ଚାମ୍ପିଅନ୍ସ ଟ୍ରଫିର ପ୍ରଥମ ସେମିଫାଇନାଲ୍‌ରେ ଅଷ୍ଟ୍ରେଲିଆ ହାରିବା ପରେ ଦଳକୁ ଲାଗିଛି ଝଟ୍‌କା । ଭାରତ ଠାରୁ ୪ ୱିକେଟ୍‌ରେ ହାରିବା ପରେ ଦିନିକିଆ କ୍ରିକେଟ୍‌ରୁ ଅବସର ଘୋଷଣା କରିଛନ୍ତି ଅଷ୍ଟ୍ରେଲିଆ ଅଧିନାୟକ ଷ୍ଟିଭ ସ୍ମିଥ୍ । ଏନେଇ ବୁଧବାର ସୂଚନା ଦେଇଛି ଅଷ୍ଟ୍ରେଲିଆ କ୍ରିକେଟ୍ ବୋର୍ଡ । ତେବେ ଦିନିକିଆକୁ ବାଏ ବାଏ କହିଥିବା ସ୍ମିଥ୍ ଟେଷ୍ଟ ଓ ଟି-ଟ୍ଵେଣ୍ଟି ଖେଳିବେ ।

୩୫ ବର୍ଷୀୟ ଷ୍ଟିଭ୍‌, ଭାରତ ଠାରୁ ହାରିବା ପରେ ତାଙ୍କ ନିଷ୍ପତ୍ତି ନେଇ ସାଥୀ ଖେଳାଳିଙ୍କୁ ଜଣାଇଥିଲେ । ସ୍ମିଥ୍ କହିଥିଲେ, ଏବେ ଏମିତି ଲାଗୁଛି ଯେମିତି ଅବସର ନେବାର ସମୟ ଆସି ଗଲାଣି । ଏହି ଯାତ୍ରା ବେଶ୍ ରୋମାଞ୍ଚକର ଥିଲା ଏବଂ ମୁଁ ପ୍ରତି ମିନିଟ୍‌ର ଆନନ୍ଦ ନେଇଛି । ଅନେକ ଅଭୁଲା ମୁହୂର୍ତ୍ତ ଓ ସ୍ମୃତି ରହିଛି । ୨ଟି ବିଶ୍ଵକପ୍ ଜିତିବା ବଡ଼ ଉପଲବ୍ଧି ।

Steve Smith has played his last ODI #ChampionsTrophy

— cricket.com.au (@cricketcomau) March 5, 2025

ଷ୍ଟିଭ୍ ସ୍ମିଥ କହିଛନ୍ତି, ଟେଷ୍ଟ କ୍ରିକେଟ୍‌କୁ ଏବେ ବି ପ୍ରାଥମିକତା ଦେଉଛି । ବିଶ୍ଵ ଟେଷ୍ଟ ଚାମ୍ପିଅନସିପ୍ ଫାଇନାଲ୍, ଶୀତରେ ୱେଷ୍ଟଇଣ୍ଡିଜ୍ ଏବଂ ଘରୋଇ ଗ୍ରାଉଣ୍ଡରେ ଇଂଲଣ୍ଡ ବିପକ୍ଷରେ ଖେଳିବାକୁ ନେଇ ଉତ୍ସାହିତ ରହିଛି । ମୋତେ ଲାଗୁଛି ମୁଁ ଆହୁରି ଅନେକ ଯୋଗଦାନ ଦେବି, ଆଗକୁ ଆହୁରି କିଛି କରିବି ।

