PAN Card Rules / କେବଳ ITR ନୁହେଁ, ଏହି ୫ଟି ବଡ଼ ଆର୍ଥିକ କାରବାର ପାଇଁ ମଧ୍ୟ ଜରୁରୀ PAN Card

ସାଧାରଣତଃ ଅଧିକାଂଶ ଲୋକ ପାନ୍ କାର୍ଡକୁ କେବଳ ଇନକମ୍ ଟ୍ୟାକ୍ସ ରିଟର୍ଣ୍ଣ (ITR) ଦାଖଲ କରିବାର ଏକ ମାଧ୍ୟମ ବୋଲି ଭାବନ୍ତି । କିନ୍ତୁ ଆପଣ ଜାଣନ୍ତି କି, ଦେଶରେ ଏପରି ଅନେକ ବଡ଼ ଆର୍ଥିକ କାରବାର ରହିଛି, ଯେଉଁଠାରେ ପାନ୍ କାର୍ଡ ଦେବା ଆଇନଗତ ଭାବେ ବାଧ୍ୟତାମୂଳକ ?

ଆପଣ ଜମି କିମ୍ବା ଘର କିଣୁଥାନ୍ତୁ, ଗାଡ଼ି କିଣୁଥାନ୍ତୁ ଅଥବା ସେୟାର ବଜାରରେ ନିବେଶ କରୁଥାନ୍ତୁ, ଅନେକ କ୍ଷେତ୍ରରେ ପାନ୍ କାର୍ଡ ବିନା ଆପଣଙ୍କ କାମ ଅଟକି ଯାଇପାରେ । ଆୟକର ବିଭାଗ PAN ନମ୍ବର ମାଧ୍ୟମରେ ବଡ଼ ଆର୍ଥିକ କାରବାର ଉପରେ ନଜର ରଖିଥାଏ । ଏହାଦ୍ୱାରା ବ୍ୟକ୍ତିଙ୍କ ଆୟ ଓ ଖର୍ଚ୍ଚ ମଧ୍ୟରେ ସଠିକ୍ ହିସାବ ରଖିବା ସମ୍ଭବ ହୋଇଥାଏ ।

ତେବେ ଜାଣନ୍ତୁ କେଉଁ ୫ଟି ବଡ଼ ଆର୍ଥିକ କାରବାର ପାଇଁ PAN Card ଦେବା ଆବଶ୍ୟକ ଏବଂ ଭୁଲ୍ PAN ନମ୍ବର ଦେଲେ କେତେ ଟଙ୍କା ଜରିମାନା ଲାଗିପାରେ ।
ଏହି ୫ଟି ଆର୍ଥିକ କାରବାର ପାଇଁ ଜରୁରୀ PAN Card

ଆୟକର ନିୟମ ଅନୁଯାୟୀ, କିଛି ନିର୍ଦ୍ଦିଷ୍ଟ ମୂଲ୍ୟର ଆର୍ଥିକ କାରବାର ପାଇଁ PAN ନମ୍ବର ଦେବା ବାଧ୍ୟତାମୂଳକ ।
୧. ସମ୍ପତ୍ତି କିଣାବିକା: ଆପଣ ଯଦି ୨୦ ଲକ୍ଷ ଟଙ୍କାରୁ ଅଧିକ ମୂଲ୍ୟର ଘର, ଦୋକାନ କିମ୍ବା ଜମି କିଣୁଛନ୍ତି ବା ବିକ୍ରି କରୁଛନ୍ତି, ତେବେ PAN Card ଦେବାକୁ ପଡ଼ିବ ।
୨. ସାମଗ୍ରୀ କିଣିବା: ଯଦି ଗୋଟିଏ କାରବାରରେ ୨ ଲକ୍ଷ ଟଙ୍କାରୁ ଅଧିକ ମୂଲ୍ୟର ସାମଗ୍ରୀ କିମ୍ବା ସେବା କିଣୁଛନ୍ତି, ତେବେ PAN Card ଦେବା ଆବଶ୍ୟକ ।
୩. ଅଣସୂଚୀଭୁକ୍ତ ସେୟାର (Unlisted Shares): ୧ ଲକ୍ଷ ଟଙ୍କାରୁ ଅଧିକ ମୂଲ୍ୟର ଅଣସୂଚୀଭୁକ୍ତ ସେୟାର କିଣିବା କିମ୍ବା ବିକ୍ରି କରିବା ସମୟରେ PAN ନମ୍ବର ଆବଶ୍ୟକ ।
୪. ଗାଡ଼ି କିଣିବା: ୫ ଲକ୍ଷ ଟଙ୍କାରୁ ଅଧିକ ମୂଲ୍ୟର କାର୍ କିମ୍ବା ବାଇକ୍ କିଣିବା ସମୟରେ PAN Card ଦେବାକୁ ପଡ଼ିପାରେ ।
୫. ଡିମାଟ୍ ଆକାଉଣ୍ଟ ଓ ନିବେଶ: ସେୟାର ବଜାର କିମ୍ବା ମ୍ୟୁଚୁଆଲ୍ ଫଣ୍ଡରେ ନିବେଶ କରିବା ପାଇଁ ଡିମାଟ୍ ଆକାଉଣ୍ଟ ଖୋଲିବା ସମୟରେ PAN Card ଆବଶ୍ୟକ।

