ଭାରତୀୟ କ୍ରିକେଟ ଦଳର ଷ୍ଟାର ୱିକେଟକିପର-ବ୍ୟାଟର ଋଷଭ ପନ୍ତଙ୍କ ଡାହାଣ ପାଦ ଆଙ୍ଗୁଠିରେ ଫ୍ରାକଚର ଯୋଗୁଁ ଇଂଲଣ୍ଡ ବିପକ୍ଷ ଚାଲିଥିବା ଟେଷ୍ଟ ସିରିଜର ବାକି ମ୍ୟାଚରୁ ବାଦ ପଡ଼ିବାର ସମ୍ଭାବନା ରହିଛି ଏହାକୁ ନେଇ ଏବେ ଭାରତୀୟ ଖେଳାଳି ଚିନ୍ତାରେ। କାରଣ ପନ୍ତ ନ ଥିଲେ ମିଡିଲ ଅର୍ଡରରେ ବ୍ୟାଟିଂ ଅର୍ଡର କିଏ ସମ୍ଭାଳିବ। କାରଣ ମିଡିଲ ଅର୍ଡରରେ ଅଧିକ ରନ କରିବାର ଦକ୍ଷତା ପନ୍ତଙ୍କର ରହିଛି। ସେ ନ ରହିଲେ ଦଳ ଏବେ ଯେଉଁ ନିର୍ଣ୍ଣାୟକ ମୋଡରେ ରହିଛି ଖେଳାଳିଙ୍କୁ ରନ କରିବାରେ ଅସୁବିଧା ହେବ। ମାଞ୍ଚେଷ୍ଟରରେ ଚାଲିଥିବା ଚତୁର୍ଥ ଟେଷ୍ଟର ପ୍ରଥମ ଦିନରେ ଆହତ ହେବା ପରେ ସେ ରିଟାୟାର୍ଡ ହର୍ଟ ହୋଇ ପଡିଆ ଛାଡ଼ିଥିଲେ।

ବିସିସିଆଇ ମେଡିକାଲ ଟିମ୍ ତାଙ୍କୁ ବିଶ୍ରାମ ନେବାକୁ ପରାମର୍ଶ ଦେଇଛି ଏବଂ ତାଙ୍କ ଅବସ୍ଥାର ନିକଟରୁ ନିରୀକ୍ଷଣ କରୁଛି ମେଡିକାଲ ଟିମ। ଏହି ଟେଷ୍ଟର ବାକି ଅଂଶରେ ୱିକେଟକିପିଂର ଦାୟିତ୍ୱ ଧ୍ରୁବ ଜୁରେଲ ସମ୍ଭାଳିବେ। ଏହି ଆଘାତ ସିରିଜର ଏକ ଗୁରୁତ୍ୱପୂର୍ଣ୍ଣ ପର୍ଯ୍ୟାୟରେ ଭାରତ ପାଇଁ ଏକ ବଡ଼ ଆଘାତ। ୬୮ତମ ଓଭରରେ ଋଷଭ ପନ୍ତ ୩୭ ରନରେ ବ୍ୟାଟିଂ କରୁଥିବା ବେଳେ କ୍ରିସ ୱୋକ୍ସଙ୍କ ବଲରେ ରିଭର୍ସ ସୁଇପ ଖେଳିବାକୁ ଚେଷ୍ଟା କରିଥିଲେ। ବଲଟି ତାଙ୍କ ବ୍ୟାଟରେ ସାମାନ୍ୟ ଏଜ ଲାଗି ଡାହାଣ ପାଦ ଆଙ୍ଗୁଠିରେ ଜୋରରେ ଆଘାତ କରିଥିଲା। ଇଂଲଣ୍ଡ ଦଳ ଏଲବିଡବ୍ଲ୍ୟୁ ପାଇଁ ଆପିଲ କରିଥିଲେ, କିନ୍ତୁ ରିପ୍ଲେରେ ଏଜ ନିଶ୍ଚିତ ହେବାରୁ ପନ୍ତ ଆଉଟରୁ ବର୍ତ୍ତିଥିଲେ, ଯଦିଓ ସେ ତୀବ୍ର ଯନ୍ତ୍ରଣାରେ ଥିଲେ। ମେଡିକାଲ ଟିମ୍ ତୁରନ୍ତ ମୈଦାନକୁ ପହଞ୍ଚିଥିଲେ ଏବଂ ପନ୍ତଙ୍କୁ ଏକ ଆମ୍ବୁଲାନ୍ସ ଗଲଫ କାର୍ଟରେ ମୈଦାନ ବାହାରକୁ ନେଇଯାଇଥିଲେ। ତାଙ୍କ ବୁଟ୍ ମଧ୍ୟରୁ ରକ୍ତ ବାହାରୁଥିବା ଦେଖାଯାଇଥିଲା ଏବଂ ତାଙ୍କ ପାଦ ଫୁଲି ଯାଇଥିଲା।