ସୂଚନା ଯୋଗ୍ୟ, ପ୍ୟାଟ୍ କମିନ୍ସ ଆହାତ ହେବା ପରେ ଷ୍ଟିଭ୍ ସ୍ମିଥ ଚାମ୍ପିଅନ୍ସ ଟ୍ରଫିରେ ଅଷ୍ଟ୍ରେଲିଆ ଟିମ୍‌ର ଅଧିନାୟକ ଦାୟିତ୍ଵ ସମ୍ଭାଳିଥିଲେ । ଆଉ ସେମି ହାରିବା ପରେ ସ୍ମିଥ୍ କହିଥିଲେ, ମୁସ୍କିଲ୍ ୱିକେଟ୍ ଥିଲା ଓ ବ୍ୟାଟିଂ କରିବା ସହଜ ନ ଥିଲା । ତାଙ୍କ ଅନୁସାରେ, ଦଳ ୨୮୦ ରନ୍‌ରୁ ଅଧିକ ସ୍କୋର୍ କରିଥିଲେ, ମ୍ୟାଚ୍‌ର ଫଳାଫଳ ଅଲଗା ହୋଇଥାନ୍ତା ।

ସ୍ମିଥ୍‌ଙ୍କ ଦିନିକିଆ ରେକର୍ଡ

ଅଷ୍ଟ୍ରେଲିଆ ପାଇଁ ଷ୍ଟିଭ୍ ସ୍ମିଥ୍ ୧୭୦ଟି ଦିନିକିଆ ମ୍ୟାଚ୍ ଖେଳିଛନ୍ତି । ଯେଉଁଥିରେ ୪୩.୨୮ ହାର, ୮୬.୯୬ ଷ୍ଟ୍ରାଇକ୍ ରେଟ୍‌ରେ ସ୍ମିଥ୍ ୫୮୦୦ ରନ୍ ସ୍କୋର କରିଛନ୍ତି । ୧୨ଟି ଶତକ, ୩୫ଟି ଅର୍ଦ୍ଧଶତକ ମାରିଛନ୍ତି ସ୍ମିଥ୍ । ଦିନିକିଆରେ ତାଙ୍କର ସର୍ବାଧିକ ବ୍ୟକ୍ତିଗତ ସ୍କୋର ୧୬୪ ରନ୍ । ଯାହାକି ୨୦୧୬ରେ ସିଡନୀରେ ନ୍ୟୁଜିଲାଣ୍ଡ ବିପକ୍ଷରେ ହାସଲ କରିଥିଲେ । ଏହା ଛଡ଼ା ସେ ଦିନିକିଆରେ ୨୮ଟି ୱିକେଟ୍ ନେଇଛନ୍ତି ।

୬୪ଟି ଦିନିକିଆରେ ଅଷ୍ଟ୍ରେଲିଆ ଦଳର ନେତୃତ୍ଵ ନେଇଥିଲେ ସେ । ତାଙ୍କ ନେତୃତ୍ଵରେ କଙ୍ଗାରୁ ଦଳ ୩୨ଟି ମ୍ୟାଚ୍ ଜିତିଥିବା ବେଳେ ୨୮ଟି ହାରିଥିଲା । ୪ଟି ମ୍ୟାଚ୍ ଅମୀମାଂଶିତ ରହିଥିଲା । ୨୦୧୫ ଓ ୨୦୧୩ ଦିନିକିଆ ବିଶ୍ଵକପ୍ ବିଜେତା ଦଳରେ ଥିଲେ ଷ୍ଟିଭ୍ ।

ଦୁବାଇରେ ଭାରତ ବିପକ୍ଷ ଚାମ୍ପିଅନ୍ସ ଟ୍ରଫିର ସେମିଫାଇନାଲ୍‌ରେ ସ୍ମିଥ୍ ୯୬ ବଲ୍‌ରେ ୭୩ ରନ୍‌ର ଲଢୁଆ ପାଳି ଖେଳିଥିଲେ । ୪ଟି ଚଉକା, ଗୋଟିଏ ଛକ୍କା ମାରିଥିବା ବେଳେ ସାମିଙ୍କ ବଲ୍‌ରେ ଆଉଟ୍ ହୋଇଥିଲେ ।