Videos
|
Technology

Fake Police Notice / AIରେ ତିଆରି କଲେ ନକଲି ପୋଲିସ ନୋଟିସ୍, ପୂର୍ବତନ ପ୍ରେମିକ ହେଲେ ହଇରାଣ ଆଉ ତା'ପରେ...

Rashmita Mishra
Browse all articles by Rashmita Mishra
·27 mins ago·2 min read
AIରେ ତିଆରି କଲେ ନକଲି ପୋଲିସ ନୋଟିସ୍, ପୂର୍ବତନ ପ୍ରେମିକ ହେଲେ ହଇରାଣ ଆଉ ତା'ପରେ...
Fake Police Notice

Key Points

AIରେ ତିଆରି କଲେ ନକଲି ପୋଲିସ ନୋଟିସ୍, ପୂର୍ବତନ ପ୍ରେମିକ ହେଲେ ହଇରାଣ
ChatGPTରେ ନକଲି ପୋଲିସ ନୋଟିସ୍, ଯୁବତୀଙ୍କ କାରନାମା
Ex-Boyfriendଙ୍କୁ ଡରାଇବାକୁ AIର ସାହାଯ୍ୟ, ଧରାପଡ଼ିଲା ଚାଲ୍
AIର ଅପବ୍ୟବହାର ! ନକଲି SHE Teams ନୋଟିସ୍‌ରେ ଫସିଲେ ଯୁବକ

ପୂର୍ବତନ ପ୍ରେମିକଙ୍କୁ ଡରାଇବା ପାଇଁ ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI)ର ସାହାଯ୍ୟ ନେଲେ ଜଣେ ଯୁବତୀ । ChatGPT ବ୍ୟବହାର କରି ପୋଲିସର ଏକ ନକଲି ନୋଟିସ୍ ପ୍ରସ୍ତୁତ କରି ତାଙ୍କୁ WhatsAppରେ ପଠାଇଥିଲେ । ତେବେ ଯୁବକ ଜଣକ ପୋଲିସ ଅଫିସରେ ପହଞ୍ଚିବା ପରେ ପୂରା ଘଟଣାର ପର୍ଦ୍ଦାଫାସ ହୋଇଛି ।

ସୂଚନା ଅନୁଯାୟୀ, ଏହି ଘଟଣା ତେଲେଙ୍ଗାନାର ହାଇଦ୍ରାବାଦରେ ଘଟିଛି । ୨୪ ବର୍ଷୀୟ ଭି. ତିରୁନେଶ୍ୱର କୁକଟପଲ୍ଲୀ ଅଞ୍ଚଳର ବାସିନ୍ଦା । ସେ ଏକ ଘରୋଇ କମ୍ପାନୀରେ କାମ କରନ୍ତି । ଦିନେ ତାଙ୍କ WhatsAppକୁ ହାଇଦ୍ରାବାଦ SHE Teams ନାମରେ ଏକ ନୋଟିସ୍ ଆସିଥିଲା । ଏଥିରେ ତାଙ୍କୁ ପଚରାଉଚରା ପାଇଁ HACA Bhavan ସ୍ଥିତ SHE Teams କାର୍ଯ୍ୟାଳୟରେ ହାଜର ହେବାକୁ କୁହାଯାଇଥିଲା ।

ନୋଟିସ୍‌ଟିକୁ ଅସଲି ଭାବି ତିରୁନେଶ୍ୱର ନିର୍ଦ୍ଦିଷ୍ଟ ଠିକଣାରେ ପହଞ୍ଚିଥିଲେ । କିନ୍ତୁ ସେଠାରେ ଅଧିକାରୀମାନେ ଯାଞ୍ଚ କରିବା ପରେ ଜଣାପଡ଼ିଥିଲା ଯେ, SHE Teams ପକ୍ଷରୁ ଏଭଳି କୌଣସି ନୋଟିସ୍ ଜାରି କରାଯାଇନାହିଁ । ଅର୍ଥାତ୍ ନୋଟିସ୍‌ଟି ସମ୍ପୂର୍ଣ୍ଣ ନକଲି ଥିଲା ।