PAN ନଦେଲେ କିମ୍ବା ଭୁଲ୍ ଦେଲେ ଆସିପାରେ ନୋଟିସ୍ ?
ଏହିସବୁ କାରବାର ମଧ୍ୟରୁ ଯେକୌଣସିଟି କରିବା ସମୟରେ ଯଦି ଆପଣ PAN Card ଦେଉନାହାନ୍ତି, ତେବେ ସମ୍ପୃକ୍ତ ବ୍ୟାଙ୍କ, ସଂସ୍ଥା କିମ୍ବା ବିକ୍ରେତା ଆପଣଙ୍କ କାରବାରକୁ ଅଟକାଇ ପାରନ୍ତି । ଆପଣ ବଡ଼ ଆର୍ଥିକ କାରବାରରେ PAN ନମ୍ବର ଦେବା ପରେ ସେହି ସୂଚନା TDS, TCS, SFT ଏବଂ AIS (Annual Information Statement) ମାଧ୍ୟମରେ ଆୟକର ବିଭାଗ ପାଖରେ ପହଞ୍ଚିଥାଏ ।

ଯଦି ଆପଣଙ୍କ ଘୋଷିତ ବାର୍ଷିକ ଆୟ ଏବଂ ଆପଣ କରୁଥିବା ବଡ଼ ଖର୍ଚ୍ଚ ମଧ୍ୟରେ ଅଧିକ ପାର୍ଥକ୍ୟ ଦେଖାଯାଏ, ତେବେ ଆୟକର ବିଭାଗ ଏହାର କାରଣ ସମ୍ପର୍କରେ ସ୍ପଷ୍ଟୀକରଣ ମାଗିପାରେ । ଏପରି ସ୍ଥିତିରେ ଆପଣଙ୍କୁ ଆୟର ଉତ୍ସ ସମ୍ପର୍କରେ ତଥ୍ୟ ଦେବାକୁ ପଡ଼ିପାରେ ।

ଭୁଲ୍ PAN ନମ୍ବର ଦେଲେ ୧୦ ହଜାର ଟଙ୍କା ଜରିମାନା
ଆୟକର ନିୟମ ଅନୁଯାୟୀ, ଯଦି କୌଣସି ବ୍ୟକ୍ତି ଭୁଲ୍ କିମ୍ବା ଜାଲ୍ PAN ନମ୍ବର ଦାଖଲ କରନ୍ତି, ତେବେ ତାଙ୍କ ଉପରେ ୧୦,୦୦୦ ଟଙ୍କା ପର୍ଯ୍ୟନ୍ତ ଜରିମାନା ଲାଗିପାରେ । ଏହା ବ୍ୟତୀତ ଭୁଲ୍ PAN ନମ୍ବର ଦେବା ଦ୍ୱାରା TDS Credit ଦାବି କରିବାରେ ମଧ୍ୟ ସମସ୍ୟା ହୋଇପାରେ । ଆପଣଙ୍କ ଆର୍ଥିକ ରେକର୍ଡରେ ତ୍ରୁଟି ଦେଖାଦେବା ସହ ଆୟକର ବିଭାଗର ଯାଞ୍ଚ ପରିସର ମଧ୍ୟ ବଢ଼ିପାରେ । ତେଣୁ ବ୍ୟାଙ୍କ, ଜମି ରେଜିଷ୍ଟ୍ରି କିମ୍ବା ଟିକସ ସମ୍ବନ୍ଧୀୟ ଦସ୍ତାବିଜରେ PAN ନମ୍ବର ଲେଖିବା ସମୟରେ ବିଶେଷ ସତର୍କ ରୁହନ୍ତୁ ।

PAN Card ମାଧ୍ୟମରେ କିପରି ନଜର ରଖେ ଆୟକର ବିଭାଗ ?
PAN Card ହେଉଛି ଭାରତର ଟିକସ ବ୍ୟବସ୍ଥାରେ ଆପଣଙ୍କର ଏକ ସ୍ୱତନ୍ତ୍ର ପରିଚୟ । ଆପଣଙ୍କ ବ୍ୟାଙ୍କ ଜମା, ମ୍ୟୁଚୁଆଲ୍ ଫଣ୍ଡ, ସେୟାର ବଜାରରେ କାରବାର, ସମ୍ପତ୍ତି କିଣାବିକା ଏବଂ ବିଦେଶକୁ ପଠାଯାଉଥିବା ଟଙ୍କା ଭଳି ଅନେକ ଆର୍ଥିକ ତଥ୍ୟ PAN ସହ ଲିଙ୍କ୍ ହୋଇଥାଏ । ଆୟକର ବିଭାଗ ଡାଟା ଆନାଲିଟିକ୍ସ ଓ ଆଧୁନିକ ପ୍ରଯୁକ୍ତିର ସହାୟତାରେ ଏହି ସବୁ ତଥ୍ୟର ଯାଞ୍ଚ କରିଥାଏ । ଏହାଦ୍ୱାରା ଆପଣଙ୍କ ଆୟ ଓ ବ୍ୟୟ ମଧ୍ୟରେ ସମନ୍ୱୟ ରହିଛି କି ନାହିଁ, ତାହା ଜାଣିବା ସହଜ ହୋଇଥାଏ । ତେଣୁ ବଡ଼ ଆର୍ଥିକ କାରବାର କରିବା ସମୟରେ ସଠିକ୍ PAN ନମ୍ବର ଦିଅନ୍ତୁ ଏବଂ ଆୟକର ନିୟମ ପାଳନ କରନ୍ତୁ ।