ଭୁବନେଶ୍ଵର: ବୁଧବାର କର୍ଣ୍ଣାଟକ ଆଲୁରରେ ଖେଳା ଯାଇଥିବା ବିଜୟ ହଜାରେ ଟ୍ରଫି ଓଡ଼ିଶା କ୍ରିକେଟ୍ ପାଇଁ ପାଲଟିଛି ଏକ ଐତିହାସିକ ଦିନ । ସୌରାଷ୍ଟ୍ର ବିପକ୍ଷରେ ଦ୍ଵିଶତକ କରି ଓଡ଼ିଶା କ୍ରିକେଟ୍ ପାଇଁ ବିରଳ ଗୌରବ ଆଣି ଦେଇଛନ୍ତି ସ୍ଵସ୍ତିକ ସାମଲ । ୧୬୯ ବଲ୍‌ରେ ୨୧୨ ରନର ବିଶାଳ ସ୍କୋର୍ କରିଛନ୍ତି ସ୍ଵସ୍ତିକ । ୨୧ଟି ଚଉକା ଓ ୬ଟି ଛକା ମାଧ୍ୟମରେ ସ୍ଵସ୍ତିକ ଦ୍ଵିଶତକ ମାରିଛନ୍ତି ।

ସବୁଠାରୁ ବଡ଼ କଥା ହେଉଛି ସ୍ଵସ୍ତିକଙ୍କ ଏହି ପାଳି, ବିଜୟ ହଜାରେ ଟ୍ରଫି ଇତିହାସରେ ପଞ୍ଚମ ସର୍ବାଧିକ ବ୍ୟକ୍ତିଗତ ସ୍କୋର ଭାବେ ପରିଗଣିତ ହୋଇଛି । ୨୦୧୯ରେ ମୁମ୍ବାଇ ବ୍ୟାଟର ଯଶସ୍ଵୀ ଜୟସୱାଲ୍ କରିଥିବା ୨୦୩ ରନକୁ ଅତିକ୍ରମ କରି ଏହି ରେକର୍ଡ ହାସଲ କରିଛନ୍ତି ସ୍ଵସ୍ତିକ । ତାଙ୍କ ଦ୍ଵିଶତକ ବଳରେ ୫୦ ଓଭରରେ ସୌରାଷ୍ଟ୍ର ଆଗରେ ୩୪୫ ରନର ବିଶାଳ ସ୍କୋର ଛିଡ଼ା କରିଥିଲା ଓଡ଼ିଶା । ଯେଉଁଥିରେ ଟିମ୍ ଓଡ଼ିଶା ଅଧିନାୟକ ବିପ୍ଳବ ସାମନ୍ତରାୟଙ୍କ ଶତକୀୟ ପାଳି ମଧ୍ୟ ରହିଛି । ୯୧ ବଲ ଖେଳି ଶତକ କରିଥିଲେ ବିପ୍ଳବ । ଏଥିରେ ୭ଟି ଚୌକା ଓ ୩ଟି ଛକା ରହିଛି ।

