ଆଇସିସି ଚାମ୍ପିଅନ୍ସ ଟ୍ରଫି ଫାଇନାଲ୍‌ରେ ପହଞ୍ଚିଛି ଭାରତ । ମଙ୍ଗଳବାର ଦୁବାଇରେ ଖେଳା ଯାଇଥିବା ପ୍ରଥମ ସେମି ଫାଇନାଲରେ ରୋହିତ ବାହିନୀ, ଅଷ୍ଟ୍ରେଲିଆକୁ ୪ ୱିକେଟ୍‌ରେ ହରାଇ ଫାଇନାଲ୍‌କୁ ଯାଇଛି । ଷ୍ଟିଭ୍ ସ୍ମିଥ୍‌ଙ୍କ ଅର୍ଦ୍ଧଶତକ ବଳରେ କଙ୍ଗାରୁ ଟିମ୍ ୨୬୫ ରନ୍‌ର ଟାର୍ଗେଟ୍ ଦେଇଥିଲା ଭାରତକୁ । ଯାହାକୁ ବିରାଟଙ୍କ ୮୪ ରନ୍‌ର ଦମଦାର୍ ପାଳି ବଳରେ ଭାରତ ହାସଲ କରି ନେଇଛି ।

ଦୁବାଇ ଅନ୍ତର୍ଜାତୀୟ ଷ୍ଟାଡିୟମ୍‌ରେ ମଙ୍ଗଳବାର ଖେଳା ଯାଇଥିବା ମ୍ୟାଚ୍ ଥିଲା ଭାରତୀୟଙ୍କ ଲାଗି ରେକର୍ଡର ଦିନ । ଦଳର ଅଧିନାୟକ ରୋହିତ ଶର୍ମା ଓ ବିରାଟ କୋହଲି ନୂଆ ରେକର୍ଡ କରିଛନ୍ତି । ଆଇସିସିର ସମସ୍ତ ଟୁର୍ଣ୍ଣାମେଣ୍ଟର ଫାଇନାଲ୍‌ରେ ପହଞ୍ଚିଥିବା ପ୍ରଥମ ଅଧିନାୟକ ହୋଇଛନ୍ତି ରୋହିତ ଶର୍ମା ।

ଆଇସିସି ଦିନିକିଆରେ ସର୍ବାଧିକ ଛକ୍କା ମାରିଥିବା ବ୍ୟାଟ୍ସମ୍ୟାନ୍ ହୋଇଛନ୍ତି ରୋହିତ ଶର୍ମା । ରୋହିତ ୪୨ଟି ପାଳି ଖେଳ ୬୫ଟି ଛକ୍କା ମାରିଛନ୍ତି । ଏଥିସହ ସେ ୱେଷ୍ଟଇଣ୍ଡିଜ୍‌ର କ୍ରିସ୍ ଗେଲଙ୍କୁ ପଛରେ ପକାଇଛନ୍ତି । କ୍ରିସ୍‌ ଗେଲ୍ ୫୧ ପାଳିରେ ୬୪ଟି ଛକ୍କା ମାରିଥିଲେ ।

ସେହିଭଳି ଦିନିକିଆରେ ବିରାଟ କୋହଲି ୧୪୧ କ୍ୟାଚ୍ ହାତେଇଛନ୍ତି । ଏଥିସହ ଅଷ୍ଟ୍ରେଲିଆର ରିକି ପଣ୍ଟିଂକୁ ପଛରେ ପକାଇଛନ୍ତି କୋହଲି । ଶ୍ରୀଲଙ୍କାର ମହେଲା ଜୟବର୍ଦ୍ଧନ ସର୍ବାଧିକ ୨୧୮ କ୍ୟାଚ୍ ନେଇଛନ୍ତି । ଏଥିସହ ଦିନିକିଆରେ ଦ୍ଵିତୀୟ ଇନିଂସରେ ବ୍ୟାଟିଂ କରି ବିରାଟ ସଂଗ୍ରହ କରିଛନ୍ତି ୮ ହଜାର ରନ୍ । ଏବେ ବିରାଟ ୧୬୬ଟି ମ୍ୟାଚ୍‌ରେ ୮୦୬୩ ରନ୍ ହାସଲ କରିଛନ୍ତି । ତାଲିକାରେ ପ୍ରଥମେ ଅଛନ୍ତି ସଚିନ୍ ତେନ୍ଦୁଲକର । ସଚିନ୍ ୨୩୬ ମ୍ୟାଚ୍‌ରେ ହାସଲ କରିଛନ୍ତି ୮୭୨୦ ରନ୍ ।

ଏହା ଛଡ଼ା ଆଉ ଏକ ରେକର୍ଡର ଅଧିକାରୀ ହୋଇଛନ୍ତି ବିରାଟ । ଆଇସିସି ଦିନିକିଆ ଟୁର୍ଣ୍ଣାମେଣ୍ଟରେ ବିରାଟ ସର୍ବାଧିକ ଅର୍ଦ୍ଧଶତକ ହାସଲ କରିଥିବା ବ୍ୟାଟ୍ସମ୍ୟାନ୍ ହୋଇଛନ୍ତି । ବିରାଟ ୫୩ ମ୍ୟାଚ୍ ଖେଳି ୨୪ଥର ୫୦ ରନରୁ ଊର୍ଦ୍ଧ୍ଵ ସ୍କୋର୍ କରିଛନ୍ତି । ଯେତେବେଳେ କି ସଚିନ ତେନ୍ଦୁଲକର ୨୩ଟି ଅର୍ଦ୍ଧଶତକ ମାରିଛନ୍ତି ।