ସମାନ ଚିନ୍ତାଧାରା, ସମାନ କାମ, ସମାନ ବାଟ ଏବଂ ଏକାଠି ବିତାଇଥିବା ଅନେକ ବର୍ଷ - ଏସବୁ ଯେକୌଣସି ସମ୍ପର୍କକୁ ଦୃଢ଼ କରିବା ପାଇଁ ଯଥେଷ୍ଟ ବୋଲି କୁହାଯାଏ। କିନ୍ତୁ ଯେତେବେଳେ ଆମେ ବ୍ୟାଡମିଣ୍ଟନ ତାରକା ସାଇନା ନେହୱାଲ ଏବଂ ପାରୁପଲ୍ଲୀ କଶ୍ୟପଙ୍କ ଭଳି ଦମ୍ପତିଙ୍କୁ ଅଲଗା ହେଉଥିବାର ଦେଖୁ, ସେତେବେଳେ ମନରେ ନିଶ୍ଚିତ ଭାବରେ ପ୍ରଶ୍ନ ଉଠେ।

ସାଇନା ଏବଂ କଶ୍ୟପ ଅନେକ ବର୍ଷ ଧରି ପରସ୍ପରକୁ ଡେଟ୍ କରିଥିଲେ, ଏକାଠି ଟୁର୍ଣ୍ଣାମେଣ୍ଟ ଖେଳିଥିଲେ ଏବଂ ତା'ପରେ ବିବାହ କରିଥିଲେ। ଉଭୟ ନିଜ ନିଜ କ୍ୟାରିୟରର ଶିଖରରେ ବଡ଼ ସଫଳତା ହାସଲ କରିଛନ୍ତି। ଏତେ ସବୁ ଏକାଠି ହାସଲ କରିବା ପରେ ଏବେ ଦୁହେଁ ଅଲଗା ହେବା ଖବର ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଉଭୟ ପାରସ୍ପରିକ ସହମତିରେ ଛାଡପତ୍ର ନେଇଥିବା ଖବର ସାମ୍ନାକୁ ଆସିବା ପରେ ସେମାନଙ୍କ ପ୍ରଶଂସକଙ୍କ ହୃଦୟ ଭାଙ୍ଗିଯାଇଛି।

ଭାରତର ଷ୍ଟାର ବ୍ୟାଡମିଣ୍ଟନ ଖେଳାଳି ସାଇନା ନେହୱାଲ ଛାଡପତ୍ର ନେବାକୁ ନିଷ୍ପତ୍ତି ନେଇଛନ୍ତି, ଯାହା ସେ ଏକ ସୋସିଆଲ ମିଡିଆ ପୋଷ୍ଟ ମାଧ୍ୟମରେ ତାଙ୍କ ପ୍ରଶଂସକମାନଙ୍କୁ ଜଣାଇଛନ୍ତି।

ସେ ପୋଷ୍ଟରେ କହିଛନ୍ତି ଯେ ସେ ତାଙ୍କ ସ୍ବାମୀ ପରୁପାଲି କଶ୍ୟପଙ୍କଠାରୁ ସେ ଅଲଗା ହେଉଛନ୍ତି। ସାଇନା ନେହୱାଲ ଇନଷ୍ଟାଗ୍ରାମ ଷ୍ଟୋରୀରେ ଏକ ନୋଟ ଶେୟାର କରି ଲେଖିଛନ୍ତି, ‘ଜୀବନ କେତେବେଳେ ଆମକୁ ଭିନ୍ନ ରାସ୍ତାରେ ନେଇଯାଏ। ବହୁତ ଚିନ୍ତା କରିବା ପରେ, ପାରୁପାଲି କଶ୍ୟପ ଏବଂ ମୁଁ ଅଲଗା ହେବାକୁ ନିଷ୍ପତ୍ତି ନେଇଛୁ।

