୃତ୍ୱରେ ଆର୍ଜେଣ୍ଟିନା ଅନେକ ବଡ଼ ସଫଳତା ହାସଲ କରିଛି। ଦେଶ ପାଇଁ ଖେଳିବା ସମୟରେ ମେସି ବିଶ୍ୱ ଫୁଟବଲ୍‌ରେ ନିଜର ଏକ ବିଶେଷ ପରିଚୟ ସୃଷ୍ଟି କରିଥିଲେ। ତାଙ୍କ ଘୋଷଣା ପରେ ଆର୍ଜେଣ୍ଟିନା ଫୁଟବଲ୍‌ ଦଳରେ ଏକ ଯୁଗର ଅନ୍ତ ଘଟିଥିବା ଭଳି ମନେ କରାଯାଉଛି।