ମହାକାଶରେ ଗଜା ହୋଇଥିବା ଝୁଡଙ୍ଗ ମଞ୍ଜିର ଭିଡିଓ ଜାରି କଲା ଇସ୍ରୋ

ଅର୍ଗସ ବ୍ୟୁରୋ : ମହାକାଶରେ ଗଜା ହୋଇଥିବା ଝୁଡଙ୍ଗ ମଞ୍ଜିର ଭିଡିଓ ଜାରି କରିଛି ଇସ୍ରୋ । PSLV C 60 ପୋଏମ୍-4 ମଡ୍ୟୁଲର ଶକ୍ତିଶାଳୀ କ୍ୟାମେରା ଲେନ୍ସରେ କଏଦ ହୋଇଛି ବୀଜ ଅଙ୍କୁରିତ ହେବାର ପୂରା ପ୍ରକ୍ରିୟା । ମହାକାଶରେ ଜୀବନର ସନ୍ଧାନ ଜାରି ରହିଥିବାବେଳେ ଭାରତୀୟ ମହାକାଶ ଗବେଷଣା କେନ୍ଦ୍ରର କ୍ରପ୍ ପରୀକ୍ଷଣ ସଫଳ ହୋଇଛି । ଗତ ଡିସେମ୍ବର ୩୦ରେ ଲଞ୍ଚ ହୋଇଥିବା ସ୍ପାଡେକ୍ସ ମିଶନ ସହିତ ଇସ୍ରୋ ପୋଏମ ମିଶନ ମଧ୍ୟ କାର୍ଯ୍ୟ କରୁଛି ।

ଏଥି ମିଶନରେ ମହାକାଶରେ ପ୍ରଥମ ଥର ପାଇଁ ଗବେଷଣାଗାର ପ୍ରତିଷ୍ଠା କରିଛି ଇସ୍ରୋ । ଭବିଷ୍ୟତ ସ୍ପେଶ୍‌ ମିଶନ୍ ପାଇଁ ଜୀବନ ସହାୟତା ପ୍ରଣାଳୀ ବିକାଶରେ ଏହି ମିଶନ ବେଶ ସହାୟକ ହେବା ସମ୍ଭାବନା ରହିଛି । ଗତ 4 ତାରିଖରେ ସୋସିଆଲ ମିଡିଆ ଏକ୍ସରେ ମଞ୍ଜିରୁ ହେଲା ଗଜା ହେବାର ଫଟୋଚିତ୍ର ଜାରି କରିଥିଲା ଇସ୍ରୋ । ମିଶନ ଜରିଆରେ ମହାକାଶକୁ ୮ଟି ଝୁଡ଼ଙ୍ଗ ମଞ୍ଜି ପଠାଯାଇଥିଲା।