କିପରି ଧରାପଡ଼ିଲା ନକଲି ନୋଟିସ୍‌ର ରହସ୍ୟ ?
ଏହାପରେ ପୋଲିସ ନୋଟିସ୍ ପଠାଇଥିବା ବ୍ୟକ୍ତିଙ୍କ ବିଷୟରେ ତଦନ୍ତ ଆରମ୍ଭ କରିଥିଲା । ଯାଞ୍ଚରୁ ଜଣାପଡ଼ିଥିଲା ଯେ, ତିରୁନେଶ୍ୱରଙ୍କୁ ନୋଟିସ୍ ଫରୱାର୍ଡ କରିଥିବା ବ୍ୟକ୍ତି ଏହା ତାଙ୍କ ପୂର୍ବତନ ପ୍ରେମିକାଙ୍କଠାରୁ ପାଇଥିଲେ । ପରେ ପୋଲିସ ଯୁବତୀଙ୍କୁ ପଚରାଉଚରା କରିଥିଲା । ସୈଫାବାଦ ଡିଭିଜନର ଇନ୍ସପେକ୍ଟର ଏନ୍. ରାଜେନ୍ଦ୍ରଙ୍କ ସୂଚନା ଅନୁଯାୟୀ, ଯୁବତୀ ଜଣକ ChatGPT ସାହାଯ୍ୟରେ SHE Teams ନାମରେ ଏହି ନକଲି ନୋଟିସ୍ ପ୍ରସ୍ତୁତ କରିଥିବା ସ୍ୱୀକାର କରିଥିବା କୁହାଯାଉଛି । ତାଙ୍କ ଉଦ୍ଦେଶ୍ୟ ଥିଲା ପୂର୍ବତନ ପ୍ରେମିକଙ୍କୁ ଭୟଭୀତ କରିବା ।

ଏହି କାମରେ ଯୁବତୀଙ୍କୁ ତାଙ୍କର ଜଣେ ୨୧ ବର୍ଷୀୟ ବନ୍ଧୁ ସହଯୋଗ କରିଥିଲେ । ସେହି ବନ୍ଧୁଙ୍କ ମାଧ୍ୟମରେ ନକଲି ନୋଟିସ୍‌ଟି ତିରୁନେଶ୍ୱରଙ୍କ ପାଖରେ ପହଞ୍ଚିଥିଲା । ନଭେମ୍ବର ୧୭ ତାରିଖରେ SHE Teamsର ସବ୍-ଇନ୍ସପେକ୍ଟର ଜି. ଭେଙ୍କଟେଶଙ୍କ ଅଭିଯୋଗ ଆଧାରରେ ସୈଫାବାଦ ପୋଲିସ ଏକ ମାମଲା ରୁଜୁ କରିଛି । ଯୁବତୀ ଓ ତାଙ୍କ ୨୧ ବର୍ଷୀୟ ବନ୍ଧୁଙ୍କ ବିରୋଧରେ ମାମଲା ହୋଇଥିବା ବେଳେ ଏପର୍ଯ୍ୟନ୍ତ କାହାରିକୁ ଗିରଫ କରାଯାଇନାହିଁ । ପୋଲିସ ଘଟଣାର ତଦନ୍ତ ଜାରି ରଖିଛି । AIର ବ୍ୟବହାର ଯେତେ ସହଜ ହେଉଛି, ଏହାର ଅପବ୍ୟବହାର ସେତେ ବଡ଼ ଚିନ୍ତାର କାରଣ ପାଲଟୁଛି ।

Argus News App

📱 Get Argus News App

✨
📰 60 Word News🎬 Argus Podcast📺 Live TV and Breaking News🔔 Free Notification Alerts
Download Free: