ପୁଣି ଚର୍ଚ୍ଚାରେ ଭାରତୀୟ ଦଳର ପୂର୍ବତନ ଷ୍ଟାର୍ ଓପନର ଶିଖର ଧାଓ୍ୱନ । ନିକଟରେ ସେ ଦ୍ୱିତୀୟ ବିବାହ କରିଛନ୍ତି । ଏହାରି ଭିତରେ ତାଙ୍କୁ କୋର୍ଟରୁ ବଡ ଆଶ୍ୱସ୍ତି ମିଳିଛି । ପଟିଆଲା କୋର୍ଟ ଶିଖରଙ୍କ ସପକ୍ଷରେ ବଡ ରାୟ ଦେଇଛନ୍ତି । ତାଙ୍କର ପୂର୍ବ ପତ୍ନୀ ଆୟେଶା ଅଷ୍ଟ୍ରେଲିଆରେ ସମ୍ପତ୍ତି ବିକ୍ରିରେ ମିଳିଥିବା ୫ କୋଟି ୭୨ ଲକ୍ଷ ଟଙ୍କା ଶିଖରଙ୍କ ଫେରାଇବେ । ଏପରିକି ଅଷ୍ଟ୍ରେଲିଆ ଫ୍ୟାମିଲି କୋର୍ଟରେ ପ୍ରପର୍ଟି ସେଟେଲମେଣ୍ଟର ନିର୍ଦ୍ଦେଶ ଭାରତୀୟ ଆଇନ ଅନୁସାରେ ଲାଗୁ ହୋଇପାରିବ ନାହିଁ ବୋଲି କୋର୍ଟ ସ୍ପଷ୍ଟ କରିଛନ୍ତି ।

ଫ୍ୟାମିଲି କୋର୍ଟର ବିଚାରପତି ଜଷ୍ଟିସ ତେବେନ୍ଦ୍ର କୁମାର ଗର୍ଗ କହିଛନ୍ତି ଯେ, ଅଷ୍ଟ୍ରେଲିଆର ଫ୍ୟାମିଲି କୋର୍ଟ ପରିବାର ନିୟମ-୧୯୭୫ ଅନୁସାରେ ଦେଇଥିବା ନିର୍ଦ୍ଦେଶ ହିନ୍ଦୁ ମ୍ୟାରେଜ୍ ଆକ୍ଟ୍ ଏବଂ ଭାରତୀୟ ଲୋକନୀତିର ବିରୋଧାଭାସ କରୁଛି ।ତେଣୁ ବୈଦେଶିକ କୋର୍ଟର ନିଷ୍ପତ୍ତିକୁ ଭାରତରେ ଗ୍ରହଣ କରାଯାଇ ପାରିବ ନାହିଁ ।

ରିପୋର୍ଟ ଅନୁସାରେ, ଅଷ୍ଟ୍ରେଲିଆ ଫ୍ୟାମିଲି କୋର୍ଟ ଧାଓ୍ୱନଙ୍କ ସିଡନୀରେ ଥିବା ଦୁଇଟି ପ୍ରପର୍ଟି ବିକି ପୂର୍ବ ପତ୍ନୀ ଆୟେଶାଙ୍କୁ ଦେବାକୁ ନିର୍ଦ୍ଦେଶ ଦେଇଥିଲେ । ଏଠାରେ ପତ୍ନୀକୁ ପତିର ସମସ୍ତ ସମ୍ପତ୍ତିର ସହମାଲିକ ବୋଲି ନିୟମ ରହିଛି । କୋର୍ଟ ସମ୍ପତ୍ତିର ବଡ ଅଂଶ ସ୍ତ୍ରୀଙ୍କୁ ଦେବାକୁ ନିର୍ଦ୍ଦେଶ ଦେଇପାରିବେ । କିନ୍ତୁ ଦିଲ୍ଲୀର କୋର୍ଟ କହିଛନ୍ତି ଯେ, ଭାରତର ଏପରି କିଛି ନିୟମ ନାହିଁ । ବିବାହ ଭାରତୀୟ ନିୟମ ଅନୁସାରେ ହୋଇଥିଲା । ତେଣୁ ବାହାର ଦେଶର ଆଇନ୍ ଏଠାରେ ଲାଗୁ ହୋଇପାରିବ ନାହିଁ ।

ସୂଚନାଯୋଗ୍ୟ, ଶିଖର ୨୦୧୨ରେ ଆୟେଶା ମୁଖାର୍ଜୀଙ୍କୁ ବିବାହ କରିଥିଲେ । ବିବାହ ୯ ବର୍ଷ ଚାଲିପାରିଥିଲା । ୨୦୨୧ରେ ଉଭୟ ଅଲଗା ହେଉଥିବା ନେଇ ଖବର ଆସିଥିଲା । ୨୦୨୩ରେ ବିଧିବଦ୍ଧ ଭାବେ ବିବାହ ବିଚ୍ଛେଦ ଘଟିଥିଲା ।

ଶିଖରଙ୍କ ଦ୍ୱିତୀୟ ବିବାହ
ଶିଖର ୪୦ ବର୍ଷ ବୟସରେ ଦ୍ୱିତୀୟ ବିବାହ କରିଛନ୍ତି । ସେ ନିଜର ଆୟାରଲ୍ୟାଣ୍ଡ୍ ପ୍ରେମିକା ସୋଫି ସାଇନଙ୍କୁ ଜୀବନ ସାଥୀ କରିଛନ୍ତି । ଉଭୟ ଦୀର୍ଘ ଦିନ ଧରି ପରସ୍ପରକୁ ଡେଟ୍ କରୁଥିଲେ । ଗତ ୨୧ ତାରିଖରେ ଧୁମଧାମରେ ଦୁଇ ଜଣ ବିବାହ କରିଥିଲେ । ଏଥିରେ ଭାରତୀୟ ଦଳର ଅନେକ ଷ୍ଟାର୍ ପ୍ଲେୟାର ସାମିଲ ହୋଇଥିଲେ ।