ଏଥିସହ ପଢ଼ନ୍ତୁ: ୩୩ ବଲ୍‌ରେ କଲେ ଶତକ; ସବୁ ରେକର୍ଡ ଭାଙ୍ଗିଲେ ଇଷାନ କିଶନ

ଓଡ଼ିଶା ପକ୍ଷରୁ ଓପନିଂ କରିବାକୁ ଆସିଥିବା ସ୍ଵସ୍ତିକଙ୍କ ଧୁଆଁଧାର ବ୍ୟାଟିଂ ଆଗରେ ଧରାଶାୟୀ ହୋଇପଡ଼ିଥିଲା ସୌରାଷ୍ଟ୍ରର ବୋଲିଂ ଲାଇନ୍ ଅପ୍ । ୨୧ଟି ଚଉକା ଓ ୮ଟି ଛକା ମାରି ପ୍ରତିପକ୍ଷଙ୍କୁ ନିରାଶ କରିଥିଲେ ଏହି ଷ୍ଟାର ବ୍ୟାଟର । ଦୁର୍ଭାଗ୍ୟର କଥା ୨୦୨୬ IPL ପାଇଁ ସାଥୀ ଖେଳାଳି ରାଜେଶ ସାମନ୍ତରାୟଙ୍କ ସହ ନିଲାମୀ ତାଲିକାରେ ଥିଲେ ସ୍ବସ୍ତିକ ସାମଲ । ହେଲେ କୌଣସି ଫ୍ରାଞ୍ଚାଇଜ୍ ତାଙ୍କୁ କିଣିବା ପାଇଁ ଆଗ୍ରହ ଦେଖାଇ ନଥିଲେ । ସେହିପରି ଆଉ ଏକ ଦୁର୍ଭାଗ୍ୟ ହେଲା ସ୍ଵସ୍ତିକଙ୍କ ଦମଦାର ଦ୍ଵିଶତକ ସତ୍ତ୍ଵେ ସୌରାଷ୍ଟ୍ରଠାରୁ ପରାଜିତ ହୋଇଛି ଓଡ଼ିଶା । ୪୮ ଓଭର ୫ଟି ବଲ୍ ଖେଳି ୫ ୱିକେଟରେ ଵିଜୟ ଲକ୍ଷ୍ୟକୁ ହାସଲ କରି ନେଇଛି ସୌରାଷ୍ଟ୍ର ।

ଅନ୍ତର୍ଜାତୀୟ ମ୍ୟାଚରେ ଦର୍ଶକଙ୍କ ମନୋରଞ୍ଜନ କରୁଥିବା ଷ୍ଟାର ବ୍ୟାଟର ବିରାଟ କୋହଲି ଏବଂ ରୋହିତ ଶର୍ମା ମଧ୍ୟ ଘରୋଇ ଦର୍ଶକଙ୍କୁ ନିରାଶ କରିନାହାନ୍ତି । ଉଭୟ ବିଜୟ ହଜାରେ ଟ୍ରଫିରେ ଖେଳିଛନ୍ତି ଶତକୀୟ ଇନିଂସ । ୯୪ ବଲରେ ୧୫୫ ରନ୍ ସହ ମୁମ୍ବାଇକୁ ଜିତାଇବାରେ ପ୍ରମୁଖ ଭୂମିକା ନେଇଥିଲେ ରୋହିତ ଶର୍ମା । ଆନ୍ଧ୍ର ଵିପକ୍ଷରେ ଦମଦାର ଶତକୀୟ ପାଳି ଖେଳିଥିଲେ ବିରାଟ କୋହଲି ତାଙ୍କ ୧୩୧ ରନ୍ ବଳରେ ଆନ୍ଧ୍ରକୁ ମାତ୍ ଦେଇଛି ଦିଲ୍ଲୀ ।

ଏଥିସହ ପଢ଼ନ୍ତୁ: ୧୯ ବର୍ଷରୁ କମ୍ ବିଶ୍ୱକପ: ଫୋକସରେ ରହିବେ ବୈଭବ ସୂର୍ଯ୍ୟବଂଶୀ

ପ୍ରଥମ ଶ୍ରେଣୀ ଘରୋଇ କ୍ରିକେଟରେ ବି ରୋମାଞ୍ଚ ଭରିଥିଲା ବୈଭବ ସୂର୍ଯ୍ୟବଂଶୀ ଏବଂ ଇଷାନ କିଶନଙ୍କ ଶତକୀୟ ପାଳି । ୮୪ ବଲରେ ୧୯୦ ରନର ବିଶାଳ ସ୍କୋର୍ ଛିଡ଼ା କରିଥିଲେ ସୂର୍ଯ୍ୟବଂଶୀ । ଆଉ ୩୩ ବଲରେ ସେଞ୍ଚୁରୀ ମାରିଥିଲେ ଝାଡ଼ଖଣ୍ଡ ଅଧିନାୟକ ଇଶାନ କିଶନ ।