ଇଂଲଣ୍ଡ ବିପକ୍ଷ ସିରିଜର ପ୍ରଥମ ମ୍ୟାଚ୍‌ରେ ଶୁଭମନ ଗିଲ ଶତକ ହାସଲ କରିଛନ୍ତି। ଅଧିନାୟକ ଭାବରେ ଏହା ତାଙ୍କର ପ୍ରଥମ ଟେଷ୍ଟ ଇନିଂସ ଥିଲା। ଏଥିରେ ସେ ଶତକ ହାସଲ କରି ଇତିହାସ ସୃଷ୍ଟି କରିଛନ୍ତି। ଅଧିନାୟକ ଭାବରେ ତାଙ୍କର ଡେବ୍ୟୁ ଟେଷ୍ଟ ଇନିଂସ୍‌ରେ ଶତକ ହାସଲ କରିବାରେ ସେ ଚତୁର୍ଥ ଭାରତୀୟ ଖେଳାଳି ହୋଇଛନ୍ତି। ଭଲ କରିବେ ବୋଲି ସମସ୍ତେ ଆଶା ରଖିଥିଲେ ସମସ୍ତଙ୍କ ଭରସାକୁ ଭାରତୀୟ ଖେଳାଳି ତଳେ ପକାଇବାକୁ ଦେଇ ନାହାନ୍ତି। ତାଙ୍କ ପୂର୍ବରୁ ବିରାଟ କୋହଲି, ସୁନୀଲ ଗାଭାସ୍କର ଏବଂ ବିଜୟ ହଜାରେ ଏହି ରେକର୍ଡ ସ୍ଥାପନ କରିଛନ୍ତି। ରୋହିତ ଶର୍ମାଙ୍କ ଟେଷ୍ଟ ଅବସର ପରେ ଗିଲଙ୍କୁ ଭାରତୀୟ ଟେଷ୍ଟ ଦଳର ଅଧିନାୟକ ନିଯୁକ୍ତ କରାଯାଇଥିଲା।

ସେ ଇଂଲଣ୍ଡ ବିପକ୍ଷରେ ଚାଲିଥିବା ଟେଷ୍ଟରେ ଅଧିନାୟକ ଭାବରେ ତାଙ୍କର ପ୍ରଥମ ମ୍ୟାଚ ଖେଳୁଛନ୍ତି। ଏହି ମ୍ୟାଚ୍‌ରେ ସେ ୧୪୦ ବଲ୍‌ରେ ତାଙ୍କର ଶତକ ପୂରଣ କରିଥିଲେ। ଅଧିନାୟକ ଭାବରେ ପ୍ରଥମ ଟେଷ୍ଟ ଇନିଂସରେ ଶତକ ହାସଲ କରିଥିବା ପ୍ରଥମ ଭାରତୀୟ ଖେଳାଳି ବିଜୟ ହଜାରେ ଥିଲେ, ଯିଏ ୧୯୫୧ ମସିହାରେ ଇଂଲଣ୍ଡ ବିପକ୍ଷରେ ଅପରାଜିତ ୧୬୪ ରନ କରିଥିଲେ। ତାଙ୍କ ପରେ ସୁନୀଲ ଗାଭାସ୍କର ୧୯୭୬ ମସିହାରେ ନ୍ୟୁଜିଲାଣ୍ଡ ବିପକ୍ଷରେ ଅଧିନାୟକ ଭାବରେ ତାଙ୍କର ପ୍ରଥମ ଟେଷ୍ଟ ଇନିଂସରେ ୧୧୬ ରନ କରିଥିଲେ। ବିରାଟ କୋହଲି ଅଧିନାୟକତ୍ୱ ଗ୍ରହଣ କରିବା ସମୟରେ, ସେ ୨୦୧୪ ମସିହାରେ ତାଙ୍କର ପ୍ରଥମ ଇନିଂସରେ ୧୧୫ ରନ କରିଥିଲେ। ଏବେ ଗିଲ ମଧ୍ୟ ଏହି କିମ୍ବଦନ୍ତୀ ତାଲିକାରେ ସାମିଲ ହୋଇଛନ୍ତି। ଟେଷ୍ଟ କ୍ରିକେଟରେ ଏହା ପ୍ରଥମ ଥର ଯେ ଶୁବମନ ଗିଲ ନମ୍ବର-୪ ରେ ବ୍ୟାଟିଂ କରୁଛନ୍ତି। ପୂର୍ବରୁ ବିରାଟ କୋହଲି ଏହି ସ୍ଥାନରେ ବ୍ୟାଟିଂ କରୁଥିଲେ, କିନ୍ତୁ ସେ ଏବେ ଅବସର ନେଇଛନ୍ତି। ଇଂଲଣ୍ଡ ବିପକ୍ଷ ସିରିଜ ପୂର୍ବରୁ ଶୁବମନ ଗିଲ ତାଙ୍କ ୩୨ ମ୍ୟାଚ ବିଶିଷ୍ଟ ଟେଷ୍ଟ କ୍ୟାରିୟରରେ ୧୮୯୩ ରନ କରିଥିଲେ। ଏବେ ଇଂଲଣ୍ଡ ବିପକ୍ଷରେ ୧୦୭ ରନ କରି ସେ ଟେଷ୍ଟ ଫର୍ମାଟରେ ୨୦୦୦ ରନ ପୂରଣ କରିଛନ୍ତି। ସେ ତାଙ୍କର ୬୦ତମ ଟେଷ୍ଟ ଇନିଂସରେ ଏହି ସଫଳତା ହାସଲ କରିଛନ୍ତି।