‘ଅପରେଶନ ସିନ୍ଦୂର’ ମେ ୭ ତାରିଖରେ ଆରମ୍ଭ ହୋଇଥିଲା ଏବଂ ଏହାର ଲକ୍ଷ୍ୟ ଥିଲା ପାକିସ୍ତାନ ଏବଂ ପାକ ଅଧିକୃତ କଶ୍ମୀରରେ ଆତଙ୍କବାଦୀ ଆଡ୍ଡାଗୁଡ଼ିକୁ ସମ୍ପୂର୍ଣ୍ଣ ନଷ୍ଟ କରିବା। ଏହି ଆକ୍ରମଣ ସେହି ଆତଙ୍କବାଦୀମାନଙ୍କ ଉପରେ କରାଯାଇଥିଲା ଯେଉଁମାନେ ଜୈଶ-ଏ-ମହମ୍ମଦ, ଲସ୍କର-ଏ-ତୋଇବା ଏବଂ ହିଜବୁଲ ମୁଜାହିଦ୍ଦିନ ଭଳି ସଂଗଠନ ସହିତ ଜଡିତ ଥିଲେ। ଏପ୍ରିଲ ୨୦୨୫ରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ଜଣ ନିରୀହ ଲୋକ ପ୍ରାଣ ହରାଇବାରୁ ଅପରେଶନ ସିନ୍ଦୂର ଆରମ୍ଭ କରାଯାଇଥିଲା, ଯାହାର ଜବାବରେ ଏହି କାର୍ଯ୍ୟାନୁଷ୍ଠାନ ନିଆଯାଇଥିଲା। ଏବେ ଅପରେଶନ ସିନ୍ଦୂରର ସଫଳତା ଆଇପିଏଲରେ ମଧ୍ୟ ପାଳନ କରାଯିବ।

ଏଥିପାଇଁ ବିସିସିଆଇ ଏକ ସ୍ବତନ୍ତ୍ର ଯୋଜନା କରିଛି, ଯାହା ଆଇପିଏଲ ୨୦୨୫ର ସମାପ୍ତି ଉତ୍ସବରେ ଦେଖିବାକୁ ମିଳିବ। ଇଣ୍ଡିଆନ ପ୍ରିମିୟର ଲିଗ (IPL) ଉଦଯାପନୀ ଉତ୍ସବରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (BCCI) ଭାରତୀୟ ସଶସ୍ତ୍ର ବାହିନୀ (IAF) ପ୍ରତି ଏକ ସ୍ବତନ୍ତ୍ର ଶ୍ରଦ୍ଧାଞ୍ଜଳି ଦେବାକୁ ଯୋଜନା କରିଛି। ଏହି ସମାରୋହ ଜୁନ ୩ତାରିଖରେ ଆଇପିଏଲର ଫାଇନାଲ ମ୍ୟାଚ ଆରମ୍ଭ ହେବା ପୂର୍ବରୁ ଅହମ୍ମଦାବାଦର ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ହେବ। ବିସିସିଆଇ ସଚିବ ଦେବଜିତ ସାଇକିଆ ସ୍ପୋର୍ଟଷ୍ଟାରକୁ କହିଛନ୍ତି ଯେ ଭାରତୀୟ କ୍ରିକେଟ ପ୍ରଶାସକ ସଂସ୍ଥା ପ୍ରତିରକ୍ଷା ମୁଖ୍ୟଙ୍କ ସହିତ ସ୍ଥଳସେନା, ନୌସେନା ଏବଂ ବାୟୁସେନା ମୁଖ୍ୟଙ୍କୁ ନିମନ୍ତ୍ରଣ କରିଛି।

Argus News | argus news | Odisha Latest News, Breaking News, Trending News, Live TV