ତାଙ୍କୁ ତୁରନ୍ତ ସ୍କାନ ପାଇଁ ପଠାଯାଇଛି। ବିସିସିଆଇ ଏକ ରିପୋର୍ଟରେ କହିଛି, ମାଞ୍ଚେଷ୍ଟର ଟେଷ୍ଟର ପ୍ରଥମ ଦିନରେ ବ୍ୟାଟିଂ କରୁଥିବା ବେଳେ ଋଷଭ ପନ୍ତଙ୍କ ଡାହାଣ ପାଦରେ ଆଘାତ ଲାଗିଛି। ତାଙ୍କୁ ଷ୍ଟାଡିୟମରୁ ସ୍କାନ ପାଇଁ ନିଆଯାଇଛି। ବିସିସିଆଇ ମେଡିକାଲ ଟିମ୍ ତାଙ୍କ ଅବସ୍ଥା ନିରୀକ୍ଷଣ କରୁଛି। ଆରମ୍ଭରେ ଦଳ ପରିଚାଳନା ପନ୍ତଙ୍କୁ ଯନ୍ତ୍ରଣା କମିବାକୁ ମେଡିସିନ ସହାୟତାରେ ବ୍ୟାଟିଂ ପାଇଁ ଫେରାଇବାର ସମ୍ଭାବନା ବିଚାର କରିଥିଲେ। କିନ୍ତୁ ପରୀକ୍ଷା ପରେ ତାଙ୍କୁ ବିଶ୍ରାମ ନେବାକୁ ପରାମର୍ଶ ଦିଆଯାଇଛି ଏବଂ ଏହି ମ୍ୟାଚରୁ ତାଙ୍କୁ ବାଦ ଦିଆଯାଇଛି। ଏହା ପନ୍ତଙ୍କର ଏହି ସିରିଜରେ ଦ୍ୱିତୀୟ ଆଘାତ। ଏହା ପୂର୍ବରୁ ଲର୍ଡସରେ ତୃତୀୟ ଟେଷ୍ଟରେ ୱିକେଟକିପିଂ ସମୟରେ ତାଙ୍କ ଆଙ୍ଗୁଠିରେ ଆଘାତ ଲାଗିଥିଲା। ଯେଉଁଥିପାଇଁ ଇଂଲଣ୍ଡର ଦ୍ୱିତୀୟ ଇନିଂସରେ ଧ୍ରୁବ ଜୁରେଲଙ୍କୁ ୱିକେଟକିପିଂ କରିବାକୁ ପଡ଼ିଥିଲା। ଏହି ଆଘାତର ସମୟ ଭାରତ ପାଇଁ ଅତ୍ୟନ୍ତ ଖରାପ। ପନ୍ତ ଭଲ ଫର୍ମରେ ଥାଇ ମୋମେଣ୍ଟମ ଗଢ଼ୁଥିବା ବେଳେ ତାଙ୍କର ଅନୁପସ୍ଥିତି ମିଡଲ ଅର୍ଡରରେ ଏକ ବଡ଼ ଶୂନ୍ୟସ୍ଥାନ ସୃଷ୍ଟି କରିଛି। ପ୍ରଥମ ଦିନରେ ୬୧ ରନରେ ସ୍ଥିର ପାରି ଖେଳିଥିବା ଡେବ୍ୟୁଟାଣ୍ଟ ସାଇ ସୁଦର୍ଶନ ପ୍ରେସ କନଫରେନ୍ସରେ କହିଛନ୍ତି, “ପନ୍ତ ଆଜି ବହୁତ ଭଲ ବ୍ୟାଟିଂ କରୁଥିଲେ। ତାଙ୍କୁ ହରାଇବା ନିଶ୍ଚିତ ଭାବେ ଏକ ବଡ଼ କ୍ଷତି। କିନ୍ତୁ ବର୍ତ୍ତମାନ ବ୍ୟାଟିଂ କରୁଥିବା ଖେଳାଳିମାନେ ଏବଂ ଆମ ଅଲରାଉଣ୍ଡରମାନେ ଏହି କ୍ଷତିକୁ ପୂରଣ କରିବା ପାଇଁ ଦୀର୍ଘ ସମୟ ବ୍ୟାଟିଂ କରିବାକୁ ଚେଷ୍ଟା କରିବୁ।