ଆମେ ପରସ୍ପର ପାଇଁ ଶାନ୍ତି, ବିକାଶ ଏବଂ ସୁସ୍ଥ ଜୀବନ ବାଛିବାକୁ ନିଷ୍ପତ୍ତି ନେଇଛୁ। ମୁଁ ଏହି ସ୍ମରଣୀୟ ମୁହୂର୍ତ୍ତଗୁଡ଼ିକ ପାଇଁ କୃତଜ୍ଞ ଏବଂ ଭବିଷ୍ୟତ ପାଇଁ ଆପଣଙ୍କୁ ଶୁଭକାମନା ଜଣାଉଛି। ଏହି ସମୟରେ ଆମର ଗୋପନୀୟତାକୁ ବୁଝିବା ଏବଂ ସମ୍ମାନ କରିବା ପାଇଁ ଧନ୍ୟବାଦ।’

ଭାରତର ସବୁଠାରୁ ସଫଳ ବ୍ୟାଡମିଣ୍ଟନ ଖେଳାଳିମାନଙ୍କ ମଧ୍ୟରୁ ଜଣେ ଭାବରେ ବିବେଚିତ ସାଇନା ଗତ ବର୍ଷ ଶେଷ ଭାଗରେ ଅବସର ନେବାର ସୂଚନା ମଧ୍ୟ ଦେଇଥିଲେ। ଜୁନ ୨୦୨୩ରେ ସିଙ୍ଗାପୁର ଓପନରେ ପ୍ରଥମ ରାଉଣ୍ଡରୁ ବିଦାୟ ନେବା ପରଠାରୁ ସେ କୌଣସି ମ୍ୟାଚ ଖେଳି ନାହାନ୍ତି।

୩୫ ବର୍ଷୀୟା ସାଇନା ଗତ ବର୍ଷ ଶେଷ ଭାଗରେ ଏକ ପଡକାଷ୍ଟରେ ତାଙ୍କର ଆର୍ଥ୍ରାଇଟିସ ସମସ୍ୟା ବିଷୟରେ ଖୋଲାଖୋଲି କହିଥିଲେ ଏବଂ କହିଥିଲେ ଯେ ସେ ଅବସର ନେବା ବିଷୟରେ ଚିନ୍ତା କରୁଛନ୍ତି।

ସାଇନା ନେହୱାଲ ଏବଂ ପାରୁପଲ୍ଲୀ କଶ୍ୟପ ୧୯୯୭ ମସିହାରେ ଏକ ବ୍ୟାଡମିଣ୍ଟନ ଶିବିରରେ ସାକ୍ଷାତ କରିଥିଲେ, କିନ୍ତୁ ୨୦୦୨ ମସିହାରେ ଉଭୟ ନିୟମିତ ଭାବରେ ସାକ୍ଷାତ କରିବା ଆରମ୍ଭ କରିଥିଲେ ଯେତେବେଳେ ସେମାନେ ହାଇଦ୍ରାବାଦରେ ଏକାଠି ତାଲିମ ଆରମ୍ଭ କରିଥିଲେ।

୨୦୦୪ ମସିହାରେ ଦେଶର ପ୍ରମୁଖ ଜାତୀୟ ବ୍ୟାଡମିଣ୍ଟନ ପ୍ରଶିକ୍ଷକ ପୁଲେଲା ଗୋପୀଚାନ୍ଦ ତାଙ୍କ ବ୍ୟାଡମିଣ୍ଟନ ଏକାଡେମୀ ଆରମ୍ଭ କରିଥିଲେ, ସେତେବେଳେ ଉଭୟ ତାଙ୍କ ସହିତ ତାଲିମ ଆରମ୍ଭ କରିଥିଲେ, ଯେଉଁଠାରେ ଉଭୟଙ୍କ ମଧ୍ୟରେ ବନ୍ଧୁତା ହୋଇଥିଲା, ଯାହା ଧୀରେ ଧୀରେ ପ୍ରେମରେ ପରିଣତ ହୋଇଥିଲା ଏବଂ ୧୪ ଡିସେମ୍ବର ୨୦୧୮ରେ ଉଭୟ ବିବାହ କରିଥିଲେ।