ମେଡାଲ୍ ଉପରେ ‘ଓଜନ’ ଭାରୀ ପଡ଼ିଲା
ଅର୍ଗସ ବ୍ୟୁରୋ: ଶୂନ ଉପରେ ସଜେଇ ହେଇଥିବା ସୁନାର ସ୍ବପ୍ନ ଆଜି ତୁନା ହୋଇଛି । ଶବ୍ଦମାନେ ପ୍ରାର୍ଥନା ମୁଦ୍ରା ଛିଡ଼ା ହୋଇଥିବା ବେଳେ ସମୟ ବି ଗୁହାରୀ କରିବାର ଅଧିକାର ଛଡ଼େଇ ନେଇଛି । ଅଲିମ୍ପିକ୍ସରେ ସୁନା ସ୍ବପ୍ନ ଭାଙ୍ଗିଯିବା ପରେ ହତବାକ୍ ଦେଶ, ଦେଶବାସୀ, ସବୁଠାରୁ ବେଶୀ ନିର୍ବାକ ସୁନା ଦାବେଦାର ସୁନାଝିଅ ଭିନେଶ ଫୋଗାଟ୍ । କାଲିର ତିନିଟି ମ୍ୟାଚରେ ଚମତ୍କାର ପ୍ରଦର୍ଶନ କରି ଫାଇନାଲରେ ଏଣ୍ଟ୍ରି କରିଥିଲେ ଭିନେଶ । ଆଶା ଥିଲା ଆଜି ସୁନା ଜିତି ପ୍ୟାରିସରେ ତ୍ରିରଙ୍ଗା ଉଡ଼ାଇବେ । ହେଲେ ରାତି ପାହୁପାହୁ ସମସ୍ତଙ୍କ ହୃଦୟ ଚୁନା ହୋଇଗଲା ।
ନିର୍ଦ୍ଧାରିତ ଓଜନ ଠାରୁ ତାଙ୍କ ଶରୀର ଓଜନ ଅଧିକ ହେବାରୁ ଟୁର୍ଣ୍ଣାମେଣ୍ଟରୁ ତାଙ୍କୁ ବାଦ୍ ଦିଆଯାଇଥିଲା । ଏଭଳି ଦୁଃଖଦ ଖବର ସମ୍ପର୍କରେର ଜାଣିବା ପରେ ଭାରତୀୟ ଅଲିମ୍ପିକ୍ ଆସୋସିଏସନର ସଭାପତି ପିଟି ଉଷା ତାଙ୍କୁ ଭେଟିବା ସହ ତାଙ୍କୁ ସମର୍ଥନ ଜଣାଇଥିଲେ । ଏଭଳି କଠିନ ପରିସ୍ଥିତିରେ ଧୈର୍ଯ୍ୟ ଧରିବାକୁ ପରାମର୍ଶ ଦେଇଛନ୍ତି।ୟୁନାଇଟେଡ୍ ୱାର୍ଲ୍ଡ ରେସଲିଂ ବା ଅନ୍ତର୍ଜାତୀୟ କୁସ୍ତି ସଂଘର ନିୟମାନୁସାରେ ମ୍ୟାଚ ଦିନ ସକାଳେ ଟୁର୍ଣ୍ଣାମେଣ୍ଟ ଖେଳୁଥିବା ରେସଲରମାନଙ୍କର ଓଜନ ମପାଯିବା ବାଧ୍ୟତାମୂଳକ । ଗତକାଲି ମ୍ୟାଚ୍ ପୂର୍ବରୁ ୫୦ କେଜି ଫ୍ରିଷ୍ଟାଇଲ ଇଭେଣ୍ଟରେ ଭାଗ ନେଇଥିବା ଭିନେଶଙ୍କର ଓଜନ ମପାଯାଇଥିଲା ଏବଂ ଓଜନ ଥିଲା ୪୯ କେଜି ୯୦୦ ଗ୍ରାମ । ତେବେ ଏହା ପୂର୍ବରୁ ସାରା ରାତି ନ ଶୋଇ, ନଖାଇ, ନପିଇ କଡ଼ା ପରିଶ୍ରମ କରିଥିଲେ ଭିନେଶ । ପରେ ମ୍ୟାଚ୍ ପାଇଁ ପାଣି ସହ ଆବଶ୍ୟକୀୟ ନ୍ୟୁଟ୍ରିସନ ବି ନେଇଥିଲେ ।
ତେବେ ଗତକାଲି ତିନିଟି ଯାକ ମ୍ୟାଚ୍ ସରିବା ପରେ ଓଜନ ରୁମକୁ ଯାଇ ଓଜନ୍ ହେବା ବେଳେ ତାଙ୍କ ଓଜନ ଥିଲା ୫୨ କେଜି ୭୦୦ ଗ୍ରାମ । ଇଏ ହେଉଛି ସେହି ସମୟର ଏକ୍ସକ୍ଲୁସିଭ୍ ଫଟୋଚିତ୍ର ଯେତେବେଳେ ସେ ମ୍ୟାଚ୍ ପରେ ଓଜନ ରୁମକୁ ତରବରିଆ ଭାବେ ଯାଉଛନ୍ତି । ପରେ ଆରମ୍ଭ ହୋଇଥିଲା ଟ୍ରେନିଂ । ରାତି ସାରା ଉଜାଗର ରହି ୫୦ କେଜି ଓଜନ ଭିତରେ ନିଜ ଓଜନ ରଖିବା ପାଇଁ ନଖାଇ, ନପିଇ ସାଇକ୍ଲିଂ, ସ୍କିପିଂ କରିବା ଠାରୁ ଆରମ୍ଭ କରି ଯଥାସମ୍ଭବ ଚେଷ୍ଟା କରିଥିଲେ । ଟୁର୍ଣ୍ଣାମେଣ୍ଟର ନିୟମାନୁସାରେ ଆଜି ସକାଳେ ଅଫିସିଆଲି ତାଙ୍କ ଓଜନ ମପାଯାଇଥିବା ବେଳେ ଓଜନ କଣ୍ଟାରେ ଏହା ଥିଲା ୫୦ କେଜି ୧୦୦ ଗ୍ରାମ । ଅର୍ଥାତ୍ ମାତ୍ର ୧୦୦ ଗ୍ରାମ ଓଜନ ପାଇଁ ଭିନେଶଙ୍କର ସୁନା ସ୍ବପ୍ନ ଚୁରମାର୍ ହୋଇଯାଇଛି । ହୁଏତ ଟୁର୍ଣ୍ଣାମେଣ୍ଟରୁ ଓହରିଯାଇଥିଲେ କି ଆହତ ହେବାର ବାହାନା କରିଥିଲେ ତାଙ୍କୁ ହୁଏତ ରୌପ୍ୟ ପଦକ ମିଳିଥାନ୍ତା ବୋଲି କିଛି ଭାବି ପାରନ୍ତି । ହେଲେ ସତ କଥା ହେଉଛି ଏମିତି ହୋଇଥିଲେ ବି ସେ ଡିସକ୍ବାଲିଫାଏ ହୋଇଥାନ୍ତେ । ପରେ ଘଟଣାକୁ ନେଇ ଆନ୍ତର୍ଜାତିକ ଅଲିମ୍ପିକ୍ସ କମିଟି ନିକଟରେ ଇଣ୍ଡିଆନ୍ ଅଲିମ୍ପିକ୍ ଆସୋସିଏସନ୍ ଅପିଲ କରିଥିଲେ ବି ଫଳ କିଛି ହେବନି ବୋଲି ସ୍ପଷ୍ଟ କରିଛି UWW । ଆପଣ ବିଶ୍ବାସ କରିବେନି ଓଜନ କମାଇବା ପାଇଁ ଭିନେଶ ନିଜ ଚୁଟି ବି କାଟି ଦେଇଥିଲେ । ଏହାଠାରୁ ଅଧିକ ଆଗକୁ ଯାଇଥିଲେ ହୁଏତ ତାଙ୍କ ଜୀବନ ପ୍ରତି ବିପଦ ଉତ୍ପନ୍ନ ହୋଇଥାନ୍ତା ।
📱 Get Argus News App
✨ତେବେ ଏଭଳି ସମୟରେ ସାରା ଦେଶ ଭିନେଶଙ୍କ ପଛରେ ଛିଡ଼ା ହୋଇଛି । ପ୍ରଧାନମନ୍ତ୍ରୀ ତତକ୍ଷଣାତ୍ ଘଟଣାର ସଂଜ୍ଞାନ ନେବା ସହ ସାରା ଦେଶ ତାଙ୍କ ସହ ଥିବା ନେଇ ଟ୍ବିଟ୍ କରିଥିଲେ । ଏହା ସହ ଇଣ୍ଡିଆନ୍ ଅଲିମ୍ପିକ୍ ଆସୋସିଏସନର ମୁଖ୍ୟ ପିଟି ଉଷାଙ୍କ ସହ କଥା ହୋଇଥିଲେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଠାରୁ ଆରମ୍ଭ କରି ବିରୋଧୀ ଦଳ ନେତା ରାହୁଲ ଗାନ୍ଧିଙ୍କ ଯାଏଁ, ସମସ୍ତେ ଭିନେଶଙ୍କ ପଛରେ ଛିଡ଼ା ହୋଇଛନ୍ତି । ଏପରିକି ସଂସଦରେ ବକ୍ତବ୍ୟ ରଖି ସରକାର ସମ୍ପୂର୍ଣ୍ଣ ରୂପେ ତାଙ୍କ ପଛରେ ଥିବା କହିଛନ୍ତି କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡବ୍ୟ ।ପ୍ୟାରିସ ଅଲିମ୍ପିକ୍ସ ମିଶାଇଲେ ଏହା ଥିଲା ଫୋଗାଟଙ୍କର ତୃତୀୟ ଟୁର୍ଣ୍ଣାମେଣ୍ଟ । ପୂର୍ବରୁ ଇନଜୁରୀ ପାଇଁ ସେ ମେଡାଲ୍ ଦୌଡ଼ରୁ ବାଦ୍ ପଡ଼ିଥିବା ବେଳେ ଏଥର ଓଜନ ତାଙ୍କ ପାଇଁ ପ୍ରତିବନ୍ଧକ ସାଜିଛି । ଏଭଳି ସ୍ଥିତିରେ ଦେଶ ତାର ଏହି ସୁନା ଝିଅ ପାଇଁ ଗର୍ବିତ ଓ ଏକ ହୋଇ ଛିଡ଼ା ହୋଇଛି ।
ଅଧିକ ପଢ଼ନ୍ତୁ ଖେଳ ଖବର: